ಡೊನಾಲ್ಡ್ ಟ್ರಂಪ್ ರೋಡ್ ಶೋ 22 ಕಿ.ಮೀ ಅಲ್ಲ, 9 ಕಿ.ಮೀಟರ್; ಗಾಂಧಿ ಆಶ್ರಮ ಭೇಟಿ ರದ್ದು!

ಅಹಮದಾಬಾದ್: ಎರಡು ದಿನಗಳ ಕಾಲ ಭಾರತ ಪ್ರವಾಸ ಕೈಗೊಳ್ಳಲಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಸ್ವಾಗತಿಸಲು ಸಜ್ಜಾಗುತ್ತಿದ್ದು, ಮತ್ತೊಂದೆಡೆ ಟ್ರಂಪ್ ಮತ್ತು ಮೋದಿಯ 22 ಕಿಲೋ ಮೀಟರ್ ದೂರದವರೆಗಿನ ರೋಡ್ ಶೋವನ್ನು 9 ಕಿಲೋಮೀಟರ್ ಗೆ ಕಡಿತಗೊಳಿಸಲಾಗಿದೆ ಎಂದು ವರದಿ ತಿಳಿಸಿದೆ.

ನಿಗದಿತ ಕಾರ್ಯಕ್ರಮದಂತೆ ಫೆ.24ರಂದು ಗುಜರಾತ್ ಗೆ ಆಗಮಿಸಲಿರುವ ಟ್ರಂಪ್ ಅವರನ್ನು ಮೋದಿ ಅವರು ಬರಮಾಡಿಕೊಂಡ ನಂತರ ಉಭಯ ನಾಯಕರು ಅಹಮದಾಬಾದ್ ವಿಮಾನ ನಿಮ್ದಾಣದಿಂದ ರೋಡ್ ಶೋ ಆರಂಭವಾಗಿ ಅದು ಮೊಟೆರಾದಿಂದ ಕೋಟೇಶ್ವರದ ಮೂಲಕ ಗಾಂಧಿನಗರ ತಲುಪುವುದಾಗಿತ್ತು. ಇದೀಗ ಗಾಂಧಿ ಆಶ್ರಮ ಭೇಟಿಯನ್ನು ಟ್ರಂಪ್ ರದ್ದುಪಡಿಸಿರುವುದಾಗಿ ವರದಿ ವಿವರಿಸಿದೆ.

9 ಕಿಲೋ ಮೀಟರ್ ಉದ್ದದ ರೋಡ್ ಶೋನಲ್ಲಿ 4 ಕಿಲೋ ಮೀಟರ್ ಗಾಂಧಿನಗರ ಸೇರಿದೆ. ಈ ಗಾಂಧಿನಗರ್ ರೋಡ್ ಶೋನ ವೇಳೆಯ ಭದ್ರತೆಯ ಹೊಣೆಯನ್ನು ವಿಶೇಷ ಭದ್ರತಾ ಪಡೆ ಜತೆ ಏಳು ಮಂದಿ ಎಸ್ಪಿ ದರ್ಜೆ ಅಧಿಕಾರಿಗಳು, 2000 ಪೊಲೀಸ್ ಸಿಬ್ಬಂದಿಗಳು ನೋಡಿಕೊಳ್ಳಲಿದ್ದಾರೆ. ಈ ಬಗ್ಗೆ ಗಾಂಧಿನಗರ್ ಪೊಲೀಸ್ ಮಹಾನಿರ್ದೇಶಕರಿಗೆ ಹೊಣೆಗಾರಿಕೆ ಒಪ್ಪಿಸಲಾಗಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜಗತ್ತಿನ ಅತೀ ದೊಡ್ಡ ಮೈದಾನವಾದ ಮೋಟೆರಾವನ್ನು ಅಹಮದಾಬಾದ್ ನಲ್ಲಿ ಉದ್ಘಾಟಿಸಲಿದ್ದಾರೆ. ಈ ವೇಳೆ ನಡೆಲಿರುವ ನಮಸ್ತೆ ಟ್ರಂಪ್ ಕಾರ್ಯಕ್ರಮದ ಸಂದರ್ಭದಲ್ಲಿ ಸುಮಾರು ಒಂದು ಲಕ್ಷ ಜನರು ಭಾಗವಹಿಸಲಿದ್ದಾರೆ ಎಂದು ವರದಿ ತಿಳಿಸಿದೆ.