ದತ್‌ ಶಿಕ್ಷೆ ಇಳಿಕೆ: “ಮಹಾ’ಸರಕಾರದ ಸಮರ್ಥನೆ

ಮುಂಬಯಿ: ಬಾಲಿವುಡ್‌ ನ‌ಟ ಸಂಜಯ್‌ ದತ್‌ ಅವರ ಪ್ರಕರಣವನ್ನು ಸರಕಾರ “ವಿಶೇಷ’ವೆಂದು ಪರಿಗಣಿಸಿಲ್ಲ. ಜತೆಗೆ ಕಾನೂನು ಪ್ರಕಾರವೇ ಅವರನ್ನು ಬಿಡುಗಡೆ ಮಾಡಲಾಗಿದೆ ಎಂದು ಮಹಾರಾಷ್ಟ್ರ ಸರಕಾರ ಸುಪ್ರೀಂ ಕೋರ್ಟ್‌ಗೆ ಮಾಹಿತಿ ನೀಡಿದೆ.

1993ರ ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿ ದತ್‌ಗೆ 5 ವರ್ಷಗಳ ಕಾರಾಗೃಹ ಶಿಕ್ಷೆ ವಿಧಿಸಲಾಗಿತ್ತು. ಆದರೆ ಪುಣೆಯ ಯರವಾಡ ಜೈಲಿನಲ್ಲಿದ್ದ ಅವರನ್ನು ಶಿಕ್ಷೆ ಅವಧಿ ಮುಗಿಯುವ 8 ತಿಂಗಳ ಮೊದಲೇ ಬಿಡುಗಡೆ ಮಾಡಲಾಗಿತ್ತು. ದತ್‌ ಅವರು ದೈಹಿಕ ತರಬೇತಿ, ಶೈಕ್ಷಣಿಕ ಕಾರ್ಯಕ್ರಮಗಳು ಸೇರಿ ಹಲವು ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿರುವುದನ್ನು ಪರಿಗಣಿಸಿ, “ಉತ್ತಮ ನಡವಳಿಕೆ’ ಆಧಾರದಲ್ಲಿ ಅವರಿಗೆ ಶಿಕ್ಷೆಯಲ್ಲಿ ವಿನಾಯಿತಿ ನೀಡಲಾಗಿದೆ ಎಂದು ಸರಕಾರ ಹೇಳಿದೆ.