ರೌಡಿ ಸೆರೆಗೆ ತೆರಳಿದ್ದ 8 ಪೊಲೀಸರ ಹತ್ಯೆ ; ಕಾನ್ಪುರ ಬಳಿ ಆಘಾತಕಾರಿ ಕೃತ್ಯ

ಕಾನ್ಪುರ: ಮಧ್ಯರಾತ್ರಿ ರೌಡಿಗಳು ಗುಂಡಿನ ಸುರಿಮಳೆಗೈದು ಓರ್ವ ಡಿವೈಎಸ್ಪಿ, ಮೂವರು ಸಬ್‌ ಇನ್ಸ್‌ಪೆಕ್ಟರ್‌ ಹಾಗೂ ನಾಲ್ವರು ಪೇದೆಗಳನ್ನು ಹತ್ಯೆಗೈದಿರುವ ಭೀಭತ್ಸ ಕೃತ್ಯ ಸಂಭವಿ­ಸಿದೆ.

ಸುಮಾರು 60 ಅಪರಾಧ ಪ್ರಕ­ರಣಗಳಲ್ಲಿ ಭಾಗಿಯಾಗಿದ್ದ ಕುಖ್ಯಾತ ರೌಡಿಯೊಬ್ಬನನ್ನು ಪೊಲೀಸರ ತಂಡ ಬಂಧಿಸಲು ಹೊರಟಿದ್ದಾಗ ಈ ಕೃತ್ಯ ಜರುಗಿದೆ.

ಕಾನ್ಪುರ ಸಮೀಪದ ದಿಕ್ರು ಗ್ರಾಮ­ದಲ್ಲಿ ಕುಖ್ಯಾತ ರೌಡಿ ವಿಕಾಸ್‌ ದುಬೆ ಅಡಗಿದ್ದ ಮಾಹಿತಿ ಸಿಕ್ಕಿತ್ತು. ಹೀಗಾಗಿ, ಆತನನ್ನು ಬಂಧಿಸಲು ಡಿವೈಎಸ್ಪಿ ದೇವೇಂದ್ರ ಮಿಶ್ರಾ ನೇತೃತ್ವದ ಪೊಲೀಸರ ತಂಡವು ಶುಕ್ರವಾರ ನಸುಕಿನ 1 ಗಂಟೆ ಸಮಯದಲ್ಲಿ ತೆರಳಿತ್ತು.

ಪೊಲೀಸರು ಬರುವ ಮಾಹಿತಿಯನ್ನು ತಿಳಿದಿದ್ದ ರೌಡಿಗಳ ತಂಡವು, ಬುಲ್ಡೋಜರ್‌ ಬಳಸಿ ರಸ್ತೆಯನ್ನು ಬ್ಲಾಕ್‌ ಮಾಡಿದ್ದತ್ತು.

ಅವರು ಬರು­ವುದನ್ನೇ ಹೊಂಚು ಹಾಕಿ ಕಾಯುತ್ತಿದ್ದರು. ಈ ಕುತಂತ್ರ ಅರಿಯದ ಪೊಲೀಸರು ರಸ್ತೆ ತಡೆ ತೆರವುಗೊಳಿಸಲು ಪ್ರಯತ್ನಿಸಿದ್ದಾರೆ.

ಈ ವೇಳೆ ಕಟ್ಟಡ­ವೊಂ­ದರಲ್ಲಿ ಅವಿತಿದ್ದ ಸುಮಾರು 8-10 ದುಷ್ಕರ್ಮಿಗಳು ನಿರಂತರವಾಗಿ ಗುಂಡಿನ ಸುರಿಮಳೆಗೈದಿದ್ದಾರೆ. ಇದ­ರಿಂದ ತಬ್ಬಿಬ್ಟಾದ ಪೊಲೀಸರು ಕೂಡ ಪ್ರತಿದಾಳಿ ನಡೆಸಿ­ದ್ದಾರೆ.

ಗುಂಡಿನ ಚಕಮಕಿಯಲ್ಲಿ ಡಿವೈಎಸ್ಪಿ, ಮೂವರು ಸಬ್‌ ಇನ್ಸ್‌ ಪೆಕ್ಟರ್‌ ಸೇರಿದಂತೆ 8 ಮಂದಿ ಪೊಲೀಸರು ಮೃತಪಟ್ಟಿದ್ದು, 7 ಮಂದಿ ಗಾಯಗೊಂಡಿ­ದ್ದಾರೆ. ಅಲ್ಲದೇ ಇಬ್ಬರು ರೌಡಿಗಳು ಕೂಡ ಹತರಾಗಿದ್ದಾರೆ.

ಘಟನಾ ಸ್ಥಳದಲ್ಲಿ ಎಕೆ 47 ಗನ್‌ಗಳು ದೊರೆತಿವೆ. ಕೊಲೆ, ದರೋಡೆ, ವಂಚನೆ ಸೇರಿದಂತೆ 60 ಪ್ರಕರಣಗಳಲ್ಲಿ ಕುಖ್ಯಾತ ರೌಡಿ ವಿಕಾಸ್‌ ದುಬೆ ಭಾಗಿಯಾಗಿದ್ದನು.

ಉತ್ತರ ಪ್ರದೇಶವು ಗೂಂಡಾ­ರಾಜ್ಯವಾಗಿರುವುದು ಈ ದುಷ್ಕೃತ್ಯದಿಂದ ಮತ್ತೆ ಸಾಬೀ­ತಾಗಿದೆ. ಪೊಲೀಸರಿಗೇ ಭದ್ರತೆ ಇಲ್ಲದಿರು­ವಾಗ ಜನಸಾಮಾನ್ಯರು ಹೇಗೆ ಸುರಕ್ಷಿತವಾಗಿ­ರುತ್ತಾರೆ ಪ್ರತಿಪಕ್ಷಗಳು ಟೀಕಿಸಿವೆ.

ಸಿಎಂ ಸೂಚನೆ
ಪೊಲೀಸರನ್ನು ಹತ್ಯೆಗೈದಿ­ರುವ ದುಷ್ಕರ್ಮಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಹಾಗೂ ಘಟನೆ ಸಂಬಂಧ ವರದಿ ಸಲ್ಲಿಸಲು ಡಿಜಿಪಿ ಅವಸ್ತಿಗೆ ಸಿಎಂ ಯೋಗಿ ಆದಿತ್ಯನಾಥ ಸೂಚನೆ ನೀಡಿದ್ದಾರೆ.