ಫೇಸ್‌ಬುಕ್‌ನಲ್ಲಿ ಲಿಬ್ರಾ ಕಾಯ್ನ!

ಸ್ಯಾನ್‌ ಫ್ರಾನ್ಸಿಸ್ಕೋ: ಬಿಟ್‌ಕಾಯ್ನ ರೀತಿ ಕ್ರಿಪ್ಟೋಕರೆನ್ಸಿ ಕ್ಷೇತ್ರಕ್ಕೂ ಇಳಿದಿರುವ ಫೇಸ್‌ಬುಕ್‌, ಲಿಬ್ರಾ ಎಂಬ ಹೆಸರಿನ ಕ್ರಿಪ್ಟೋಕರೆನ್ಸಿಯನ್ನು ಬಿಡುಗಡೆ ಮಾಡಿದೆ. ಇದರಿಂದಾಗಿ ಸ್ನೇಹಿತರಿಗೆ ಮೆಸೆಂಜರ್‌ನಲ್ಲೇ ಹಣ ಕಳುಹಿಸಬಹುದು. ಅಷ್ಟೇ ಅಲ್ಲ, ಹಲವು ಸೇವೆಗಳನ್ನೂ ಈ ಲಿಬ್ರಾ ಕಾಯ್ನ ಬಳಸಿ ಪಡೆಯಬಹುದು. ಮಂಗಳವಾರ ಅಮೆರಿಕದ ಸ್ಯಾನ್‌ ಫ್ರಾನ್ಸಿಸ್ಕೋದಲ್ಲಿ ಇದನ್ನು ಬಿಡುಗಡೆ ಮಾಡಲಾಗಿದ್ದು, ಇದು ಬಿಟ್‌ಕಾಯ್ನ ರೀತಿಯೇ ಕೆಲಸ ಮಾಡಲಿದೆ.

ಮುಂದಿನ ವರ್ಷದಿಂದ ಅಧಿಕೃತವಾಗಿ ಬಿಡುಗಡೆಯಾಗಲಿದ್ದು, ಸದ್ಯ ಪ್ರಾಯೋಗಿಕವಾಗಿ ಚಾಲ್ತಿಗೆ ಬರಲಿದೆ. ಮಾಸ್ಟರ್‌ ಕಾರ್ಡ್‌, ವೀಸಾ, ಉಬರ್‌ ಸೇರಿದಂತೆ 28ಕ್ಕೂ ಹೆಚ್ಚು ಸಂಸ್ಥೆಗಳು ಲಿಬ್ರಾ ರೂಪಿಸುವಲ್ಲಿ ಕೈಜೋಡಿಸಿವೆ. ಈ ಕ್ರಿಪ್ಟೋ ಕರೆನ್ಸಿಯನ್ನು ಫೇಸ್‌ಬುಕ್‌ ಬಳಸುವ ಯಾರು ಬೇಕಾದರೂ ವಿನಿಮಯ ಮಾಡಬಹುದಾದ ಸೌಲಭ್ಯವನ್ನು ಕಲ್ಪಿಸಲಾಗುತ್ತದೆ.