ತಪ್ಪುಗಳನ್ನು ತಿದ್ದಿ  ಸರಣಿ ಗೆದ್ದೆವು: ಮಾರ್ಗನ್‌

ಲೀಡ್ಸ್‌: ಪ್ರವಾಸಿ ಭಾರತ ವಿರುದ್ಧ ಅನುಭವಿಸಿದ ಟಿ20 ಸರಣಿ ಸೋಲಿಗೆ ಇಂಗ್ಲೆಂಡ್‌ ಸೇಡು ತೀರಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಚುಟುಕು ಕ್ರಿಕೆಟ್‌ ಸರಣಿಯನ್ನು 2-1 ಅಂತರದಿಂದ ಕಳೆದುಕೊಂಡಿದ್ದ ಮಾರ್ಗನ್‌ ಪಡೆ ಏಕದಿನದಲ್ಲಿ ಅಷ್ಟೇ ಅಂತರದಿಂದ ಸರಣಿ ಗೆದ್ದು ಬೀಗಿದೆ. ಭಾರತದ ಸತತ ಗೆಲುವಿನ ಅಭಿಯಾನ 9 ಸರಣಿಗಳಿಗೆ ಕೊನೆಗೊಂಡಿದೆ.

ಮಂಗಳವಾರ ಲೀಡ್ಸ್‌ನ ಹೇಡಿಂಗ್ಲೆ ಅಂಗಳದಲ್ಲಿ ನಡೆದ 3ನೇ ಹಾಗೂ ಅಂತಿಮ ಪಂದ್ಯದಲ್ಲಿ ಭಾರತವನ್ನು 8 ವಿಕೆಟ್‌ಗಳಿಂದ ಭರ್ಜರಿಯಾಗಿ ಮಣಿಸುವ ಮೂಲಕ ಇಂಗ್ಲೆಂಡ್‌ ಸರಣಿ ವಶಪಡಿಸಿಕೊಂಡಿತು. ಭಾರತ 8 ವಿಕೆಟಿಗೆ 256 ರನ್‌ ಗಳಿಸಿದರೆ, ಇಂಗ್ಲೆಂಡ್‌ 44.3 ಓವರ್‌ಗಳಲ್ಲಿ ಎರಡೇ ವಿಕೆಟಿಗೆ 260 ರನ್‌ ಬಾರಿಸಿ ಗೆದ್ದು ಬಂದಿತು. ಜೋ ರೂಟ್‌ ಅವರ ಸತತ 2ನೇ ಶತಕ, ರೂಟ್‌-ಮಾರ್ಗನ್‌ ಮುರಿಯದ 3ನೇ ವಿಕೆಟಿಗೆ ಪೇರಿಸಿದ 186 ರನ್‌ ಜತೆಯಾಟಗಳೆಲ್ಲ ಆತಿಥೇಯರ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದವು.

ಎಕ್ಸ್‌ಟ್ರಾ ಇನ್ನಿಂಗ್ಸ್‌
ವಿರಾಟ್‌ ಕೊಹ್ಲಿ ನಾಯಕತ್ವದಲ್ಲಿ ಭಾರತ ಮೊದಲ ಬಾರಿಗೆ ದ್ವಿಪಕ್ಷೀಯ ಸರಣಿಯೊಂದನ್ನು ಕಳೆದುಕೊಂಡಿತು. ಧೋನಿ ಗೈರಲ್ಲಿ ಹಂಗಾಮಿ ನಾಯಕರಾಗಿದ್ದಾಗ ಕೊಹ್ಲಿ ಎರಡೂ ಸರಣಿಗಳಲ್ಲಿ ಭಾರತಕ್ಕೆ ಗೆಲುವು ತಂದಿತ್ತಿದ್ದರು. ಕೊಹ್ಲಿ ಪೂರ್ಣ ಪ್ರಮಾಣದ ನಾಯಕನಾದ ಬಳಿಕ ಆಡಲಾದ ಎಲ್ಲ 6 ಸರಣಿಗಳಲ್ಲೂ ಭಾರತ ಜಯ ಸಾಧಿಸಿತ್ತು.

ಭಾರತ ಸತತ 9 ಏಕದಿನ ಸರಣಿ ಗೆಲುವಿನ ಬಳಿಕ ಮೊದಲ ಸಲ ಸೋಲನುಭವಿಸಿತು. ಭಾರತ ಕೊನೆಯ ಸಲ 2016ರಲ್ಲಿ ಆಸ್ಟ್ರೇಲಿಯ ವಿರುದ್ಧ ಅವರದೇ ನೆಲದಲ್ಲಿ ಸರಣಿ ಸೋತಿತ್ತು.

ಇಂಗ್ಲೆಂಡ್‌ 2017ರಲ್ಲಿ ಭಾರತದ ವಿರುದ್ಧ ಸರಣಿ ಸೋತ ಬಳಿಕ ಸತತ 8 ದ್ವಿಪಕ್ಷೀಯ ಏಕದಿನ ಸರಣಿಗಳಲ್ಲಿ ಜಯ ಸಾಧಿಸಿತು.

ಜೋ ರೂಟ್‌ ಸತತ 2ನೇ ಶತಕ ಬಾರಿಸಿದರು. ಅವರೀಗ 3 ಪಂದ್ಯಗಳ ದ್ವಿಪಕ್ಷೀಯ ಸರಣಿಯಲ್ಲಿ 2 ಶತಕ ಹೊಡೆದ ಇಂಗ್ಲೆಂಡಿನ 3ನೇ ಕ್ರಿಕೆಟಿಗನಾಗಿದ್ದಾರೆ. ಉಳಿದಿಬ್ಬರೆಂದರೆ ಗ್ರಹಾಂ ಗೂಚ್‌ (1985ರಲ್ಲಿ ಆಸ್ಟ್ರೇಲಿಯ ವಿರುದ್ಧ) ಮತ್ತು ನಿಕ್‌ ನೈಟ್‌ (1996ರಲ್ಲಿ ಪಾಕಿಸ್ಥಾನ ವಿರುದ್ಧ). 

ರೂಟ್‌ ಇಂಗ್ಲೆಂಡ್‌ ಪರ ಏಕದಿನಗಳಲ್ಲಿ ಸರ್ವಾಧಿಕ 13 ಶತಕ ಬಾರಿಸಿದ ದಾಖಲೆ ಸ್ಥಾಪಿಸಿದರು. 

ರೂಟ್‌-ಮಾರ್ಗನ್‌ ಮುರಿಯದ 3ನೇ ವಿಕೆಟಿಗೆ 186 ರನ್‌ ಪೇರಿಸಿದರು. ಇದು ಎಲ್ಲ ವಿಕೆಟ್‌ಗಳಿಗೂ ಅನ್ವಯಿಸುವಂತೆ ಭಾರತದ ವಿರುದ್ಧ ಇಂಗ್ಲೆಂಡ್‌ ದಾಖಲಿಸಿದ ಅತೀ ದೊಡ್ಡ ಜತೆಯಾಟ.