ಸಂಜೆಗತ್ತಲ ಕಥೆ ಹೇಳುವ ಛಾಯಾಚಿತ್ರಗಳು

ಬೆಂಗಳೂರು: ಕಪ್ಪು-ಬಿಳುಪಿನ ಬಣ್ಣವನ್ನು ಮೈಗೆ ಮೆತ್ತಿಕೊಂಡಿರುವ ಆ ಛಾಯಾಚಿತ್ರಗಳು  ನೋಡುಗರಿಗೆ ಕೃಷ್ಣರಾಜೇಂದ್ರ ಮಾರುಕಟ್ಟೆಯ ಸಂಜೆಯ ಬದುಕಿನ ಬವಣೆ ಬಿಚ್ಚಿಡುತ್ತವೆ. ಕತ್ತಲೆಯೊಳಗಿನ ಬೆಳಕಿನಾಟದಲ್ಲಿ ಬೆರಗು ಮೂಡಿಸುತ್ತವೆ. ಮಾರುಕಟ್ಟೆಯಲ್ಲಿ ರಾತ್ರಿ ವೇಳೆ ಸ್ಕೂಟರ್‌, ಆಟೋ ಮತ್ತು ಕಾರ್‌ಗಳ ಹೊಮ್ಮಿಸುವ ಬೆಳಕಿನಲ್ಲಿ ಸೆರೆಯಾಗಿರುವ ಆ ಚಿತ್ರಗಳು ಕೆಲ ಕ್ಷಣ, ಮಾಜಿ ಮುಖ್ಯ ಮಂತ್ರಿ ಎಸ್‌.ಎಂ.ಕೃಷ್ಣ ಅವರನ್ನು ಕಾಲೇಜು ದಿನಗಳತ್ತ ಕರೆದೊಯ್ಯುವಲ್ಲಿ ಸಫ‌ಲವಾದವು.

ನಗರದ ಚಿತ್ರಕಲಾ ಪರಿಷತ್‌ನಲ್ಲಿ ಹಿರಿಯ ಛಾಯಾಗ್ರಾಹಕ ಕೆ.ವೆಂಕಟೇಶ್‌ ಅವರ ಕ್ಯಾಮರಾ ಕಣ್ಣಿನಲ್ಲಿ ಸೆರೆಯಾಗಿರುವ ಕೆ.ಆರ್‌.ಮಾರುಕಟ್ಟೆ ಮತ್ತು ಸುತ್ತಲ ವಾತಾವರಣದ ಚಿತ್ರಗಳು ರೈತರ ಮತ್ತು ಮಾರಾಟಗಾರರ ದುಡಿಮೆಯ ಬದುಕಿನ ನೂರಾರು ಕಥೆಗಳನ್ನು ತೆರೆದಿಟ್ಟಿವೆ.

ಸೋಮವಾರದಿಂದ ಆರಂಭವಾದ ಮೂರು ದಿನಗಳ “ಕೆ.ಆರ್‌.ಮಾರುಕಟ್ಟೆಯಲ್ಲಿ ಕತ್ತಲೆಯೊಡನೆ ಬೆಳಕಿನಾಟ’ ಛಾಯಾಚಿತ್ರ ಪ್ರದರ್ಶನವನ್ನು ಉದ್ಘಾಟಿಸಲು ಆಗಮಿಸಿದ್ದ ಮಾಜಿ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಅವರು, ಆ ಫೋಟೋಗಳನ್ನು ಬೆರಗು ಗಣ್ಣಿನಿಂದಲೇ ದಿಟ್ಟಿಸಿ, ಬೆಂಗಳೂರಿನ ಕಾನೂನು ಕಾಲೇಜಿನಲ್ಲಿ ಕಲಿಯುತ್ತಿದ್ದ ದಿನಗಳತ್ತ ಒಮ್ಮೆಲೆ ಜಾರಿದರು.

ನನ್ನ ಅಚ್ಚುಮೆಚ್ಚಿನ ಶೋ ರೂಂ ಅಲ್ಲಿತ್ತು: “ಇದು, ಕೆ.ಆರ್‌.ಮಾರುಕಟ್ಟೆಯ ಹೃದಯ ಭಾಗವಾ? ಈಗಲೂ ಇದು ಹೀಗೆ ಇದೆಯಾ? ಮಾರುಕಟ್ಟೆಯ ನಾಮಫ‌ಲಕದಲ್ಲಿ ಯಾವ ಇಸ್ವಿಯಲ್ಲಿ ನಿರ್ಮಾಣವಾಯ್ತು ಎಂಬುವುದರ ನಮೂದಿಲ್ಲ. ಕೆ.ಆರ್‌.ಮಾರುಕಟ್ಟೆಯಲ್ಲಿ ಒಂದು ಬಾಟ ಶೋ ರೂಂ ಇತ್ತು. ಈಗಲೂ ಅದು ಅಲ್ಲೇ ಇಲ್ಲಿರಬಹುದು.

ಕಾನೂನು ಕಾಲೇಜಿನಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದ ವೇಳೆ ಅಲ್ಲಿ ಶೂ, ಸಾಕ್ಸ್‌, ಚಪ್ಪಲಿ ಸೇರಿದಂತೆ ಇನ್ನಿತರ ಪರಿಕರ ಖರೀದಿಸುತ್ತಿದ್ದೆ. ಆಗ ಅದು ನನ್ನ ಅಚ್ಚುಮೆಚ್ಚಿನ ತಾಣ’ ಎಂದು ಹಳೆಯ ಘಟನೆಗಳನ್ನು ಎಸ್‌.ಎಂ.ಕೃಷ್ಣ ಮೆಲಕು ಹಾಕಿದರು. ಛಾಯಾಚಿತ್ರ ಪ್ರದರ್ಶನವನ್ನು ಒಂದು ಸುತ್ತು ಹಾಕಿದ ಅವರು, ಅಬ್ಟಾ ಒಂದು ಕ್ಷಣ ಹಳೇ ದಿನಗಳೇ ಕಣ್ಮುಂದೆ ಬಂದು ಹೋದವು ಎಂದು ಮುಗುಳ್ನಕ್ಕರು.

ಕಾಲ ಬದಲಾದಂತೆ ರಸ್ತೆಯ ಆಕಾರ, ಗಾತ್ರ ಬದಲಾಗಿದೆ. ಜನಸಂಖ್ಯೆ ಹೆಚ್ಚಾಗುತ್ತಲೇ ಇರುತ್ತದೆ. ಹೀಗಾಗಿ ಕೃಷ್ಣರಾಜೇಂದ್ರ ಮಾರುಕಟ್ಟೆಯು ವ್ಯಾಪಾರ ವಹಿವಾಟು ಸೇರಿದಂತೆ  ಹಲವು ರೀತಿಯಲ್ಲಿ ಸಾಕಷ್ಟು ಬದಲಾಗಿದೆ. ವ್ಯಾಪಾರ ಸೇರಿದಂತೆ ಹಲವು ವಿಚಾರಗಳಲ್ಲಿ ಗಮನ ಸೆಳೆದಿರುವ ಈ ಮಾರುಕಟ್ಟೆಗೆ ಮೂಲಭೂತ ಸೌಕರ್ಯಕಲ್ಪಿಸುವತ್ತ ಪಾಲಿಕೆ ಮತ್ತು ಸರ್ಕಾರ ಗಮನ ಹರಿಸಬೇಕು ಎಂದರು.

ಮೂಲ ಸೌಕರ್ಯಕ್ಕೆ ಒತ್ತು ನೀಡಬೇಕು: ಇದೇ ವೇಳೆ ಮಾತನಾಡಿದ ಎಸ್‌.ಕೃಷ್ಣ, ನಾನು ಮುಖ್ಯ ಮಂತ್ರಿಯಾಗಿದ್ದ ಕಾಲದಲ್ಲಿ ಐಟಿ-ಬಿಟಿ ಕಂಪನಿಗಳು ಬೆಂಗಳೂರಿನತ್ತ ಮುಖ ಮಾಡಿದವು. ಹೀಗಾಗಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬೆಂಗಳೂರು ಸಿಲಿಕಾನ್‌ ಸಿಟಿ ಎಂಬ ಹಿರಿಮೆ ಪಡೆದುಕೊಂಡಿದೆ.

ಇದೇ “ಟ್ರೆಂಡ್‌’ ಎಷ್ಟು ದಿನ ಇರುತ್ತೆ?. ಹೀಗಾಗಿ ಇದನ್ನು ಮತ್ತಷ್ಟು ಬೆಳಸುವ ನಿಟ್ಟಿನಲ್ಲಿ ಮೂಲ ಸೌಕರ್ಯ ಅಭಿವೃದ್ಧಿಗೆ ಸರ್ಕಾರ ಒತ್ತು ನೀಡಬೇಕು ಎಂದರು. ಸರ್ಕಾರಕ್ಕೆ ಒಂದು ಮಿತಿ ಇರುತ್ತದೆ. ಅದನ್ನು ಮೀರಿ ಎನನ್ನೂ ಮಾಡಲಾಗದು. ಈ ಹಿನ್ನೆಲೆಯಲ್ಲಿ  ಸಾರ್ವಜನಿಕರು ಮತ್ತು ಬಂಡವಾಳದಾರರು ನಗರವನ್ನು ಅಭಿವೃದ್ಧಿ ಪಡಿಸುವತ್ತ ಗಮನ ಹರಿಸಬೇಕು.

ಬೆಂಗಳೂರು ಮೆಟ್ರೊ ಬಗ್ಗೆ ನಾನು ಕಾಳಜಿ ತೋರಿದೆ. ಹೀಗಾಗಿ ಶ್ರೀಧರನ್‌ ಅವರನ್ನು ಬೆಂಗಳೂರಿಗೆ ಕರೆತಂದೆ. ಮೆಟ್ರೊ ಬಗ್ಗೆ ಶ್ರೀಧರನ್‌ ಅವರು ಸಾಕಷ್ಟು ಮುತವರ್ಜಿ ತೋರಿದರು. ಬೆಂಗಳೂರು ಮತ್ತಷುc ಬೆಳೆಯುತ್ತಿದ್ದು, ಮೂಲ ಸೌಕರ್ಯ ಕಲ್ಪಿಸುವತ್ತ ಗಮನ ಹರಿಸಬೇಕು ಎಂದರು. ಈ ವೇಳೆ ಕರ್ನಾಟಕ ಲಲಿತಕಲಾ ಅಕಾಡೆಮಿ ಅಧ್ಯಕ್ಷೆ ಪ್ರೊ.ಎಂ.ಜೆ.ಕಮಲಾಕ್ಷಿ ಮತ್ತಿತರರು ಉಪಸ್ಥಿತರಿದ್ದರು.

ಸಂಜೆ ವೇಳೆ ಸತತ ಹದಿನೈದು ದಿನಗಳ ಕಾಲ, ನಗರದ ಕೆ.ಆರ್‌.ಮಾರುಕಟ್ಟೆಯ ಮೇಲ್ಸೇತುವೆ ಮೇಲೆ ಕುಳಿತು ಈ ಫೋಟೋಗಳನ್ನು ಸೆರೆಹಿಡಿದೆ. ಕತ್ತಲಿನಲ್ಲಿ ವಾಹನಗಳು ಹೊಮ್ಮಿಸುವ ಬೆಳಕಿನಲ್ಲಿ ಚಿತ್ರಗಳನ್ನು ಸೆರೆಹಿಡಿಯುವುದೇ ಮನಸ್ಸಿಗೆ ಹಿತ.
-ಕೆ.ವೆಂಕಟೇಶ್‌,ಛಾಯಾಗ್ರಾಹಕ