Harry Brook ಹೆಗಲಿಗೆ ಇಂಗ್ಲೆಂಡ್‌ ನಾಯಕತ್ವ

ಲಂಡನ್‌: ಮಧ್ಯಮ ಕ್ರಮಾಂಕದ ಬ್ಯಾಟರ್‌ ಹ್ಯಾರಿ ಬ್ರೂಕ್‌ ಮೊದಲ ಸಲ ಇಂಗ್ಲೆಂಡ್‌ ತಂಡವನ್ನು ಮುನ್ನಡೆಸುವ ಅವಕಾಶ ಪಡೆದಿದ್ದಾರೆ. ಪ್ರವಾಸಿ ಆಸ್ಟ್ರೇಲಿಯ ವಿರುದ್ಧದ 3 ಪಂದ್ಯಗಳ ಏಕದಿನ ಸರಣಿಯಿಂದ ಜಾಸ್‌ ಬಟ್ಲರ್‌ ಬೇರ್ಪಟ್ಟ ಕಾರಣ ಬ್ರೂಕ್‌ ಅವರನ್ನು ನಾಯಕರನ್ನಾಗಿ ನೇಮಿಸಲಾಗಿದೆ.

ಗಾಯಾಳು ಜಾಸ್‌ ಬಟ್ಲರ್‌ ಆಸೀಸ್‌ ಎದುರಿನ ಟಿ20 ಸರಣಿಯಲ್ಲೂ ಆಡಿರಲಿಲ್ಲ. ಇವರ ಗೈರಲ್ಲಿ ಲಿಯಮ್‌ ಲಿವಿಂಗ್‌ಸ್ಟೋನ್‌ ಅವರಿಗೆ ಏಕದಿನ ತಂಡದಲ್ಲಿ ಮರಳಿ ಅವಕಾಶ ಲಭಿಸಿದೆ.

ಹ್ಯಾರಿ ಬ್ರೂಕ್‌ ಈವರೆಗೆ ಕೇವಲ 15 ಏಕದಿನ ಪಂದ್ಯಗಳನ್ನಾಡಿದ್ದಾರೆ. 3 ಅರ್ಧ ಶತಕ ಸೇರಿದಂತೆ 407 ರನ್‌ ಗಳಿಸಿದ್ದಾರೆ.ಸರಣಿಯ ಮೊದಲ ಪಂದ್ಯ ಸೆ. 19ರಂದು ನಾಟಿಂಗ್‌ಹ್ಯಾಮ್‌ನಲ್ಲಿ ನಡೆಯಲಿದೆ.

ಇಂಗ್ಲೆಂಡ್‌ ತಂಡ: ಹ್ಯಾರಿ ಬ್ರೂಕ್‌ (ನಾಯಕ), ಜೋಫ್ರ ಆರ್ಚರ್‌, ಜೇಕಬ್‌ ಬೆಥೆಲ್‌, ಬ್ರೈಡನ್‌ ಕಾರ್, ಜೋರ್ಡನ್‌ ಕಾಕ್ಸ್‌, ಬೆನ್‌ ಡಕೆಟ್‌, ವಿಲ್‌ ಜಾಕ್ಸ್‌, ಲಿಯಮ್‌ ಲಿವಿಂಗ್‌ಸ್ಟೋನ್‌, ಮ್ಯಾಥ್ಯೂ ಪಾಟ್ಸ್‌, ಆದಿಲ್‌ ರಶೀದ್‌, ಫಿಲ್‌ ಸಾಲ್ಟ್, ಜೇಮಿ ಸ್ಮಿತ್‌, ಓಲೀ ಸ್ಟೋನ್‌, ರೀಸ್‌ ಟಾಪ್ಲಿ, ಜಾನ್‌ ಟರ್ನರ್‌.