ರಷ್ಯಾ ನಿರ್ಮಿತ ಮಿಗ್‌-29 ವಿಮಾನದಲ್ಲಿ ಬೆಂಕಿ ದುರಂತ

ಪಣಜಿ: ಗೋವಾ ರಾಜಧಾನಿ ಪಣಜಿಯಲ್ಲಿರುವ ದಾಬೋಲಿಂ ಏರ್‌ಪೋರ್ಟಲ್ಲಿ ಮಿಗ್‌-29 ಯುದ್ಧ ವಿಮಾನ ಟೇಕ್‌ಅಪ್‌ ಆಗುವ ಸಂದರ್ಭದಲ್ಲಿ ರನ್‌ ವೇಯಿಂದ ಜಾರಿದೆ. ಹೀಗಾಗಿ ಅದಕ್ಕೆ ಬೆಂಕಿ ಹತ್ತಿಕೊಂಡಿದೆ. ರಷ್ಯಾದಲ್ಲಿ ಉತ್ಪಾದನೆಯಾಗಿರುವ ಯುದ್ಧ ವಿಮಾನದಲ್ಲಿ ಇದೇ ಮೊದಲ ಬಾರಿಗೆ ಇಂಥ ಘಟನೆ ನಡೆದಿದೆ ಎಂದು ನೌಕಾಪಡೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ತರಬೇತಿ ಪಡೆಯುತ್ತಿದ್ದ ಪೈಲಟ್‌ ಅದರಿಂದ ಸುಲಭವಾಗಿ ಪಾರಾಗಿದ್ದಾರೆ. ವಿಮಾನದಲ್ಲಿ ಬೆಂಕಿ ಕಾಣಿಸಿಕೊಂಡ ತಕ್ಷಣವೇ ಅಗ್ನಿಶಾಮಕ ಅಧಿಕಾರಿಗಳು ಕಾರ್ಯಾಚರಣೆ ನಡೆಸಿ ಅದನ್ನು ನಂದಿಸಿದ್ದಾರೆ. ನೌಕಾಪಡೆ ನೆಲೆಯಲ್ಲಿಯೇ ವಿಮಾನ ನಿಲ್ದಾಣ ಇದೆ. ಈ ಘಟನೆಯಿಂದಾಗಿ ಕೆಲ ಕಾಲ ವಿಮಾನ ಹಾರಾಟಕ್ಕೆ ಅಡ್ಡಿಯುಂಟಾಗಿದೆ.