ಹಾಕಿ: ಒಲಿಂಪಿಕ್ಸ್‌ ಅರ್ಹತೆಗೆ ಹೊಸ ಮಾರ್ಗ

ಹೊಸದಿಲ್ಲಿ: 2020ರ ಒಲಿಂಪಿಕ್ಸ್‌ಗೆ ಅರ್ಹತೆ ಗಳಿಸಲು ವಿಶ್ವದ ಹಾಕಿ ತಂಡಗಳಿಗೆ ಹೊಸ ಮಾರ್ಗವೊಂದನ್ನು ಅಂತಾರಾಷ್ಟ್ರೀಯ ಹಾಕಿ ಮಂಡಳಿ (ಎಫ್ಐಎಚ್‌) ತೋರಿಸಿ ಕೊಟ್ಟಿದೆ. ಹಾಕಿ ಪ್ರೊ ಲೀಗ್‌ನಲ್ಲಿ ಆಡದ ರಾಷ್ಟ್ರಗಳು 2019ರಲ್ಲಿ ನಡೆಯುವ 3 ಹಂತದ ಹಾಕಿ ಸರಣಿಯಲ್ಲಿ ಆಡಿ 2020ರ ಒಲಿಂಪಿಕ್ಸ್‌ಗೆ ಅರ್ಹತೆ ಗಳಿಸಬಹುದು. ಪ್ರೊ ಲೀಗ್‌ನಲ್ಲಿ ಭಾರತ ಕೂಡ ಆಡದಿರುವುದರಿಂದ ಅರ್ಹತೆ ಗಳಿಸಲು ಹೊಸ ದಾರಿಯೊಂದು ತೆರೆದುಕೊಂಡಿದೆ.

ಮುಂಬರುವ ಏಶ್ಯನ್‌ ಗೇಮ್ಸ್‌ನಲ್ಲಿ ಭಾರತ ಚಿನ್ನದ ಪದಕ ಗೆದ್ದರೆ ಒಲಿಂಪಿಕ್ಸ್‌ಗೆ ನೇರ‌ ಪ್ರವೇಶ ಪಡೆಯಲಿದೆ. ಇದು ಸಾಧ್ಯವಾಗದಿದ್ದರೆ 2019ರ ಮೇ-ಜೂನ್‌ನಲ್ಲಿ ನಡೆಯುವ ಈ ಕೂಟದಲ್ಲಿ ಭಾಗವಹಿಸಬಹುದು. ಒಟ್ಟು 3 ಹಾಕಿ ಸರಣಿ ಫೈನಲ್‌ಗ‌ಳು ನಡೆಯಲಿವೆ. ಒಂದು ಸರಣಿಯಲ್ಲಿ ತಲಾ 8 ತಂಡಗಳು ಆಡಲಿವೆ. ಇಲ್ಲಿ ಅಗ್ರಸ್ಥಾನ ಪಡೆದ ತಲಾ 2, ಒಟ್ಟಾರೆ 6 ತಂಡಗಳು ಒಲಿಂಪಿಕ್ಸ್‌ ಪ್ರವೇಶ ಪಡೆಯಲಿವೆ. ಹಾಕಿ ಪ್ರೊ ಲೀಗ್‌ ಮೂಲಕ 4 ತಂಡಗಳು, ವಿಶ್ವದ ಅಗ್ರ ಶ್ರೇಯಾಂಕಿತ 2 ತಂಡಗಳು ಒಲಿಂಪಿಕ್ಸ್‌ ನಲ್ಲಿ ಸ್ಪರ್ಧಿಸಲಿವೆ.