Film Screening: “ದ ಸಾಬರ್‌ಮತಿ’ ಸಿನಿಮಾ ನೋಡಿ ಭಾವುಕರಾದ ಪ್ರಧಾನಿ ನರೇಂದ್ರ ಮೋದಿ

ನವದೆಹಲಿ: ಗುಜರಾತ್‌ನ 2002ರ ಗೋಧ್ರಾ ಹತ್ಯಾ ಕಾಂಡ ಕಥಾವಸ್ತು ಹೊಂದಿರುವ “ದ ಸಾಬರ್‌ಮತಿ ರಿಪೋರ್ಟ್‌’ ಸಿನಿಮಾವನ್ನು ಪ್ರಧಾನಿ ಮೋದಿಯವರು ಸೋಮವಾರ ಸಂಸತ್‌ ಭವನದ “ಬಾಲಯೋಗಿ ಅಡಿಯೋರಿಯಂ’ನಲ್ಲಿ ವೀಕ್ಷಿಸಿದ್ದಾರೆ. ಒಂದು ಹಂತದಲ್ಲಿ ಸಿನಿಮಾದ ಕೆಲವು ದೃಶ್ಯಗಳನ್ನು ನೋಡಿ ಅವರು ಭಾವುಕರಾದರು ಎಂದು ಮೂಲಗಳು ಹೇಳಿವೆ.

ಕೇಂದ್ರ ಸಚಿವರಾದ ಅಮಿತ್‌ ಶಾ, ನಿರ್ಮಲಾ, ಅಶ್ವಿ‌ನಿ ವೈಷ್ಣವ್‌, ಗಡ್ಕರಿ, ನಡ್ಡಾ ಸೇರಿ ಪ್ರಮುಖರು ಈ ಸಂದರ್ಭದಲ್ಲಿದ್ದರು. ನಂತರ ಟ್ವೀಟ್‌ ಮಾಡಿದ ಪ್ರಧಾನಿ “ಎನ್‌ಡಿಎ ಸಂಸದರ ಜತೆಗೆ ಸಾಬರ್‌ಮತಿ ರಿಪೋರ್ಟ್‌ ಸಿನಿಮಾ ನೋಡಿದೆ. ಸಿನಿಮಾ ತಂಡದ ಪ್ರಯತ್ನ ಶ್ಲಾಘನೀಯ’ ಎಂದಿದ್ದಾರೆ. ಸಿನಿಮಾದ ಮುಖ್ಯ ಭೂಮಿಕೆಯಲ್ಲಿರುವ ವಿಕ್ರಾಂತ್‌ ಮೆಸ್ಸಿ, ನಿರ್ಮಾಪಕಿ ಏಕ್ತಾ ಕಪೂರ್‌ ತಂದೆ ಜಿತೇಂದ್ರ ಮತ್ತಿತರರು ಉಪಸ್ಥಿತರಿದ್ದರು.