Education: ಮಹಾಭಾರತ-ರಾಮಾಯಣ ಶಾಲಾ ಪಠ್ಯಕ್ರಮದಲ್ಲಿರಲಿ- NCERT ಉನ್ನತ ಸಮಿತಿ ಶಿಫಾರಸು

ಹೊಸದಿಲ್ಲಿ: ಶಾಲಾ ಮಕ್ಕಳ ಪಠ್ಯಕ್ರಮದಲ್ಲಿ ಸಮಾಜ -ವಿಜ್ಞಾನ ವಿಷಯದ ಪಠ್ಯಗಳಾಗಿ ಮಹಾಕಾವ್ಯಗಳಾದ ರಾಮಾಯಣ ಮತ್ತು ಮಹಾಭಾರತವನ್ನು ಸೇರ್ಪಡೆಗೊಳಿಸುವಂತೆ ಹಾಗೂ ತರಗತಿಗಳ ಗೋಡೆಯ ಮೇಲೆ ಸಂವಿಧಾನದ ಪ್ರಸ್ತಾವನೆಯನ್ನು ಬರೆಯುವಂತೆ ರಾಷ್ಟ್ರೀಯ ಶೈಕ್ಷಣಿಕ ಸಂಶೋಧನ ಮತ್ತು ತರಬೇತಿ ಮಂಡಳಿ (ಎನ್‌ಸಿಇಆರ್‌ಟಿ) ಸ್ಥಾಪಿಸಿರುವ ಉನ್ನತ ಸಮಿತಿಯು ಶಿಫಾರಸು ಮಾಡಿದೆ.

ಸಮಿತಿಯ ಅಧ್ಯಕ್ಷರಾದ ಸಿ.ಐ.ಇಸಾಕ್‌ ಈ ಕುರಿತು ಮಂಗಳವಾರ ಮಾಹಿತಿ ನೀಡಿದ್ದು, 7 ರಿಂದ 12ನೇ ತರಗತಿಯ ವಿದ್ಯಾರ್ಥಿಗಳಿಗೆ ಈ ಮಹಾಕಾವ್ಯಗಳನ್ನು ಕಲಿಸುವುದು ಮಹತ್ವದ್ದಾಗಿದೆ. ಈ ಮೂಲಕ ವಿದ್ಯಾರ್ಥಿಗಳು ತಮ್ಮ ಹದಿಹರೆಯದಲ್ಲೇ ಸ್ವಾಭಿಮಾನ, ದೇಶಭಕ್ತಿ, ರಾಷ್ಟ್ರಹಿತ ಚಿಂತನೆಗಳನ್ನು ಬೆಳಸಿಕೊಳ್ಳುತ್ತಾರೆ. ಪ್ರತೀವರ್ಷ ಸಾವಿರಾರು ವಿದ್ಯಾರ್ಥಿಗಳು ದೇಶ ತೊರೆದು, ಬೇರೆ ರಾಷ್ಟ್ರಗಳ ಪೌರತ್ವ ಬಯಸುತ್ತಾರೆ. ಏಕೆಂದರೆ ಅವರಲ್ಲಿ ದೇಶಭಕ್ತಿಯ ಕೊರತೆಯಿದೆ. ಆ ಕೊರತೆಯನ್ನು ನಿವಾರಿಸಲು ನಮ್ಮ ಬೇರುಗಳನ್ನು, ಮೂಲಗಳನ್ನು ಅರಿಯುವುದು ಮುಖ್ಯ ದೇಶ ಮತ್ತು ಸಂಸ್ಕೃತಿಯ ಬಗ್ಗೆ ಹೆಮ್ಮೆ ಮತ್ತು ಪ್ರೀತಿ ಬೆಳೆಯಲು ಈ ಕಲಿಕೆ ಅಗತ್ಯವೆಂದು ಸಮಿತಿ ಭಾವಿಸಿದೆ ಎಂದು ಇಸಾಕ್‌ ತಿಳಿಸಿದ್ದಾರೆ.

ಎನ್‌ಸಿಇಆರ್‌ಟಿ ಕಳೆದ ವರ್ಷ ರಚಿಸಿರುವ ಈ 7 ಸದ್ಯಸರ ಸಮಿತಿಯು ಸಮಾಜ ವಿಜ್ಞಾನ ವಿಷಯದ ಪಠ್ಯ ಪರಿಷ್ಕರಣೆಗೆ ಈಗಾಗಲೇ ಹಲವಾರು ಶಿಫಾರಸುಗಳನ್ನು ನೀಡಿದೆ. ಬಹುಶಃ ಮುಂದಿನ ವರ್ಷ ಜುಲೈಯಲ್ಲಿ ಈ ಶಿಫಾರಸುಗಳನ್ನು 19 ಸದಸ್ಯರು ಇರುವ ರಾಷ್ಟ್ರೀಯ ಪಠ್ಯಕ್ರಮ ಮತ್ತು ಬೋಧನಾ ಕಲಿಕಾ ಸಾಮಗ್ರಿ ಸಮಿತಿ (ಎನ್‌ಎಸ್‌ಟಿಸಿ) ಪರಿಗಣಿಸುವ ಸಾಧ್ಯತೆ ಇದೆ.