Seamer Ollie Robinson: ಓವರಿಗೆ 43 ರನ್‌ ಕೊಟ್ಟ ಇಂಗ್ಲೆಂಡ್ ಬೌಲರ್ !

ಬ್ರಿಗ್ಟನ್‌ (ಇಂಗ್ಲೆಂಡ್‌): ಇಂಗ್ಲೆಂಡ್‌ ಸೀಮರ್‌ ಓಲೀ ರಾಬಿನ್ಸನ್‌ ಕೌಂಟಿ ಚಾಂಪಿಯನ್‌ಶಿಪ್‌ ಪಂದ್ಯವೊಂದರಲ್ಲಿ ಓವರಿಗೆ 43 ರನ್‌ ನೀಡಿ ಪ್ರಥಮ ದರ್ಜೆ ಕ್ರಿಕೆಟಿನ 2ನೇ ದುಬಾರಿ ಬೌಲರ್‌ ಎನಿಸಿದ್ದಾರೆ.

ಸಸೆಕ್ಸ್‌ ಪರ ಆಡುತ್ತಿರುವ ರಾಬಿನ್ಸನ್‌, ಲೀಸ್ಟೆರ್‌ಶೈರ್‌ ಕೌಂಟಿ ಎದುರಿನ ಡಿವಿಷನ್‌-2 ಪಂದ್ಯದ ವೇಳೆ ಈ ದುಬಾರಿ ಓವರ್‌ ಎಸೆದರು. ಇದರಲ್ಲಿ 3 ನೋಬಾಲ್‌ ಸೇರಿತ್ತು. ಬ್ಯಾಟರ್‌ ಲೂಯಿಸ್‌ ಕಿಂಬರ್‌ ಮೂರೂ ನೋಬಾಲ್‌ಗ‌ಳನ್ನು ಸಿಕ್ಸರ್‌ಗೆ ಬಡಿದಟ್ಟಿದ್ದರಿಂದ ಒಟ್ಟು 43 ರನ್‌ ಹರಿದು ಬಂತು.

ಪ್ರಥಮ ದರ್ಜೆ ಕ್ರಿಕೆಟಿನ ದುಬಾರಿ ಓವರ್‌ ಎಸೆದವರು ನ್ಯೂಜಿಲ್ಯಾಂಡ್‌ನ‌ ಮಾಜಿ ಬೌಲರ್‌ ಬರ್ಟ್‌ ವಾನ್ಸ್‌. 1989-1990ರ ವೆಲ್ಲಿಂಗ್ಟನ್‌-ಕ್ಯಾಂಟರ್‌ಬರಿ ನಡುವಿನ “ಶೆಲ್‌ ಟ್ರೋಫಿ’ ಪಂದ್ಯದ ವೇಳೆ ಇವರ ಓವರ್‌ ಒಂದರಲ್ಲಿ 77 ರನ್‌ ಸೋರಿ ಹೋಗಿತ್ತು. ಇದರಲ್ಲಿ 17 ನೋಬಾಲ್‌ಗ‌ಳಿದ್ದವು!