ಪಟಾಕಿ ಅನಾಹುತ: ದೇಶಾದ್ಯಂತ 14 ಬಲಿ

ನವದೆಹಲಿ: ದೀಪಾವಳಿ ಹಬ್ಬ ಆಚರಣೆ ಸಂದರ್ಭದಲ್ಲಿ ಪಟಾಕಿ ಸಿಡಿಸುವಾಗ ಅನಾಹುತಗಳು ಸಂಭವಿಸಿ ದೇಶಾದ್ಯಂತ 9 ಮಂದಿ ಬಲಿಯಾಗಿದ್ದಾರೆ.

ನೂರಾರು ಮಂದಿ ಕಣ್ಣಿಗೆ ಹಾನಿ, ಸುಟ್ಟ ಗಾಯಗಳೊಂದಿಗೆ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಪಟಾಕಿ ಹಚ್ಚುವಾಗ, ಮನೆಗಳು, ಅಂಗಡಿಗಳಿಗೆ ಬೆಂಕಿ ಹತ್ತಿಕೊಂಡು ಪ್ರತ್ಯೇಕ ಘಟನೆಗಳಲ್ಲಿ ಒಟ್ಟಾರೆ 7 ಮಂದಿ ಮೃತಪಟ್ಟಿದ್ದಾರೆ. ಆದರೆ, ದೆಹಲಿಯಲ್ಲಿ 2017ರಲ್ಲಿ ಸುಡುಮದ್ದುಗಳ ಮಾರಾಟಕ್ಕೆ ಸುಪ್ರೀಂ ಕೋರ್ಟ್‌ ನಿರ್ಬಂಧ ಹೇರಿರುವ ಹಿನ್ನೆಲೆಯಲ್ಲಿ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಹಾನಿಯ ಪ್ರಮಾಣ ಈ ಬಾರಿ ಕಡಿಮೆಯಾಗಿದೆ.

ಇನ್ನು ಒಡಿಶಾದಲ್ಲಿ ಪಟಾಕಿ ಸಂಬಂಧಿ ಘಟನೆಗಳಿಗೆ 5 ಮಂದಿ ಬಲಿಯಾಗಿದ್ದರೆ, ಪಶ್ಚಿಮ ಬಂಗಾಳದಲ್ಲಿ 2 ವರ್ಷದ ಬಾಲಕ ಸೇರಿದಂತೆ ಇಬ್ಬರು ಸಾವಿಗೀಡಾಗಿದ್ದಾರೆ. ರಾಜಸ್ಥಾನದ ಜೈಪುರದಲ್ಲಿ ಸುಟ್ಟಗಾಯಗಳು, ಕಣ್ಣಿಗೆ ಹಾನಿಯಾಗಿ 498 ಮಂದಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಚೆನ್ನೈನಲ್ಲಿ 31 ರೋಗಿಗಳು, ಹೈದರಾಬಾದ್‌ನಲ್ಲಿ 77 ಮಂದಿಗೆ ಚಿಕಿತ್ಸೆ ನೀಡಲಾಗಿದೆ.

ದೆಹಲಿಯೊಂದರಲ್ಲೇ 200 ಅಗ್ನಿ ಅನಾಹುತದ ಪ್ರಕರಣಗಳು ದಾಖಲಾಗಿವೆ.