ಮೇವು ಹಗರಣ: ಲಾಲುಗೆ ಶಿಕ್ಷೆ ಪ್ರಮಾಣ ಇಂದು ಘೋಷಣೆ

ರಾಂಚಿ: ಆರ್‌ಜೆಡಿ ನಾಯಕ ಲಾಲು ಪ್ರಸಾದ್‌ ಯಾದವ್‌ ಮತ್ತು ಇತರೆ 10 ಮಂದಿ ವಿರುದ್ಧದ ಶಿಕ್ಷೆ ಪ್ರಮಾಣವನ್ನು ಸಿಬಿಐ ವಿಶೇಷ ಕೋರ್ಟ್‌ ಶನಿವಾರ ಘೋಷಿಸಲಿದೆ. ಮೇವು ಹಗರಣಕ್ಕೆ ಸಂಬಂಧಿಸಿದಂತೆ ಶುಕ್ರವಾರ ವಿಶೇಷ ಕೋರ್ಟ್‌ ನ್ಯಾಯಾಧೀಶ ಶಿವಪಾಲ್‌ ಸಿಂಗ್‌ ರಾಂಚಿಯ ಬಿರ್ಸಾ ಮುಂಡಾ ಜೈಲಲ್ಲಿರುವ ಲಾಲು ಯಾದವ್‌ರ ವಿಚಾರಣೆ ಯನ್ನು ವಿಡಿಯೋ ಕಾನ್ಫರೆನ್ಸ್‌ ಮೂಲಕ ನಡೆಸಿದರು. ಈ ಸಂದರ್ಭದಲ್ಲಿ ಬಿಹಾರದ ಮಾಜಿ ಮುಖ್ಯಮಂತ್ರಿ ತಮಗೆ ಅನಾರೋಗ್ಯ ಮತ್ತು ಇಳಿ ವಯಸ್ಸಿನ ಹಿನ್ನೆಲೆಯಲ್ಲಿ ಶಿಕ್ಷೆಯ ಪ್ರಮಾಣ ಕಡಿತ ಮಾಡಬೇಕು ಎಂದು ಕೋರಿದರು. ಯಾದವ್‌ ಮಾತ್ರವಲ್ಲದೆ ಆರ್‌ಜೆಡಿ ನಾಯಕ ಆರ್‌.ಕೆ.ರಾಣಾ, ನಿವೃತ್ತ ಐಎಎಸ್‌ ಅಧಿಕಾರಿಗಳಾದ ಪೂಲ್‌ಚಂದ್‌ ಸಿಂಗ್‌, ಮಹೇಶ್‌ ಪ್ರಸಾದ್‌ ಮತ್ತು ಇತರ ಅಧಿಕಾರಿಗಳ ಪರ ವಕೀಲರು ತಮ್ಮ ವಾದ ಮಂಡಿಸಿದರು.  

ಕರೆ ಮಾಡಿಲ್ಲ: ಈ ನಡುವೆ ಆರ್‌ಜೆಡಿ ಮುಖ್ಯಸ್ಥರ ಆಪ್ತರಿಂದ ಕರೆ ಬಂದಿತ್ತು ಎಂದು ನ್ಯಾ| ಸಿಂಗ್‌ ಮಾತಿಗೆ ಸ್ಪಷ್ಟನೆ ನೀಡಿರುವ ಆರ್‌ಜೆಡಿ, ಅಂಥ ಕೆಲಸವನ್ನು ಪಕ್ಷದ ಯಾವ ನಾಯಕರೂ ಮಾಡಿಲ್ಲ ಎಂದಿದೆ.