ಕೊರೊನಾ ಕಳವಳ: ಫ್ರೆಂಚ್ ಓಪನ್ ಕೂಟ ಮುಂದೂಡಿಕೆ

ಪ್ಯಾರಿಸ್: ಚೀನಾ, ಯುರೋಪ್, ಅಮೆರಿಕಾ, ಮದ್ಯಪ್ರಾಚ್ಯ ಸೇರಿದಂತೆ ವಿಶ್ವದ ಬಹುತೇಕ ರಾಷ್ಟ್ರಗಳಲ್ಲಿ ವ್ಯಾಪಕವಾಗಿ ಹಬ್ಬುತ್ತಿರುವ ಮಹಾಮಾರಿ ಕೊರೊನಾ ವೈರಸ್ ಹಿನ್ನಲೆಯಲ್ಲಿ ಮೇ ತಿಂಗಳಿನಲ್ಲಿ ನಡೆಯಬೇಕಿದ್ದ ಫ್ರೆಂಚ್ ಓಪನ್ ಕೂಟವನ್ನು ಮುಂದೂಡಲಾಗಿದೆ.

ಮೇ 24 ರಿಂದ ಜೂನ್ 7ರವರೆಗೆ ನಡೆಯಬೇಕಿದ್ದ ಆವೆ ಮಣ್ಣಿನ ಈ ಪ್ರತಿಷ್ಠಿತ ಟೆನ್ನಿಸ್ ಕೂಟವನ್ನು ಇದೀಗ ನಾಲ್ಕು ತಿಂಗಳುಗಳ ಕಾಲ ಮುಂದೂಡಲಾಗಿದೆ. ಎಲ್ಲವೂ ಸುಸೂತ್ರಗೊಂಡಲ್ಲಿ ಈ ಕೂಟವನ್ನು ಸೆಪ್ಟಂಬರ್ 20ರಿಂದ ಅಕ್ಟೋಬರ್ 4ರವರೆಗೆ ನಡೆಸಲಾಗುತ್ತದೆ ಎಂದು ಕೂಟದ ಸಂಘಟಕರು ತಿಳಿಸಿದ್ದಾರೆ.

ಆಟಗಾರರು ಮತ್ತು ಈ ಕೂಟದಲ್ಲಿ ಪ್ರತ್ಯಕ್ಷವಾಗಿ ಭಾಗವಹಿಸುವ ಎಲ್ಲರ ಹಿತದೃಷ್ಟಿಯನ್ನು ಗಮನದಲ್ಲಿಟ್ಟುಕೊಂಡು ಈ ಮಹತ್ವದ ನಿರ್ಧಾರವನ್ನು ಕೈಗೊಳ್ಳಲಾಗಿದೆ.