ರಸ್ತೆ ಸುರಕ್ಷತಾ ಕಾಮಗಾರಿಗೆ ಚಾಲನೆ

ಸಿದ್ದಾಪುರ: ಬೈಂದೂರು ವಿಧಾನಸಭಾ ಕ್ಷೇತ್ರದ ವಿರಾಜಪೇಟೆ ಬೈಂದೂರು ರಾಜ್ಯ ಹೆದ್ದಾರಿ ಹಾಲ್ಕಲ್‌ ಭಾಗದಲ್ಲಿ 1 ಕೋ.ರೂ. ವೆಚ್ಚದ ರಸ್ತೆ ಸುರಕ್ಷತಾ ಕಾಮಗಾರಿಗೆ ಶಾಸಕ ಬಿ. ಎಂ. ಸುಕುಮಾರ ಶೆಟ್ಟಿ ಚಾಲನೆ ನೀಡಿದರು. 

ಬಳಿಕ ಮಾತನಾಡಿದ ಅವರು, ಕೊಲ್ಲೂರು ದೇವಸ್ಥಾನಕ್ಕೆ ಬೈಂದೂರಿನಿಂದ ಹಾಗೂ ಹೆಮ್ಮಾಡಿಯಿಂದ ಕೊಲ್ಲೂರು ಮಾರ್ಗವಾಗಿ ಸಾವಿರಾರು ವಾಹನಗಳು ಸಂಚರಿಸುತ್ತವೆ.  ಹಾಲ್ಕಲ್‌ ಭಾಗದಲ್ಲಿ ವೃತ್ತದ ಆವಶ್ಯಕತೆಯಿದೆ. ಆ ಉದ್ದೇಶಕ್ಕೆ ಅಲ್ಲಲ್ಲಿ ತಿರುವುಗಳನ್ನು ನೇರ ರಸ್ತೆಗಳನ್ನಾಗಿ ಪರಿವರ್ತಿಸುವ ವ್ಯವಸ್ಥೆ ಮಾಡಲಾಗುತ್ತಿದ್ದು, ವೃತ್ತದ ಕಾಮಗಾರಿಗೆ ಚಾಲನೆ ನೀಡಲಾಗಿದೆ ಎಂದರು.

ಜಡ್ಕಲ್‌ ಗ್ರಾ.ಪಂ. ಅಧ್ಯಕ್ಷ ಅನಂತಮೂರ್ತಿ ಭಟ್‌, ಶ್ರೀನಿವಾಸ ಆಚಾರ್‌, ತಂಗಪ್ಪನ್‌, ವಿಶ್ವನಾಥನ್‌, ನಾರಾಯಣ ಶೆಟ್ಟಿ, ಹರೀಶ್‌ ಜಡ್ಕಲ್‌ ಉಪಸ್ಥಿತರಿದ್ದರು.