ನಲ್ಲಿಯಲ್ಲಿ ಚರಂಡಿ ನೀರು!

ದಾವಣಗೆರೆ: ಮಹಾನಗರ ಪಾಲಿಕೆ ವ್ಯಾಪ್ತಿಯ 16ನೇ ವಾರ್ಡ್‌ನ ಕೆ.ಆರ್‌. ರಸ್ತೆಯ ಎಲ್‌ಐಸಿ ಕಚೇರಿ ಸುತ್ತಮುತ್ತಲ ಭಾಗದ ಮನೆಯಲ್ಲಿ ಸೋಮವಾರ ನಲ್ಲಿಯಲ್ಲಿ ಚರಂಡಿ ನೀರು ಪೂರೈಸಲಾಗಿದೆ. ವಾರಕ್ಕೊಮ್ಮೆ ಬಿಡುವ ನಲ್ಲಿ ನೀರಿಗಾಗಿ ಜನರು ಕಾಯುತ್ತಿದ್ದರು. ನಲ್ಲಿಯಲ್ಲಿ ಚರಂಡಿ ನೀರು ಪೂರೈಸಿರುವುದನ್ನು ನೋಡಿ ಮಂದಿ ಅವಾಕ್ಕಾದರು. ಒಂದೇ ಒಂದು ಹನಿ ಶುದ್ಧ ನೀರು ಬರಲೇ ಇಲ್ಲ. 200-250ಕ್ಕೂ ಹೆಚ್ಚು ಮನೆಗಳ ನಲ್ಲಿಗಳಲ್ಲಿ ಮಲೀನ ನೀರು ಬಂದಿತು.

ಕೆ.ಆರ್‌. ರಸ್ತೆಯಲ್ಲಿ ಮಲೀನ ನೀರು ಒಂದು ರೀತಿಯಲ್ಲಿ ಮಾಮೂಲು. ಹಾಗಾಗಿ ಜನರು ಒಂದು ರೀತಿಯ ಒಗ್ಗಿಕೊಂಡು ಹೋಗಿದ್ದಾರೆ. ಹಾಗಾಗಿ ಮಲೀನ ನೀರು ಬಂದರೂ ಯಾರೂ ಪ್ರತಿಭಟನೆ ಮಾಡುವ ಗೋಜಿಗೂ ಹೋಗುವುದಿಲ್ಲ. ಇಂದು ಸಹ ಪ್ರತಿಭಟನೆ ಮಾಡಲಿಲ್ಲ. ಟ್ಯಾಂಕ್‌ ನೀರು ಖಾಲಿ ಮಾಡಿ, ಸುಮ್ಮನಾದರು. ನೂರಾರು ಮನೆಗಳಿಗೆ ಮಲೀನ ನೀರು ಪೂರೈಕೆ ಆಗಿದ್ದರೂ ಮಹಾನಗರ ಪಾಲಿಕೆಯ ಸಂಬಂಧಿತ ಅಧಿಕಾರಿ, ಸಿಬ್ಬಂದಿ ಇತ್ತ ಸುಳಿಯಲೂ ಇಲ್ಲ.