ವಿಶ್ವ ವಿಜೇತರಿಗೆ ಅತ್ಯುನ್ನತ ಗೌರವ

ಪ್ಯಾರಿಸ್‌: ಫಿಫಾ ವಿಶ್ವಕಪ್‌ ಫ‌ುಟ್‌ಬಾಲ್‌ ಕೂಟದ ಪ್ರಶಸ್ತಿ ಗೆದ್ದು ಐತಿಹಾಸಿಕ ಸಾಧನಗೈದ ಫ್ರಾನ್ಸ್‌ನ ಆಟಗಾರರಿಗೆ ದೇಶದ ಅತ್ಯುನ್ನತ ಗೌರವವಾದ ಲೀಜನ್‌ ಆಫ್ ಹಾನರ್‌ ಪ್ರಶಸ್ತಿ ನೀಡಲು ನಿರ್ಧರಿಸಲಾಗಿದೆ ಎಂದು ಅಧ್ಯಕ್ಷ ಎಮ್ಯಾನ್ಯುಯೆಲ್‌ ಮ್ಯಾಕ್ರನ್‌ ಅವರ ಕಚೇರಿ ಪ್ರಕಟನೆ ತಿಳಿಸಿದೆ. ದೇಶಕ್ಕೆ ನೀಡಿದ ಅಸಾಮಾನ್ಯ ಸೇವೆಗೆ ಈ ಗೌರವ ನೀಡಲಾಗುತ್ತದೆ. ಪ್ರಶಸ್ತಿ ಪ್ರದಾನ ಸಮಾರಂಭದ ದಿನ ಇನ್ನೂ ಖಚಿತವಾಗಿಲ್ಲ.

ಫ್ರಾನ್ಸ್‌ ತಂಡ ತವರಿಗೆ ಆಗಮಿಸುವ ಮೊದಲೇ ದೇಶದ ಅತ್ಯುನ್ನತ ಗೌರವ ಪ್ರದಾನಿಸುವ ನಿರ್ಧಾರ ಮಾಡಲಾಗಿದೆ. ರಶ್ಯದಲ್ಲಿ ನಡೆದ ವಿಶ್ವಕಪ್‌ನ ಫೈನಲ್‌ನಲ್ಲಿ ಕ್ರೊವೇಶಿಯವನ್ನು 4-2 ಗೋಲುಗಳಿಂದ ಸೋಲಿಸಿದ ಫ್ರಾನ್ಸ್‌ ಎರಡನೇ ಬಾರಿ ಪ್ರಶಸ್ತಿ ಗೆದ್ದ ಸಾಧನೆ ಮಾಡಿತು. 

ಫ್ರಾನ್ಸ್‌ ಸರಿಯಾಗಿ 20 ವರ್ಷಗಳ ಹಿಂದೆ ನಾಯಕ ದಿದಿಯರ್‌ ದೆಶಾಂಪ್ಸ್‌ ನೇತೃತ್ವದಲ್ಲಿ ಚೊಚ್ಚಲ ಬಾರಿ ಪ್ರಶಸ್ತಿ ಗೆದ್ದಿತ್ತು. ಆಗ ಕೂಡ ದೆಶಾಂಪ್ಸ್‌ ಆಗಿನ ಅಧ್ಯಕ್ಷ ಜ್ಯಾಕ್‌ ಚಿರಾಕ್‌ ಅವರಿಂದ ಲೀಜನ್‌ ಆಫ್ ಹಾನರ್‌ ಗೌರವ ಪಡೆದಿದ್ದರು. ಸದ್ಯ ದೆಶಾಂಪ್ಸ್‌ ಲೆಸ್‌ ಬ್ಲೂಸ್‌ನ ಕೋಚ್‌ ಆಗಿದ್ದಾರೆ.