Arrested: ನಾಲ್ವರು ದರೋಡೆಕೋರರ ಬಂಧನ

ಬೆಂಗಳೂರು: ಸಾರ್ವಜನಿಕರ ಅಡ್ಡಗಟ್ಟಿ ದರೋಡೆ ಮಾಡುತ್ತಿದ್ದ ನಾಲ್ವರು ಆರೋಪಿಗಳನ್ನು ಪುಲಕೇಶಿನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಎಲ್‌.ಆರ್‌.ನಗರ ನಿವಾಸಿ ಉಸ್ಮಾನ್‌ ಪಾಷಾ(20), ಸೂರ್ಯ(20), ಇರ್ಫಾನ್‌ (20),  ಜೀವಾ(19) ಬಂಧಿತರು. ಆರೋಪಿ ಗಳಿಂದ 1.5 ಲಕ್ಷ ರೂ. ಮೌಲ್ಯದ ಮೊಬೈಲ್‌ ಗಳು, ಬೆಳ್ಳಿಯ ಸರ, ನಗದು ಹಾಗೂ ದ್ವಿಚಕ್ರ ವಾಹನಗಳು ಸೇರಿ ಇತರೆ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿದೆ.

ಆರೋಪಿಗಳು ಠಾಣಾ ವ್ಯಾಪ್ತಿಯಲ್ಲಿ ಎರಡು ತಿಂಗಳ ಹಿಂದೆ ಡೇವಿಸ್‌ ರಸ್ತೆಯ ಸಿಗ್ನಲ್‌ ಬಳಿ ಸ್ವಿಗ್ಗಿ ಡೆಲಿವರಿ ಹುಡುಗನನ್ನು ತಡೆದು ಆತನಿಂದ ಮೊಬೈಲ್‌, ಹಣ ಸುಲಿಗೆ ಮಾಡಿದ್ದರು. ಬೊಮ್ಮನಹಳ್ಳಿ ರಸ್ತೆಯಲ್ಲಿ ವ್ಯಕ್ತಿಯಿಂದ ಮೊಬೈಲ್‌ ಸುಲಿಗೆ ಮಾಡಿದ್ದರು. ಪುಲಿಕೇಶಿ ನಗರದ ಸಿಸಿ ರಸ್ತೆಯಲ್ಲಿ ಹಣ ಸುಲಿಗೆ ಮಾಡಲು ತೆರಳಿ ವ್ಯಕ್ತಿಯ ಮೇಲೆ ಹಲ್ಲೆ ನಡೆಸಿ ಪರಾರಿಯಾಗಿದ್ದರು. ಸಹಾಯ ಕೇಳುವ ನೆಪದಲ್ಲಿ ಕಾರುಗಳನ್ನು ಅಡ್ಡಗಟ್ಟಿ ಚಾಲಕರಿಗೆ ಬೆದರಿಸಿ ಹಣ ಸುಲಿಗೆ ಮಾಡಿದ್ದರು. ಈ ಸಂಬಂಧ ಪ್ರತ್ಯೇಕ ಪ್ರಕರಣ ಗಳನ್ನು ದಾಖಲಿಸಿಕೊಂಡು ಆರೋಪಿಗಳನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿದರು.

ಪುಲಕೇಶಿನಗರ ಉಪವಿಭಾಗದ ಎಸಿಪಿ ಸಿ.ಆರ್‌.ಗೀತಾ, ಠಾಣಾಧಿಕಾರಿ ಟಿ.ಸೋಮಶೇಖರ್‌ ಹಾಗೂ ಪಿಎಸ್‌ಐ ಮೊಹಮ್ಮದ್‌ ಅಲಿ ಇಮ್ರಾನ್‌, ತಂಡ ಕಾರ್ಯಾಚರಣೆ ನಡೆಸಿದೆ.