ಪಣಜಿ : ಮಾಜಿ ರಾಜ್ಯಸಭಾ ಸದಸ್ಯ ಹಾಗೂ ಮಾಜಿ ಗೋವಾ ಕಾಂಗ್ರೆಸ್ ಮುಖ್ಯಸ್ಥ ಶಾಂತಾರಾಮ್‌ ನಾಯ್ಕ್ ಅವರು ಇಂದು ಬೆಳಗ್ಗೆ 7 ಗಂಟೆಗೆ ಹೃದಯಾಘಾತದಿಂದ ನಿಧನ ಹೊಂದಿದರು.
72ರ ಹರೆಯದ ನಾಯ್ಕ್ ಅವರಿಗೆ ನಿನ್ನೆ ರಾತ್ರಿ ಹಠಾತ್‌ ಅನಾರೋಗ್ಯ ಕಾಣಿಸಿಕೊಂಡಿತ್ತು. ಒಡನೆಯೇ ಅವರನ್ನು ಮಾರ್ಗೋವಾದ ಖಾಸಗಿ ಆಸ್ಪತ್ರೆಗೆ ಒಯ್ಯಲಾಯಿತು. ಆದರೆ ಅಲ್ಲಿನ ವೈದ್ಯರು ನಾಯ್ಕ್ ಅವರು ಅದಾಗಲೇ ಮೃತಪಟ್ಟಿರುವುದಾಗಿ ಘೋಷಿಸಿದರು.
ನಾಯ್ಕ್ ಅವರು ಇಂದು ಶನಿವಾರ ಬೆಳಗ್ಗೆ 7 ಗಂಟೆಗೆ ಮೃತಪಟ್ಟರೆಂದು ಗೋವಾ ಪ್ರದೇಶ್‌ ಕಾಂಗ್ರೆಸ್ ಸಮಿತಿ ಪ್ರಧಾನ ಕಾರ್ಯದರ್ಶಿಯಾಗಿರುವ ಆಲ್ಟಿನೋ ಗೋಮ್ಸ್‌ ತಿಳಿಸಿದರು. ನಾಯ್ಕ್ ಅವರ ಸಾವು ಪಕ್ಷಕ್ಕೆ ದೊಡ್ಡ ನಷ್ಟವೆಂದು ಗೋವಾ ಕಾಂಗ್ರೆಸ್ ನಾಯಕ ಗಿರೀಶ್‌ ರಾಯ ಛೋಡನ್‌ಕರ್‌ ಹೇಳಿದರು.
ಶಾಂತಾರಾಮ ನಾಯ್ಕ್ 1984ರ ಲೋಕಸಭಾ ಚುನಾವಣೆಯಲ್ಲಿ ಜಯಿಸಿದ್ದರು. 1987ರಲ್ಲಿ ಗೋವೆಗೆ ರಾಜ್ಯ ಮಟ್ಟದ ಸ್ಥಾನಮಾನ ದೊರಕುವಲ್ಲಿ ಅವರು ಅವಿರತವಾಗಿ ಶ್ರಮಿಸಿದ್ದರು.
ನಾಯ್ಕ್ ಅವರು ಪತ್ನಿ ಮತ್ತು ಓರ್ವ ಪುತ್ರನನ್ನು ಅಗಲಿದ್ದಾರೆ.
