ಹೊಸದಿಲ್ಲಿ : ಚೀನದೊಂದಿಗಿನ ಗಡಿ ರಕ್ಷಣೆಯಲ್ಲಿ ತೊಡಗಿದ್ದ ವೇಳೆ ಮೃತಪಟ್ಟ ಅಥವಾ ಗಾಯಗೊಂಡ ಭಾರತೀಯ ಯೋಧರಿಗೆ ಪೂರ್ಣ ಪಿಂಚಣಿಯನ್ನು ನೀಡಲು ಕೇಂದ್ರ ಸರಕಾರ ನಿರ್ಧರಿಸಿದೆ.
ಸಿಕ್ಕಿಂ ಗಡಿಯಲ್ಲಿನ ವಿವಾದಿತ ಡೋಕ್‌ಲಾಂ ಪ್ರದೇಶದಲ್ಲಿ ಭಾರತ ಮತ್ತು ಚೀನ ಪಡೆಗಳು ಸುಮಾರು 6 ತಿಂಗಳ ಕಾಲ ಮುಖಾಮುಖೀಯಾಗಿ ಬಹುತೇಕ ದೈಹಿಕ ಜಟಾಪಟಿಗೆ ಮುಂದಾಗುವ ಸನ್ನಿವೇಶ ತಲೆದೋರಿ ಕೊನೆಗೂ ಈ ಸಮರ ಸನ್ನಿಹಿತ ಸ್ಥಿತಿಯು ಉನ್ನತ ರಾಜತಾಂತ್ರಿಕ ಮಾತುಕತೆಯಲ್ಲಿ ಶಮನಗೊಂಡ ಆರು ತಿಂಗಳ ಬಳಿಕ ಸರಕಾರ ಈಗ ಚೀನ ಗಡಿಯಲ್ಲಿ ಮೃತಪಟ್ಟ ಅಥವಾ ಗಾಯಗೊಂಡ ಭಾರತೀಯ ಯೋಧರಿಗೆ ಪೂರ್ಣ ಪಿಂಚಣಿ ನೀಡುವ ನಿರ್ಧಾರವನ್ನು ಕೈಗೊಂಡಿದೆ.
ಈ ವರೆಗಿನ ನಿಯಮಗಳ ಪ್ರಕಾರ ಯೋಧರಿಗೆ ಅವರು ಕೊನೆಯ ಬಾರಿ ಪಡೆದ ವೇತನದ ಶೇ.30ರಷ್ಟು ಮಾತ್ರವೇ ಅವರಿಗೆ ಪಿಂಚಣಿಯಾಗಿ ಸಿಗುತ್ತಿತ್ತು. ಇದೀಗ ಉದಾರೀಕೃತ ಕುಟುಂಬ ಪಿಂಚಣಿಯು ಅವರಿಗೆ ಶೇ.100 ಪಿಂಚಣಿಯನ್ನು ಪಡೆಯುವುದಕ್ಕೆ ಅವಕಾಶ ಮಾಡಿಕೊಟ್ಟಿದೆ.
ಆದರೆ ಶೇ.100 ಪಿಂಚಣಿ ಪಡೆಯುವ ಭಾಗ್ಯ ಈ ತನಕ ಪಾಕಿಸ್ಥಾನದ ಅಂತಾರಾಷ್ಟ್ರೀಯ ಗಡಿಯಲ್ಲಿ ಮೃತಪಡುವ ಅಥವಾ ಗಾಯಗೊಳ್ಳುವ ಯೋಧರಿಗೆ ಮಾತ್ರವೇ ಅನ್ವಯಿಸುತ್ತಿತ್ತು. ಇದೀಗ ಈ ಉದಾರೀಕೃತ ಪಿಂಚಣಿಯನ್ನು ಸರಕಾರ ಚೀನದೊಂದಿಗೆ ಭಾರತ ಗಡಿ ರಕ್ಷಣೆಯಲ್ಲಿರುವ ಭಾರತೀಯ ಯೋಧರಿಗೂ ಅನ್ವಯಿಸಿದೆ.
ಈ ಉದಾರೀಕೃತ ಪೂರ್ಣ ಪಿಂಚಣಿ ಭಾಗ್ಯವು ಚೀನದೊಂದಿಗೆ ಭಾರತ ಗಡಿ ರಕ್ಷಣೆಯಲ್ಲಿರುವ ಯೋಧರಿಗೆ ಇದೇ ಮಾರ್ಚ್‌ 7ರಂದು ಅನ್ವಯವಾಗುವಂತೆ ಜಾರಿ ಮಾಡಲಾಗಿದೆ. ಆದರೆ ಈ ದಿನಾಂಕಕ್ಕೆ ಮೊದಲು ಪಿಂಚಣಿ ಪಡೆದವರಿಗೆ ಇದನ್ನು ಪೂರ್ವಾನ್ವಯ ಮಾಡಲಾಗುವುದಿಲ್ಲ ಎಂದು ಸರಕಾರಿ ಮೂಲಗಳು ತಿಳಿಸಿವೆ.
