FIH: ಪ್ರಶಸ್ತಿ ಸ್ಪರ್ಧೆಯಲ್ಲಿ ಹರ್ಮನ್‌, ಶ್ರೀಜೇಶ್‌

ಲಾಸನ್ನೆ: ಭಾರತ ತಂಡದ ನಾಯಕ ಹರ್ಮನ್‌ಪ್ರೀತ್‌ ಸಿಂಗ್‌ ಅವರನ್ನು ಮಂಗಳವಾರ ಎಫ್ಐಎಚ್‌ ವರ್ಷದ ಸ್ಟಾರ್‌ ಆಟಗಾರ ಪ್ರಶಸ್ತಿಗೆ ನಾಮನಿರ್ದೇಶನ ಮಾಡಲಾಗಿದೆ. ವರ್ಷದ ಶ್ರೇಷ್ಠ ಗೋಲ್‌ಕೀಪರ್‌ ಗೌರವಕ್ಕೆ ಪಿ.ಆರ್‌. ಶ್ರೀಜೇಶ್‌ ಸ್ಪರ್ಧೆಯಲ್ಲಿದ್ದಾರೆ.

ಪ್ರಶಸ್ತಿಗೆ ನಾಮನಿರ್ದೇಶನ ಮಾಡಿದ ಆಟಗಾರರ ಪಟ್ಟಿಯನ್ನು ಅಂತಾರಾಷ್ಟ್ರೀಯ ಹಾಕಿ ಫೆಡರೇಶನ್‌ (ಎಫ್ಐಎಚ್‌) ಪ್ರಕಟಿಸಿದೆ. ಹರ್ಮನ್‌ಪ್ರೀತ್‌ ಮತ್ತು ಶ್ರೀಜೇಶ್‌ ಅವರು ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ಭಾರತದ ಅದ್ಭುತ ಅಭಿಯಾನದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

ಸ್ಟಾರ್‌ ಆಟಗಾರ ಪ್ರಶಸ್ತಿಗಾಗಿ ಹರ್ಮನ್‌ಪ್ರೀತ್‌ ಅವರು ಥಿಯರಿ ಬ್ರಿಕ್ಮನ್‌ (ನೆದರ್ಲೆಂಡ್ಸ್‌), ಜೋಯೆಪ್‌ ಡಿ ಮೊಲ್‌ (ನೆದರ್ಲೆಂಡ್ಸ್‌), ಹಾನ್ನೆಸ್‌ ಮುಲ್ಲರ್‌ (ಜರ್ಮನಿ) ಮತ್ತು ಜಾಕ್‌ ವಾಲೇಸ್‌ (ಇಂಗ್ಲೆಂಡ್‌) ಅವರೊಂದಿಗೆ ಸ್ಪರ್ಧೆಯಲ್ಲಿದ್ದಾರೆ.

ಶ್ರೀಜೇಶ್‌ ಅವರು ಸ್ಟಾರ್‌ ಗೋಲ್‌ಕೀಪರ್‌ ಪ್ರಶಸ್ತಿಯಾಗಿ ಪಿರ್ಮಿನ್‌ ಬ್ಲಾಕ್‌ (ನೆದರ್ಲೆಂಡ್ಸ್‌), ಲೂಯಿಸ್‌ ಕಾಲ್ಜಾಡೊ (ಸ್ಪೇನ್‌), ಜೀನ್‌ ಪಾಲ್‌ ಡ್ಯಾನೆಬರ್ಗ್‌ (ಜರ್ಮನಿ) ಮತ್ತು ತೋಮಸ್‌ ಸ್ಯಾಂಟಿಯಾಗೊ (ಆರ್ಜೆಂಟೀನಾ) ಅವರೊಂದಿಗೆ ಸ್ಪರ್ಧೆಯಲ್ಲಿದ್ದಾರೆ.