ಸರಕಾರ ಸ್ಪಷ್ಟ ನಿಲುವು ತಿಳಿಸುವವರೆಗೂ ಚುನಾವಣೆ ಬಹಿಷ್ಕಾರಕ್ಕೆ ನಿರ್ಧಾರ

ಬಾಳೆಹೊನ್ನೂರು: ಚಿಕ್ಕಮಗಳೂರು ಜಿಲ್ಲೆ ಖಾಂಡ್ಯ ಹೋಬಳಿಯ ನಾಲ್ಕು ಗ್ರಾಪಂಗಳಲ್ಲಿ ಮಾ.29ರಂದು ಸರಕಾರ ನಡೆಸಲು ಉದ್ದೇಶಿಸಿದ ಗ್ರಾಪಂ ಚುನಾವಣೆಯನ್ನು ಮತ್ತೆ ಬಹಿಷ್ಕರಿಸಲು ಖಾಂಡ್ಯ ನಾಗರಿಕ ರಕ್ಷಣಾ ವೇ ದಿಕೆ ನಿರ್ಧರಿಸಿದೆ.

ಕಸ್ತೂರಿ ರಂಗನ್‌ ವರದಿ, ಹುಲಿ ಯೋಜನೆ, ಪರಿಸರ ಸೂಕ್ಷ್ಮ ವಲಯ ಯೋಜನೆಗಳನ್ನು ಜನರ ಮೇಲೆ ಸರಕಾರ ಹೇರುತ್ತಿದೆ ಎಂದು ಆರೋಪಿಸಿ ಡಿ.22ರಂದು ನಡೆದ ಗ್ರಾಪಂ ಚುನಾವಣೆಯನ್ನು  ಬಹಿಷ್ಕರಿಸಲಾಗಿತ್ತು, ಹೀಗೆ ಚುನಾವಣೆ ಬಹಿಷ್ಕಾರಗೊಂಡ ಗ್ರಾಪಂಗಳಲ್ಲಿ ಮರು ಚುನಾವಣೆ ನಡೆಸಲು ಚುನಾವಣಾ ಆಯೋಗ ಮಾ.29ರಂದು ದಿನಾಂಕ ನಿಗದಿಪಡಿಸಿದೆ.

ಈ ಹಿನ್ನೆಲೆಯಲ್ಲಿ ಖಾಂಡ್ಯ ಹೋಬಳಿಯ ದೇವದಾನ, ಬಿದರೆ, ಹುಯಿಗೆರೆ, ಕಡವಂತಿ ಗ್ರಾಪಂ ವ್ಯಾಪ್ತಿಯ ಮುಖಂಡರು ಸಂಗಮೇಶ್ವರಪೇಟೆ ಸಭಾ ಭವನದಲ್ಲಿ ಸಭೆ ಸೇರಿ ಸರಕಾರ ಸ್ಪಷ್ಟ ನಿಲುವು  ವ್ಯಕ್ತಪಡಿಸುವವರೆಗೂ ಚುನಾವಣೆಯನ್ನು ಬಹಿಷ್ಕರಿಸುವ ಕುರಿತು ಚರ್ಚೆ ನಡೆಸಿ ಬಹಿಷ್ಕಾರ ತೀರ್ಮಾನ  ಕೈಗೊಂಡರು.

ಅಂತಿಮವಾಗಿ ಇನ್ನೊಮ್ಮೆ ಹೋಬಳಿಯ ಎಲ್ಲಾ ಮುಖಂಡರು ಸೇರಿ ಸಭೆ ನಡೆಸಿ ತೀರ್ಮಾನ ಕೈಗೊಳ್ಳಲಾಗುವುದೆಂದು ಖಾಂಡ್ಯ ನಾಗರಿಕ ರಕ್ಷಣಾ ವೇದಿಕೆಯ ಚಂದ್ರಶೇಖರ್‌ ರೈ ತಿಳಿಸಿದ್ದಾರೆ. ಮುಖಂಡರಾದ ಶಿವಶಂಕರ್‌, ವಿಜಯಕುಮಾರ್‌, ಸುಧಾಕರ್‌ ಬೆಳಸೆ, ರಾಜು ಸೇರಿದಂತೆ ಇತರ  ಮುಖಂಡರು ಇದ್ದರು.