ಸಿದ್ದೇಶ್ವರ ಶ್ರೀ ವಾಣಿ ತಪ್ಪದೇ ಆಲಿಸಿ

ಭಾಲ್ಕಿ: ಪಟ್ಟಣದ ಚನ್ನಬಸವಾಶ್ರಮದಲ್ಲಿ ಗುರುವಾರ ಒಂದು ತಿಂಗಳ ಪರ್ಯಂತ ನಡೆಯಲಿರುವ ವಿಜಯಪುರದ ಜ್ಞಾನ ಯೋಗಾಶ್ರಮದ ಸಿದ್ದೇಶ್ವರ ಸ್ವಾಮಿಗಳ ಪ್ರವಚನ ಕಾರ್ಯಕ್ರಮಕ್ಕೆ ಶಾಸಕ ಈಶ್ವರ ಖಂಡ್ರೆ ಚಾಲನೆ ನೀಡಿದರು.

ನಂತರ ಮಾತನಾಡಿದ ಅವರು, ನಮ್ಮ ಮನದಲ್ಲಿಯ ಕತ್ತಲೆಗಳನ್ನು ಕಳೆದು ಜ್ಞಾನದ ಜ್ಯೋತಿ ಹತ್ತಿಸಲು ಸಿದ್ದೇಶ್ವರ ಶ್ರೀಗಳ ವಾಣಿ ಕೇಳುವುದು ಅತ್ಯವಶ್ಯಕವಾಗಿದೆ ಎಂದರು. ಸಾನ್ನಿಧ್ಯ ವಹಿಸಿ ಮಾತನಾಡಿದ ಹುಲಸೂರಿನ ಶಿವಾನಂದ ಸ್ವಾಮಿಗಳು, ನಮ್ಮ ಮನದ ಮಲೀನತೆ ಹೋಗಲಾಡಿಸಲು ಪೂಜ್ಯರ ಅಮೃತವಾಣಿ ಆಲಿಸುವುದು ಅತ್ಯವಶ್ಯಕವಾಗಿದೆ. ಭಾಲ್ಕಿಯ ಜನತೆ ಪೂಜ್ಯರ ಪ್ರವಚನದ ಸದುಪಯೋಗ ಪಡೆದುಕೊಳ್ಳಬೇಕು ಎಂದರು.

ಗುರುಕುಲ ಆಶ್ರಮ ಮೆಹಕರ, ತಡೋಳಾದ ರಾಜೇಶ್ವರ ಶಿವಾಚಾರ್ಯರು, ಮುಚಳಂಬಿಯ ಪ್ರಣವಾನಂದ ಸ್ವಾಮಿಗಳು, ಮಲ್ಲಯಗಿರಿ ಬೆಟ್ಟ ಜಹಿರಾಬಾದನ ಬಸವಲಿಂಗ ಅವಧೂತರು, ರಾಚೋಟೇಶ್ವರ ಮಠ ಹಲಬರ್ಗಾದ ಹಾವಗಿಲಿಂಗೇಶ್ವರ ಶಿವಾಚಾರ್ಯರು, ಡಾ| ರಾಜಶೇಖರ ಶಿವಾಚಾರ್ಯರು, ಶಿವಾನಂದ ಸ್ವಾಮಿಗಳು, ವಿರಕ್ತ ಮಠ ಸಾಯಗಾಂವ, ಪೂಜ್ಯ ಅಕ್ಕ ಅನ್ನಪೂರ್ಣ ತಾಯಿ, ಡಾ| ಗಂಗಾಂಬಿಕಾ ಮಾತೆ ಮಾತನಾಡಿದರು.

ಹಿರೇಮಠ ಸಂಸ್ಥಾನದ ಹಿರಿಯ ಸ್ವಾಮೀಜಿ, ಡಾ| ಬಸವಲಿಂಗ ಪಟ್ಟದ್ದೇವರು ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಾಜಿ ಶಾಸಕ ಪ್ರಕಾಶ ಖಂಡ್ರೆ ಗುರುಪೂಜೆ ನೆರವೇರಿಸಿದರು. ಶರಣ ಸಾಹಿತ್ಯ ಪರಿಷತ್‌ ಜಿಲ್ಲಾಧ್ಯಕ್ಷ ಪ್ರೊ.| ಶಂಭುಲಿಂಗ ಕಾಮಣ್ಣ ಮತ್ತು ಸಾಹಿತಿ ವೀರಣ್ಣ ಕುಂಬಾರ ನಿರೂಪಿಸಿದರು.