ಟಿ20: ಇಂಗ್ಲೆಂಡ್‌ ವಿರುದ್ಧ ಆಫ್ರಿಕಾಕ್ಕೆ ರೋಚಕ 3 ರನ್‌ ಗೆಲುವು

ಟಾಂಟನ್‌: ದೊಡ್ಡ ಮೊತ್ತವನ್ನು ಅಮೋಘ ರೀತಿಯಲ್ಲೇ ಬೆನ್ನಟ್ಟಿದರೂ ಕೊನೆಯ ಹಂತದಲ್ಲಿ ಒತ್ತಡಕ್ಕೆ ಸಿಲುಕಿದ ಇಂಗ್ಲೆಂಡ್‌, ಶುಕ್ರವಾರದ 2ನೇ ಟಿ20 ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾಕ್ಕೆ 3 ರನ್ನುಗಳಿಂದ ಶರಣಾಗಿದೆ. 

ಇದರೊಂದಿಗೆ ಸರಣಿ 1-1 ಸಮಬಲಕ್ಕೆ ಬಂದಿದ್ದು, ಭಾನುವಾರದ ಅಂತಿಮ ಪಂದ್ಯದ ಕುತೂಹಲ ತೀವ್ರಗೊಂಡಿದೆ. ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ದಕ್ಷಿಣ ಆಫ್ರಿಕಾ 8 ವಿಕೆಟಿಗೆ 174ರಷ್ಟು ದೊಡ್ಡ ಮೊತ್ತ ಪೇರಿಸಿದರೆ, ಇಂಗ್ಲೆಂಡ್‌ 6 ವಿಕೆಟಿಗೆ 171 ರನ್‌ ಮಾಡಿ ಗೆಲುವನ್ನು ಸ್ವಲ್ಪದರಲ್ಲೇ ಕಳೆದುಕೊಂಡಿತು. ಸಾಕಷ್ಟು ವಿಕೆಟ್‌ಗಳು ಕೈಲಿದ್ದರೂ ಅಂತಿಮ ಓವರಿನಲ್ಲಿ 12 ರನ್‌ ತೆಗೆಯುವ ಸವಾಲನ್ನು ನಿಭಾಯಿಸಲು ಆತಿಥೇಯರಿಂದ ಸಾಧ್ಯವಾಗಲಿಲ್ಲ. ಜಾಸನ್‌ ರಾಯ್‌-ಜಾನಿ ಬೇರ್‌ಸ್ಟೊ 2ನೇ ವಿಕೆಟಿಗೆ 11.4 ಓವರ್‌ಗಳಿಂದ 110 ರನ್‌ ಪೇರಿಸಿ ಗೆಲುವಿನ ಎಲ್ಲ ಸಾಧ್ಯತೆಯನ್ನೂ ತೆರೆದಿರಿಸಿದ್ದರು. ಆದರೆ 14ನೇ ಓವರ್‌ ಬಳಿಕ ಆಫ್ರಿಕಾ ಬೌಲರ್‌ಗಳ ಕೈ ಮೇಲಾಯಿತು.