7 ವಿಕೆಟ್‌: ವನಿತಾ ಟಿ20ಯಲ್ಲಿ ಫ್ರೆಡೆರಿಕ್‌ ದಾಖಲೆ

ಕಾರ್ಟಾಕ್ಸೆನಾ (ಸ್ಪೇನ್‌) : ಅಂತಾರಾಷ್ಟ್ರೀಯ ವನಿತಾ ಟಿ20 ಕ್ರಿಕೆಟ್‌ನಲ್ಲಿ ನೆದರ್ಲೆಂಡ್ಸ್‌ನ ಪೇಸ್‌ ಬೌಲರ್‌ ಫ್ರೆಡೆರಿಕ್‌ ಓವರ್ಡಿಕ್‌ 7 ವಿಕೆಟ್‌ ಉರುಳಿಸುವ ಮೂಲಕ ವಿಶ್ವದಾಖಲೆ ನಿರ್ಮಿಸಿದ್ದಾರೆ. ಐಸಿಸಿ ಆಯೋಜಿಸಿದ ಯುರೋಪಿಯನ್‌ ಟಿ20 ವಿಶ್ವಕಪ್‌ ಅರ್ಹತಾ ಸುತ್ತಿನ ಫ್ರಾನ್ಸ್‌ ಎದುರಿನ ಪಂದ್ಯದಲ್ಲಿ ಓವರ್ಡಿಕ್‌ ಈ ಸಾಧನೆಗೈದರು. 4 ಓವರ್‌ಗಳಲ್ಲಿ ಕೇವಲ 3 ರನ್‌ ನೀಡಿ 7 ವಿಕೆಟ್‌ ಉಡಾಯಿಸಿದರು. ಇದರಲ್ಲಿ 2 ಓವರ್‌ ಮೇಡನ್‌ ಆಗಿತ್ತು.

ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗ್‌ ಆಯ್ದುಕೊಂಡ ಫ್ರಾನ್ಸ್‌, ಫ್ರೆಡೆರಿಕ್‌ ಓವರ್ಡಿಕ್‌ ದಾಳಿಗೆ ತತ್ತರಿಸಿ 17.3 ಓವರ್‌ನಲ್ಲಿ ಕೇವಲ 33 ರನ್‌ ಗಳಿಗೆ ಆಲೌಟ್‌ ಆಯಿತು. ಸುಲಭ ಗುರಿ ಬೆನ್ನತ್ತಿದ ನೆದರ್ಲೆಂಡ್ಸ್‌ ಕೇವಲ 3.3 ಓವರ್‌ನಲ್ಲಿ ಗುರಿ ತಲುಪಿ 9 ವಿಕೆಟ್‌ಗಳ ಭರ್ಜರಿ ಜಯ ಸಾಧಿಸಿತು.

ಪುರುಷರ ಹಾಗೂ ವನಿತೆಯರ ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ 6 ವಿಕೆಟ್‌ ಉರುಳಿಸಿದ್ದೇ ಅತ್ಯುತ್ತಮ ಸಾಧನೆಯಾಗಿತ್ತು. ಇದೀಗ ಓವರ್ಡಿಕ್‌ ತಮ್ಮ 8ನೇ ಪಂದ್ಯದಲ್ಲಿ ಎಲ್ಲರನ್ನೂ ಮೀರಿ ನಿಂತರು. ಹಿಂದಿನ 7 ಪಂದ್ಯಗಳಲ್ಲಿ ಅವರು ಕೇವಲ 4 ವಿಕೆಟ್‌ ಉರುಳಿಸಿದ್ದರು.

ಇದಕ್ಕೂ ಮೊದಲು ನೇಪಾಲದ ಅಂಜಲಿ ಚಂದ್‌ ಟಿ20ಯಲ್ಲಿ ಅತ್ಯುತ್ತಮ ಬೌಲಿಂಗ್‌ ಪ್ರದರ್ಶನ ನೀಡಿದ ದಾಖಲೆ ಹೊಂದಿದ್ದರು. 2019ರಲ್ಲಿ ಮಾಲ್ಡೀವ್ಸ್‌ ವಿರುದ್ಧ 2.1 ಓವರ್‌ಗಳಲ್ಲಿ ಒಂದೂ ರನ್‌ ನೀಡದೆ 6 ವಿಕೆಟ್‌ ಕೆಡವಿದ್ದರು.