ಮನೆ ಮಗಳು ನಾನು,ಮತ ಕೊಡಿ: ಅನಿತಾ 

ರಾಮನಗರ: ಜೆಡಿಎಸ್‌ ಅಭ್ಯರ್ಥಿ ಅನಿತಾ ಕುಮಾರಸ್ವಾಮಿಯವರು ಬುಧವಾರ ಅಧಿಕೃತವಾಗಿ ಚುನಾವಣಾ ಪ್ರಚಾರ ಆರಂಭಿಸಿದರು.

ವಾಡಿಕೆ ಹಾಗೂ ನಂಬಿಕೆಯಂತೆ ರಾಮನಗರ ವಿಧಾನಸಭಾ ಕ್ಷೇತ್ರದ ದೇವ ಮೂಲೆ ಎಂದೇ ಹೇಳಲಾದ ಕೆಂಪನಹಳ್ಳಿ ಗ್ರಾಮದಿಂದ ಪ್ರಚಾರ ಆರಂಭಿಸಿದ ಅವರಿಗೆ ಸಂಸದ ಡಿ.ಕೆ.ಸುರೇಶ್‌,ಶಾಸಕ ಎ.ಮಂಜು ಸಾಥ್‌ ನೀಡಿದರು.

ಕೆಂಪನಹಳ್ಳಿಗೆ ಆಗಮಿಸಿದ ಅನಿತಾ ಕುಮಾರ ಸ್ವಾಮಿಯನ್ನು ಗ್ರಾಮಸ್ಥರು ತರಾಟೆಗೆ ತೆಗೆದುಕೊಂಡು, ಮೂಲಸೌಕರ್ಯ ಅಭಿವೃದ್ಧಿಗೆ ಆಗ್ರಹಿಸಿದರು.

ಆರಂಭದಲ್ಲೇ ಜನರ ಆಕ್ರೋಶ ಎದುರಾಗಿದ್ದರಿಂದ ಅವರಿಗೆ ಇರುಸು ಮುರುಸು ಉಂಟಾಯಿತು. ನಂತರ,ಕೇತೋಹಳ್ಳಿ, ಜನತಾ ಕಾಲೋನಿಯಲ್ಲಿ ರೋಡ್‌ ಶೋ ನಡೆಸಿದರು. ಅಲ್ಲಿಯೂ ಗ್ರಾಮಸ್ಥರು ಸ್ಮಶಾನಕ್ಕೆ ಜಾಗವೇ ಇಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಮನೆ ಮಗಳು ನಾನು, ಮತ ಕೊಡಿ: ಮಾದಾಪುರ ಗ್ರಾಮದಲ್ಲಿ ರೋಡ್‌ ಶೋ ವೇಳೆ ಮಾತನಾಡಿ, ಕ್ಷೇತ್ರದ ಮತದಾರರು ನನ್ನ ಪತಿ ಸಿಎಂ ಕುಮಾರಸ್ವಾಮಿಯವರನ್ನು ಮನೆ ಮಗನಂತೆ ಕಂಡು ಗೆಲ್ಲಿಸಿಕೊಂಡು ಬಂದಿದ್ದೀರಿ. ಈ ಬಾರಿ ನನ್ನನ್ನು ಸಹ ಮನೆ ಮಗಳಂತೆ ಸ್ವೀಕರಿಸಿ, ಮತ ಕೊಡಿ ಎಂದು ಮನವಿ ಮಾಡಿದರು.