16ನೇ ಆವೃತ್ತಿಯ ಫೋರ್ಬ್ ಏಷ್ಯಾ ದಾನಿಗಳ ಪಟ್ಟಿಯಲ್ಲಿ ಅದಾನಿ, ನಡಾರ್‌

ನವದೆಹಲಿ: 16ನೇ ಆವೃತ್ತಿಯ ಫೋರ್ಬ್ ಏಷ್ಯಾ ದಾನಿಗಳ ಪಟ್ಟಿ ಬಿಡುಗಡೆಯಾಗಿದ್ದು, ಭಾರತೀಯ ಉದ್ಯಮಿಗಳಾದ ಗೌತಮ್‌ ಅದಾನಿ, ಶಿವ ನಡಾರ್‌, ಅಶೋಕ್‌ ಸೂಟ ಹಾಗೂ ಮಲೇಷಿಯನ್‌-ಇಂಡಿಯನ್‌ ಉದ್ಯಮಿ ಬ್ರಹ್ಮಲ್‌ ವಾಸುದೇವನ್‌ ಮತ್ತು ಅವರ ಪತ್ನಿ, ವಕೀಲೆ ಶಾಂತಿ ಕಂಡಿಯಾಹ್‌ ಸ್ಥಾನ ಪಡೆದಿದ್ದಾರೆ.

ಏಷ್ಯಾ-ಪೆಸಿಫಿಕ್‌ ಪ್ರದೇಶದಲ್ಲಿ ಸೇವಾಕಾರ್ಯಗಳಲ್ಲಿ ಪ್ರಮುಖವಾಗಿ ತೊಡಗಿರುವವರನ್ನು ಫೋರ್ಬ್ ಗುರುತಿಸಿದೆ.

ಈ ವರ್ಷ ಜೂನ್‌ನಲ್ಲಿ 60ನೇ ವಸಂತಕ್ಕೆ ಕಾಲಿಟ್ಟಿದ್ದ ಗೌತಮ್‌ ಅದಾನಿ ಅವರು 60,000 ಕೋಟಿ ರೂ. ದಾನ ಮಾಡಿದ್ದರು. ಅದಾನಿ ಫೌಂಡೇಶನ್‌ ಮೂಲಕ ಆರೋಗ್ಯ, ಶಿಕ್ಷಣ, ಕೌಶಲಾಭಿವೃದ್ಧಿಗೆ ಈ ಮೊತ್ತ
ಸದ್ವಿನಿಯೋಗವಾಗಲಿದೆ ಎನ್ನಲಾಗಿದೆ.

ಶತಕೋಟ್ಯಧಿಪತಿ ಶಿವ ನಡಾರ್‌ ಅವರು ಕಳೆದ ಕೆಲವು ದಶಕಗಳಲ್ಲಿ ತಮ್ಮ ಸಂಪತ್ತಿನ ಪೈಕಿ 1 ಶತಕೋಟಿ ಅಮೆರಿಕನ್‌ ಡಾಲರ್‌ ಅನ್ನು ಶಿವ ನಡಾರ್‌ ಫೌಂಡೇಶನ್‌ ಮೂಲಕ ವಿವಿಧ ಸಾಮಾಜಿಕ ಕಾರ್ಯಗಳಿಗಾಗಿ ವಿನಿಯೋಗಿಸಿದ್ದಾರೆ. ಈ ವರ್ಷ ಅವರು 11,600 ಕೋಟಿ ರೂ. ದಾನ ಮಾಡಿದ್ದಾರೆ.