ಸುಯೆಜ್‌ ಕಾಲುವೆಯಲ್ಲಿ ಸಿಲುಕಿದ್ದ ಎವರ್‌ಗಿವನ್ ಹಡಗಿಗೆ 6755 ಕೋಟಿ ರೂ.ದಂಡ!

ಕೈರೊ: ಸುಯೆಜ್‌ ಕಾಲುವೆಯಲ್ಲಿ ಬರೋಬ್ಬರಿ ಒಂದು ವಾರ ಸಿಲುಕಿಕೊಂಡು, ಕದಲದೆ ನಿಂತಿದ್ದ ದೈತ್ಯ ಹಡಗು “ಎಂ.ವಿ. ಎವರ್‌ ಗಿವನ್‌’ನ ಮಾಲಕನಿಗೆ ಬರೋಬ್ಬರಿ 6755.10 ಕೋಟಿ ರೂ. (900 ಮಿಲಿಯನ್‌ ಡಾಲರ್‌) ದಂಡ ವಿಧಿಸಿ ಸುಯೆಜ್‌ ಕಾಲುವೆ ಪ್ರಾಧಿಕಾರ ಆದೇಶ ಹೊರಡಿಸಿದೆ. ದಂಡ ಪಾವತಿ ಮಾಡುವವರೆಗೂ ನೌಕೆಯನ್ನು ಬಿಡುಗಡೆ ಮಾಡುವುದಿಲ್ಲ ಎಂದೂ ಹೇಳಿದೆ.

ಮಾ.23ರಂದು ಕಾಲುವೆಯ ಒಂದು ಬದಿಯ ಕೆಸರಿನಲ್ಲಿ ಹೂತು, ಚಲಿಸದೆ ನಿಂತಿದ್ದ ಈ ಹಡಗಿನ ಕಾರಣಕ್ಕಾಗಿ ಭಾರೀ ಟ್ರಾಫಿಕ್‌ ಜಾಮ್‌ ಸೃಷ್ಟಿಯಾಗಿತ್ತು. 420ಕ್ಕೂ ಅಧಿಕ ಹಡಗುಗಳು ಸಾಲುಗಟ್ಟಿ ನಿಂತಿದ್ದವು. ಈಜಿಪ್ಟ್ಗೆ ಇದರಿಂದ ಪ್ರತೀನಿತ್ಯ 90ರಿಂದ 112 ಕೋಟಿ ರೂ.ಗಳಷ್ಟು ನಷ್ಟವಾಗಿತ್ತು. ಅಲ್ಲದೆ ಹಡಗನ್ನು ಸಂಚರಿಸುವಂತೆ ಮಾಡುವಲ್ಲಿ ಈಜಿಪ್ಟ್ ರಕ್ಷಣ ಸಿಬಂದಿ ಸಾಕಷ್ಟು ಶ್ರಮ ಹಾಕಿದ್ದರು. ಈ ನಡುವೆ ಕಾಲುವೆ ನಿರ್ವಹಣ ವೆಚ್ಚ ಸಹಿತ ಹಲವು ವೆಚ್ಚಗಳನ್ನು “ಎಂ.ವಿ. ಎವರ್‌ ಗಿವನ್‌’ ಕಂಪೆನಿ ಭರಿಸಬೇಕು ಎಂದು ಸುಯೇಜ್‌ ಕಾಲುವೆ ಪ್ರಾಧಿಕಾರ ಮುಖ್ಯಸ್ಥ ಒಸಾಮಾ ರಾಬೀ ತಿಳಿಸಿದ್ದಾರೆ.