ಇಂಗ್ಲೆಂಡಿನ ಮಾಜಿ ಕೀಪರ್‌ ಜಿಮ್‌ ಪಾರ್ಕ್ಸ್ ನಿಧನ

ಲಂಡನ್‌: ಇಂಗ್ಲೆಂಡ್‌ ಹಾಗೂ ಸಸೆಕ್ಸ್‌ ತಂಡದ ಮಾಜಿ ವಿಕೆಟ್‌ ಕೀಪರ್‌ ಜಿಮ್‌ ಪಾರ್ಕ್ಸ್ (90) ನಿಧನ ಹೊಂದಿದರು. ಅವರು ಇಂಗ್ಲೆಂಡಿನ ಅತೀ ಹಿರಿಯ ಟೆಸ್ಟ್‌ ಆಟಗಾರನಾಗಿದ್ದರು.

ಜಿಮ್‌ ಪಾರ್ಕ್ಸ್ 1954-1968ರ ಅವಧಿಯಲ್ಲಿ ಇಂಗ್ಲೆಂಡ್‌ ಪರ 46 ಟೆಸ್ಟ್‌ ಆಡಿದ್ದರು. 2 ಶತಕಗಳ ನೆರವಿನಿಂದ 1,962 ರನ್‌ ಬಾರಿಸಿದ್ದಾರೆ. 103 ಕ್ಯಾಚ್‌, 11 ಸ್ಟಂಪಿಂಗ್‌ ಕೀಪಿಂಗ್‌ ಸಾಧನೆಯಾಗಿದೆ.

ಜಿಮ್‌ ಪಾರ್ಕ್ಸ್ ಟೆಸ್ಟ್‌ ನಿವೃತ್ತಿಯ ಬಳಿಕ ಮತ್ತೆ 8 ವರ್ಷಗಳ ಕಾಲ ಸಸೆಕ್ಸ್‌ ಕೌಂಟಿಯಲ್ಲಿ ಆಡುವುದನ್ನು ಮುಂದುವರಿಸಿದರು. 18ರ ಹರೆಯದಲ್ಲೇ ಸಸೆಕ್ಸ್‌ ಪರ ಆಡಲಿಳಿದ ಅವರಿಗೆ ಕೌಂಟಿ ತಂಡದ ನಾಯಕತ್ವವೂ ಒಲಿದು ಬಂತು. ಅವರು ಉತ್ತಮ ಲೆಗ್‌ ಬ್ರೇಕ್‌ ಬೌಲರ್‌ ಕೂಡ ಆಗಿದ್ದರು. ಜಿಮ್‌ ಪಾರ್ಕ್ಸ್ ನಿಧನಕ್ಕೆ ಸಸೆಕ್ಸ್‌ ಕೌಂಟಿ ಶೋಕ ವ್ಯಕ್ತಪಡಿಸಿದೆ.