ಕನ್ನಡ ಚಿತ್ರರಂಗದ ಶಿವರಾಜ್‌ ಕುಮಾರ್‌ ದಂಪತಿ ಹಾಗೂ ದರ್ಶನ್‌ ತೂಗುದೀಪ ದಂಪತಿ ಅವರಿಗೆ ಮಂಗಳವಾರ ಸಂಭ್ರಮದ ದಿನ. ಈ ಇಬ್ಬರು ನಟರ ಮದುವೆ ವಾರ್ಷಿಕೋತ್ಸವೇ ಅವರ ಸಂಭ್ರಮಕ್ಕೆ ಕಾರಣ. ಸಹಜವಾಗಿಯೇ ಅಭಿಮಾನಿಗಳು ಈ ಇಬ್ಬರು ನಟರಿಗೂ ಶುಭ ಕೋರುವ ಜೊತೆಗೆ ಫ್ಯಾಮಿಲಿ ಫೋಟೋ ಶೇರ್‌ ಮಾಡಿ ಸಂಭ್ರಮಿಸಿದರು, 1986 ಮೇ 19 ರಂದು ಶಿವರಾಜ್‌ ಕುಮಾರ್‌ -ಗೀತಾ ಅವರ ಮದುವೆಯಾಗಿತ್ತು.
ಇನ್ನು,2003ರಲ್ಲಿ ದರ್ಶನ್‌ – ವಿಜಯಲಕ್ಷ್ಮೀ ದಂಪತಿ ಹಸೆಮಣೆ ಏರಿದ್ದು, ದಾಂಪತ್ಯ ಜೀವನಕ್ಕೆ ಕಾಲಿಟ್ಟು ಮಂಗಳವಾರಕ್ಕೆ 17 ವರ್ಷಗಳಾಗಿವೆ. ಪರಸ್ಪರ ಪ್ರೀತಿಸುತ್ತಿದ್ದ ದರ್ಶನ್‌ ಮತ್ತು ವಿಜಯಲಕ್ಷ್ಮೀ ಧರ್ಮಸ್ಥಳ ಶ್ರೀ ಮಂಜುನಾಥ ಸ್ವಾಮಿಯ ದೇವಸ್ಥಾನದಲ್ಲಿ ಕುಟುಂಬಸ್ಥರು, ಸ್ನೇಹಿತರು ಹಾಗೂ ಸಿನಿ ತಾರೆಯರ ಸಮ್ಮುಖದಲ್ಲಿ ಸರಳ ವಿವಾಹವಾಗಿದ್ದರು.
ಇನ್ನು ವಿವಾಹ ವಾರ್ಷಿಕೋತ್ಸವದ ಸಂದರ್ಭದಲ್ಲಿರುವ ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಹಾಗೂ ವಿಜಯಲಕ್ಷ್ಮೀ ದಂಪತಿಗೆ ಸ್ಯಾಂಡಲ್‌ವುಡ್‌ನ ಹಲವು ಗಣ್ಯರು ಮತ್ತು ಸ್ನೇಹಿತರು, ಬಂಧುಗಳಿಂದ ಕರೆ ಹಾಗೂ ಮೆಸೇಜ್‌ಗಳ ಮೂಲಕ ಶುಭಾಶಯಗಳ ಮಹಾಪೂರವೇ ಹರಿದು ಬಂದಿದೆ. ಅಲ್ಲದೆ ತಮ್ಮ ನೆಚ್ಚಿನ ನಟನ ವಿವಾಹ ವಾರ್ಷಿಕೋತ್ಸವಕ್ಕೆ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲೇ ಶುಭ ಕೋರುತ್ತಿದ್ದು, ಟ್ವಿಟ್ಟರ್‌, ಇನ್‌ಸ್ಟಾಗ್ರಾಮ್‌ ಹಾಗೂ ಫೇಸ್‌ಬುಕ್‌ ಗಳಲ್ಲಿ ಪೋಸ್ಟ್‌ ಹಾಕುವ ಮೂಲಕ ಶುಭಾಶಯ ತಿಳಿಸಿದ್ದಾರೆ.
ಈ ಮೂಲಕ ದೂರದಿಂದಲೇ ಸಂತಸ ವ್ಯಕ್ತಪಡಿಸಿದ್ದಾರೆ. ಶಿವಣ್ಣ ಅಭಿಮಾನಿ ಸಂಘದಿಂದ ಸೀರೆ-ಬಳೆ ಶಿವರಾಜ್‌ ಕುಮಾರ್‌ ಅವರ ಅಭಿಮಾನಿ ಸಂಘ ಅವರ ವಿವಾಹ ವಾರ್ಷಿಕೋತ್ಸವವನ್ನು ಆಚರಿಸಿದೆ. ಅಖೀಲ ಕರ್ನಾಟಕ ಡಾ.ಶಿವರಾಜ್‌ ಕುಮಾರ್‌ ಸೇನಾ ಸಮಿತಿ ಹಾಗೂ ಗಂಡುಗಲಿ ಡಾ. ಶಿವರಾಜ್‌ ಕುಮಾರ್‌ ಅಭಿಮಾನಿ ಸಂಘಗಳು ಮಂಗಳವಾರ ಬಡ ಹೆಣ್ಣು ಮಕ್ಕಳಿಗೆ ಸೀರೆ, ಅರಿಶಿನ ಕುಂಕುಮ, ಬಳೆ ಮತ್ತು ಅಕ್ಕಿಯನ್ನು ವಿತರಿಸಿತು.
