ನಾಳೆ ಗೋವಾ ಸಂಪುಟ ಸೇರುವ ಮಾಜಿ ಕಾಂಗ್ರೆಸ್‌ ಶಾಸಕ ರಾಣೆ

ಪಣಜಿ : ಈಚೆಗೆ ಕಾಂಗ್ರೆಸ್‌ ಪಕ್ಷವನ್ನು ತೊರೆದು ಬಿಜೆಪಿಗೆ ಸೇರಿದ್ದ ಮಾಜಿ ಕಾಂಗ್ರೆಸ್‌ ಶಾಸಕ ವಿಶ್ವಜಿತ್‌ ರಾಣೆ ಅವರನ್ನು ನಾಳೆ ಮುಖ್ಯಮಂತ್ರಿ  ಮನೋಹರ್‌ ಪರ್ರೀಕರ್‌ ಅವರ ಸಚಿವ ಸಂಪುಟಕ್ಕೆ ಸೇರಿಸಿಕೊಳ್ಳುವ ನಿರೀಕ್ಷೆ ಇದೆ. 

ಪರ್ರೀಕರ್‌ ಅವರು ನಾಳೆ ಇಬ್ಬರನ್ನು ತಮ್ಮ ಸಚಿವ ಸಂಪುಟಕ್ಕೆ ಸೇರಿಸಿಕೊಳ್ಳುವುದಿದ್ದು ಆ ಪೈಕಿ ರಾಣೆ ಒಬ್ಬರೆಂದು ಈಗಲೇ ಗೊತ್ತಾಗಿದೆ. ಆದರೆ ಇನ್ನೊಬ್ಬ ವ್ಯಕ್ತಿ ಯಾರೆಂದು ಇನ್ನೂ ಗೊತ್ತಾಗಿಲ್ಲ ಎಂದು ಮೂಲಗಳು ತಿಳಿಸಿವೆ. 

ಕಳೆದ ಮಾರ್ಚ್‌ 14ರಂದು ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದ ಪರ್ರೀಕರ್‌ ಅವರ ಸಂಪುಟದಲ್ಲಿ ಈಗಾಗಲೇ 9 ಮಂದಿ ಸಚಿವರಿದ್ದಾರೆ. 

ರಾಣೆ ಅವರು ಕಾಂಗ್ರೆಸ್‌ ಟಿಕೆಟ್‌ನಲ್ಲಿ ವಾಲ್‌ಪೋಲ್‌ ಕ್ಷೇತ್ರದಿಂದ ಚುನಾಯಿತರಾಗಿದ್ದರು. ಆದರೆ ಏಕೈಕ ದೊಡ್ಡ ಪಕ್ಷವಾಗಿ ಮೂಡಿಬಂದ ಹೊರತಾಗಯೂ ಸರಕಾರ ರಚಿಸುವಲ್ಲಿ ಕಾಂಗ್ರೆಸ್‌ ಯಾವುದೇ ತರಾತುರಿ ತೋರಿಸದೆ ಇದ್ದುದರಿಂದ ನಿರಾಶರಾಗಿದ್ದ ರಾಣೆ ತಮ್ಮ ಶಾಸಕತ್ವಕ್ಕೆ ರಾಜೀನಾಮೆ ನೀಡಿದ್ದರು.