ಕೆಎಸ್‌ಸಿಎನಿಂದ ವೇದಾ, ರಾಜೇಶ್ವರಿಗೆ ಸಮ್ಮಾನ

ಬೆಂಗಳೂರು: ಐಸಿಸಿ ವನಿತಾ ಏಕದಿನ ವಿಶ್ವಕಪ್‌ನಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದ ಕರ್ನಾಟಕದ ಆಟಗಾರ್ತಿಯರಾದ ವೇದಾ ಕೃಷ್ಣಮೂರ್ತಿ ಮತ್ತು ರಾಜೇಶ್ವರಿ ಗಾಯಕ್ವಾಡ್‌ ಅವರನ್ನು ರಾಜ್ಯ ಕ್ರಿಕೆಟ್‌ ಅಸೋಸಿಯೇಶನ್‌ (ಕೆಎಸ್‌ಸಿಎ) ಗುರುವಾರ ಸಮ್ಮಾನಿಸಿದೆ. ಇದೇ ಸಂದರ್ಭದಲ್ಲಿ ಇಬ್ಬರು ಆಟಗಾರ್ತಿಯರಿಗೆ ಕೆಎಸ್‌ಸಿಎ ತಲಾ 5 ಲಕ್ಷ ರೂ. ಚೆಕ್‌ ವಿತರಿಸಿದೆ.

ಸಮ್ಮಾನದ ಅನಂತರ ಪ್ರತಿಕ್ರಿಯಿಸಿದ ವೇದಾ ಕೃಷ್ಣಮೂರ್ತಿ ಮತ್ತು ರಾಜೇಶ್ವರಿ, ಕರ್ನಾಟಕ ರಾಜ್ಯ ಕ್ರಿಕೆಟ್‌ ಸಂಸ್ಥೆಯಿಂದ ಕ್ರಿಕೆಟ್‌ ಜೀವನ ರೂಪಿಸಿಕೊಳ್ಳಲು ನೆರವಾಯಿತು. ನಾವು ರಾಷ್ಟ್ರೀಯ ತಂಡದಲ್ಲಿ ಆಡಲು ಕೆಎಸ್‌ಸಿಎ ಸಹಾಯವೇ ಕಾರಣ. ಇದನ್ನು ನಾವು ಎಂದೂ ಮರೆಯಲಾರೆವು ಎಂದು ತಿಳಿಸಿದರು.

ಲಂಡನ್‌ನಲ್ಲಿ ನಡೆದ ವಿಶ್ವಕಪ್‌ನಲ್ಲಿ ಭಾರತ ತಂಡ ಫೈನಲ್‌ನಲ್ಲಿ ಇಂಗ್ಲೆಂಡ್‌ ವಿರುದ್ಧ ಸೋತು ರನ್ನರ್‌ ಅಪ್‌ ಸ್ಥಾನ ಪಡೆದಿತ್ತು. ಭಾರತ ತಂಡದಲ್ಲಿ ಆಡಿದ ವೇದಾ ಮತ್ತು ರಾಜೇಶ್ವರಿ ಭಾರತ ತಂಡದ ಯಶಸ್ಸಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ವಿಶ್ವಕಪ್‌ನಲ್ಲಿ 6 ಪಂದ್ಯವಾಡಿರುವ ವೇದಾ ಒಂದು ಅರ್ಧಶತಕ ಸೇರಿದಂತೆ 153 ರನ್‌ ಬಾರಿಸಿದ್ದಾರೆ. 3 ಪಂದ್ಯವಾಡಿರುವ ರಾಜೇಶ್ವರಿ 7 ವಿಕೆಟ್‌ ಪಡೆದಿದ್ದಾರೆ. ಲೀಗ್‌ನಲ್ಲಿ ಮಾಡು ಇಲ್ಲವೆ ಮಡಿ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್‌ ತಂಡದ ವಿರುದ್ಧ ವೇದಾ ಅರ್ಧಶತಕ ಸಿಡಿಸಿದ್ದರೆ, ರಾಜೇಶ್ವರಿ ಗಾಯಕ್ವಾಡ್‌ 15ಕ್ಕೆ 5 ವಿಕೆಟ್‌ ಪಡೆದು ಭಾರತಕ್ಕೆ ಗೆಲುವು ತಂದಿದ್ದರು.