ಎಫ್16: ಮಾಹಿತಿ ಕೇಳಿದ ಅಮೆರಿಕ

ಅಮೆರಿಕ ನೀಡಿದ ಎಫ್ 16 ಯುದ್ಧ ವಿಮಾನಗಳನ್ನು ಭಾರತದ ಮೇಲೆ ದಾಳಿ ನಡೆಸುವ ಉದ್ದೇಶಕ್ಕೆ ಬಳಸಿದ ಪಾಕಿಸ್ಥಾನಕ್ಕೆ ಈಗ ನಡುಕ ಶುರುವಾಗಿದೆ. ಒಪ್ಪಂದ ಉಲ್ಲಂ ಸಿ ಈ ಯುದ್ಧ ವಿಮಾನಗಳನ್ನು ಭಾರತದ ಗಡಿಯಲ್ಲಿ ಬಳಸಿದ್ದಕ್ಕೆ ವಿವರಣೆ ಹಾಗೂ ಹೆಚ್ಚಿನ ಮಾಹಿತಿ ನೀಡುವಂತೆ ಪಾಕಿಸ್ಥಾನವನ್ನು ಅಮೆರಿಕ ಕೇಳಿದೆ. ಎಫ್ 16 ಯುದ್ಧ ವಿಮಾನವನ್ನು ಬಳಸಿಲ್ಲ ಎಂದು ಪಾಕಿಸ್ಥಾನ ನೀಡಿದ್ದ ಹೇಳಿಕೆಗೆ ತಕ್ಕ ಸಾಕ್ಷ್ಯಗಳನ್ನು ಭಾರತ ಈಗಾಗಲೇ ನೀಡಿದೆ. ಎಫ್ 16 ಗಳಲ್ಲಿ ವಿಶೇಷವಾಗಿ ಬಳಸಲಾಗುವ ಅಮ್‌ರಾಮ್‌ ಎಂಬ ಸಾಧನಗಳು ಭಾರತೀಯ ಗಡಿ ಪ್ರದೇಶದಲ್ಲಿ ಲಭ್ಯವಾಗಿದ್ದವು. ಇದರ ವಿವರಗಳನ್ನು ಅಮೆರಿಕಕ್ಕೆ ಭಾರತ ನೀಡಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಅಮೆರಿಕದ ವಿದೇಶಾಂಗ ಸಚಿವಾಲಯದ ವಕ್ತಾರರು, ಈ ವರದಿಗಳ ಬಗ್ಗೆ ನಮಗೆ ಮಾಹಿತಿಯಿದೆ ಮತ್ತು ಹೆಚ್ಚಿನ ವಿವರಗಳನ್ನು ನಾವು ನಿರೀಕ್ಷಿಸುತ್ತಿದ್ದೇವೆ ಎಂದಿದ್ದಾರೆ. ಮೂಲಗಳ ಪ್ರಕಾರ ಒಪ್ಪಂದಗಳ ಉಲ್ಲಂಘನೆಯ ಬಗ್ಗೆ  ಕಠಿನವಾಗಿ ಮೇಲ್ವಿಚಾರಣೆ ನಡೆಸಲಾಗುತ್ತದೆ. ಅಲ್ಲದೆ ದುರ್ಬಳಕೆ ಆರೋಪವನ್ನು ಗಂಭೀರವಾಗಿ ಪರಿಗಣಿಸುತ್ತದೆ. ಮೂಲಗಳ ಪ್ರಕಾರ ಎಫ್ 16 ಯುದ್ಧ ವಿಮಾನಗಳನ್ನು ಪಾಕಿಸ್ಥಾನವು ತನ್ನ ದೇಶದೊಳಗಿನ ಉಗ್ರರ ದಮನಕ್ಕೆ ಬಳಸಬೇಕು. ಇತರ ದೇಶಗಳ ಮೇಲೆ ದಾಳಿ ಅಥವಾ ಇತರ ಉದ್ದೇಶಕ್ಕೆ ಬಳಸುವುದಾದರೆ ಅಮೆರಿಕದ ಅನುಮತಿ ಪಡೆಯಬೇಕು ಎಂಬುದೂ ಸೇರಿದಂತೆ ಹಲವು ನಿರ್ಬಂಧಗಳನ್ನು ವಿಧಿಸಲಾಗಿದೆ. ಆದರೆ ಭಾರತದ ಮೇಲೆ ದಾಳಿಗೆ ಎಫ್16 ಬಳಸಿರುವುದು ಸಾಬೀತಾದರೆ ಪಾಕಿಸ್ಥಾನದ ವಿರುದ್ಧ ಅಮೆರಿಕ ಕೈಗೊಳ್ಳುವ ಕ್ರಮ ಯಾವುದು ಎಂಬುದು ಕುತೂಹಲ ಮೂಡಿಸಿದೆ.