ಬಲೂಚಿಸ್ಥಾನದಲ್ಲಿ ಪ್ರಬಲ ಭೂಕಂಪ; ಸಾವು ನೋವಿನ ವರದಿ ಇಲ್ಲ

ಇಸ್ಲಾಮಾಬಾದ್‌ : ಪಾಕಿಸ್ಥಾನದ ಬಲೂಚಿಸ್ಥಾನದಲ್ಲಿ ಪ್ರಬಲ ಭೂಕಂಪ ಸಂಭಿವಿಸಿದ್ದು ರಿಕ್ಟರ್‌ ಮಾಪಕದಲ್ಲಿ ಅದರ ತೀವ್ರತೆಯು 6.6 ಅಂಕಗಳಲ್ಲಿ ದಾಖಲಾಗಿ ತೀವ್ರ ಆತಂಕ ಸೃಷ್ಟಿಸಿದೆ.

ಇಂದು ನಸುಕಿನ 3.30ರ ಹೊತ್ತಿಗೆ ಭೂಕಂಪ ಸಂಭವಿಸಿದ್ದು ಸಾವು ನೋವು ನಾಶ ನಷ್ಟ ಸಂಭವಿಸಿರುವ ವರದಿಯಾಗಿಲ್ಲ. ಬಲೂಚಿಸ್ಥಾನದ ಪಾಸ್‌ನಿ, ತುರ್ಬತ್‌, ಗ್ವಾದರ್‌ ಸೇರಿದಂತೆ ಹಲವು ಕಡೆಗಳಲ್ಲಿ ಭೂಕಂಪ ಸಂಭವಿಸಿರುವುದಾಗಿ ವರದಿಯಾಗಿದೆ.

ನೈಋತ್ಯ ಪಾಕಿಸ್ಥಾನದಿಂದ ಸುಮಾರು 32 ಕಿ.ಮೀ. ದೂರವಿರುವ ಪಾಸ್‌ನಿ ಎಂಬ ಪಟ್ಟಣದಲ್ಲಿ ಭೂಕಂಪವು ಕೇಂದ್ರೀಕೃತವಾಗಿತ್ತೆಂದು ಅಮೆರಿಕದ ಭೂಗರ್ಭ ಸರ್ವೇಕ್ಷಣಾಲಯ ಹೇಳಿದೆ.

ಭಾರತ, ಪಾಕಿಸ್ಥಾನ, ನೇಪಾಲ ಗಳಲ್ಲಿ ಭೂಕಂಪಗಳು ಸಂಭವಿಸುವುದು ಈಚೆಗೆ ಸಾಮಾನ್ಯವಾಗಿದ್ದು ಇದರ ಒಟ್ಟು ಪರಿಣಾಮವಾಗಿ ಹಿಮಾಲಯದ ಎತ್ತರ ಕುಗ್ಗುತ್ತಿರುವುದನ್ನು ಭೂಗರ್ಭ ವಿಜ್ಞಾನಿಗಳು ಗಮನಿಸುತ್ತಿದ್ದಾರೆ.