ದಾಭೋಲ್ಕರ್‌ ಹಂತಕರಿಗೆ ಕರ್ನಾಟಕದಲ್ಲಿ ತರಬೇತಿ

ಪುಣೆ: ವಿಚಾರವಾದಿ ನರೇಂದ್ರ ದಾಭೋಲ್ಕರ್‌ ಹಂತಕರು ಕರ್ನಾಟಕ ಮತ್ತು ಮಹಾರಾಷ್ಟ್ರದ ವಿವಿಧ ಪ್ರದೇಶಗಳಲ್ಲಿ ಶೂಟಿಂಗ್‌ ತರಬೇತಿ ಪಡೆದಿದ್ದರು ಎಂದು ಪುಣೆಯ ನ್ಯಾಯಾಲಯಕ್ಕೆ ಸಿಬಿಐ ಮಾಹಿತಿ ನೀಡಿದೆ. ಶನಿವಾರ ಬಂಧಿತನಾದ ಪ್ರಮುಖ ಆರೋಪಿ ಸಚಿನ್‌ ಪ್ರಕಾಶ್‌ರಾವ್‌ ಅಂಡುರೆ ಯನ್ನು ಕೋರ್ಟ್‌ಗೆ ಹಾಜರುಪಡಿಸಿದ ಸಿಬಿಐ, 14 ದಿನಗಳ ಕಾಲ ವಶಕ್ಕೆ ಕೋರಿ ಕೋರ್ಟ್‌ಗೆ ಮನವಿ ಸಲ್ಲಿಸಿತು. ದಾಭೋಲ್ಕರ್‌ ಹತ್ಯೆಗೂ ಮುನ್ನ ಅಂಡುರೆ ಕರ್ನಾಟಕ ಮತ್ತು ಮಹಾರಾಷ್ಟ್ರದ ವಿವಿಧ ಕಡೆಗಳಲ್ಲಿ ತರಬೇತಿ ಪಡೆದಿರುವುದು ವಿಚಾರಣೆಯಿಂದ ತಿಳಿದು ಬಂದಿದೆ ಎಂದು ಸಿಬಿಐ ತಿಳಿಸಿತು. ಈ ಹಿನ್ನೆಲೆಯಲ್ಲಿ ಕೋರ್ಟ್‌, ಆ.26ರವರೆಗೆ ಅಂಡುರೆ ಯನ್ನು ಸಿಬಿಐ ವಶಕ್ಕೊಪ್ಪಿಸಿತು.

ಇದೇ ವೇಳೆ, ಅಂಡುರೆ ಬಂಧನದ ಬೆನ್ನಲ್ಲೇ ಸಿಬಿಐ ಶಿವಸೇನೆಯ ಮಾಜಿ ಕಾರ್ಪೊರೇಟರ್‌ ಶ್ರೀಕಾಂತ್‌ ಪಂಗಾರ್ಕರ್‌ರನ್ನು ವಶಕ್ಕೆ ಪಡೆದಿದೆ. ಕೊಲೆ ವೇಳೆ ಶ್ರೀಕಾಂತ್‌ ಕೂಡ ನನ್ನ ಜತೆಗಿದ್ದು ಬೈಕ್‌ ಚಲಾಯಿಸುತ್ತಿದ್ದರು ಎಂದು ಅಂಡುರೆ ಬಾಯಿಬಿಟ್ಟಿದ್ದ .