ಸಸ್ಯಸಂಪತ್ತು ಜೀವಸಂಕುಲದ ಉಳಿವಿಗೆ ಕಾರಣ: ಸ್ವಾಮೀಜಿ

ಮೂಡಿಗೆರೆ: ಔಷಧೀಯ ಸಸ್ಯಗಳು, ಗಿಡಮೂಲಿಕೆಗಳ ಸಂಪತ್ತು ಜೀವಸಂಕುಲಗಳ ಉಳಿವಿಗೆ ಕಾರಣವಾಗಿವೆ ಎಂದು ಗದಗ ನಂದಿವೇರಿ ಸಂಸ್ಥಾನ ಮಠದ ಶ್ರೀ ಶಿವಕುಮಾರ ಸ್ವಾಮೀಜಿ ತಿಳಿಸಿದರು. ತೋಟಗಾರಿಕೆ ಮಹಾವಿದ್ಯಾಲಯದ ಬೆಳ್ಳಿಹಬ್ಬ ಅಂಗವಾಗಿ ಕಾಲೇಜು ಆವರಣದಲ್ಲಿ ಬುಧವಾರ ಏರ್ಪಡಿಸಿದ್ದ ಔಷ ಧೀಯ ಮತ್ತು ಸುಗಂಧ ದ್ರವ್ಯ ಬೆಳೆಗಳ ಪೋಷಣೆ, ಬೇಸಾಯ ಮತ್ತು ಉಪಯೋಗ ಕುರಿತ ರಾಷ್ಟ್ರಮಟ್ಟದ ಸಮ್ಮೇಳನಕ್ಕೆ ಚಾಲನೆ ನೀಡಿ ಮಾತನಾಡಿದರು.

ತೋಟಗಾರಿಕೆ ಮಹಾವಿದ್ಯಾಲಯ ಪಶ್ಚಿಮ ಘಟ್ಟಕ್ಕೆ ಹೊಂದಿಕೊಂಡಿರುವುದರಿಂದ ಇಲ್ಲಿಯೂ ದೊಡ್ಡಮಟ್ಟದ ಔಷ ಧದ ಸಸ್ಯಗಳ ಸಂರಕ್ಷಣೆ ಮಾಡಬಹುದು ಎಂದು ತಿಳಿಸಿದ ಅವರು, ಮೂಡಿಗೆರೆಯಲ್ಲಿ ರಾಷ್ಟ್ರಮಟ್ಟದ ಕಾರ್ಯಕ್ರಮ ಆಯೋಜಿಸಿರುವುದು ಶ್ಲಾಘನೀಯ. ನಾನು ಇಲ್ಲಿ ಸಂರಕ್ಷಕನಾಗಿ, ಸಂವರ್ಧನಕಾರನಾಗಿ, ಸಂಶೋಧಕನಾಗಿ ಭಾಗವಹಿಸುತ್ತಿದ್ದೇನೆ. ಗದಗ ಜಿಲ್ಲೆಯ ಕಪ್ಪತ್ತಗುಡ್ಡದ ತಪ್ಪಲಿನಲ್ಲಿ ಔಷಧೀಯ ಸಸ್ಯಗಳು ಹೇರಳವಾಗಿ ಸಿಗುತ್ತದೆ. ಸುಮಾರು 340 ಔಷಧೀಯ ಮತ್ತು ಸುಗಂಧ ದ್ರವ್ಯ ಸಸ್ಯತೋಟಗಳಿವೆ. ಅದರಲ್ಲಿ ಹೇರಳವಾಗಿ ಔಷಧೀಯ ಸಂರಕ್ಷಣೆ ಮಾಡಲಾಗುತ್ತಿದೆ. ಸುಮಾರು 80 ಸಾವಿರ ಎಕರೆ ಪ್ರದೇಶವಿದೆ. 2003ರಿಂದ ಈಚೆಗೆ ಮಳೆಕೊಯ್ಲು, ಅರಣ್ಯೀಕರಣಗಳನ್ನು ಮಾಡುವುದರ ಮೂಲಕ ಕಪ್ಪತ್ತಗುಡ್ಡದಲ್ಲಿ ಔಷಧೀಯ ಸಸ್ಯಗಳನ್ನು ಬೆಳೆಯಲಾಗುತ್ತಿದೆ. ಕಪ್ಪತ್ತಗುಡ್ಡ ಬಂಗಾರದ ಗುಡ್ಡವಾಗಿದ್ದು, ಆರು ಜಿಲ್ಲೆಗಳಿಗೆ ಆಧಾರವಾಗಿದೆ ಎಂದರು.

ಯುಎಎಚ್‌ಎಸ್‌ ಶಿವಮೊಗ್ಗದ ಡಾ| ನಾರಾಯಣಸ್ವಾಮಿ ಮಾತನಾಡಿ, ಭಾರತದ ಹದಿನೆಂಟು ಔಷ ಧೀಯ ಸಸ್ಯಗಳ ತಾಣಗಳಲ್ಲಿ ಹಿಮಾಲಯ ಮತ್ತು ಪಶ್ಚಿಮ ಘಟ್ಟ ಪ್ರಮುಖವಾದದ್ದು. ಈ ಪ್ರದೇಶಗಳಲ್ಲಿ ಸಿಗುವ ಔಷ ಧೀಯ ಸಸ್ಯಗಳಿಂದ ಮನುಷ್ಯನ ಜೀರ್ಣಕ್ರಿಯೆಯಿಂದ ಮೂಳೆಮುರಿತದವರೆಗೆ ಎಲ್ಲಾ ಔಷಧೀಯ ಸಸ್ಯಗಳು ಸಿಗುತ್ತದೆ. ಔಷಧೀಯ ಸಸ್ಯಗಳ ರಫ್ತಿನಲ್ಲಿ ಚೀನಾ ಮೊದಲ ಸ್ಥಾನದಲ್ಲಿದ್ದರೆ, ಭಾರತ ಎರಡನೇ ಸ್ಥಾನದಲ್ಲಿದೆ. ಕೀನ್ಯ ಮೂರನೇ ಸ್ಥಾನದಲ್ಲಿದೆ. ಮುಂದಿನ ಕೆಲವೇ ವರ್ಷಗಳಲ್ಲಿ ಭಾರತ ನಂ.1 ಔಷಧೀಯ ಸಸ್ಯಗಳ ತಾಣವಾಗಲಿದೆ ಎಂದರು. ಇದಕ್ಕೂ ಮೊದಲು ನಡೆದ ಜಾಥಾವನ್ನು ಬೆಳೆಗಾರರ ಸಂಘದ ಅಧ್ಯಕ್ಷ ಬಾಲಕೃಷ್ಣ ಉದ್ಘಾಟಿಸಿದರು.

ಶಿವಮೊಗ್ಗದ ಕುಲಪತಿ ಡಾ| ಎಂ.ಕೆ.ನಾಯಕ್‌ ಅಧ್ಯಕ್ಷತೆ ವಹಿಸಿದ್ದರು. ತೋಟಗಾರಿಕೆ ಆಯುಕ್ತ ಡಾ|ಬಿಎನ್‌ಎಸ್‌ ಮೂರ್ತಿ, ಡಾ| ವಿ.ಸುಂದರೇಶನ್‌, ಡಾ| ಹೋಮಿ ಚೆರಿಯನ್‌, ಡಾ| ಪಿ.ನಾರಾಯಣಸ್ವಾಮಿ, ಡಾ| ಕೆ.ಮಂಜಪ್ಪ, ಡಾ| ಟಿ.ಎಚ್‌.ಗೌಡ, ಡೀನ್‌ ಡಾ| ಎಂ.ಹನುಮಂತಪ್ಪ, ಸಹಾಯಕ ಕುಲ ಸಚಿವ ಮಣಿಕಂಠ, ಸಹಾಯಕ ಪ್ರಾಧ್ಯಾಪಕ ಸದಾಶಿವ ನಡಕೇರಿ, ಎಂ.ಎಸ್‌.ಅಶೋಕ ಇದ್ದರು.