2024ರ ಅಮೆರಿಕ ಚುನಾವಣೆಯಲ್ಲಿ ಸ್ಪರ್ಧೆ: ಟ್ರಂಪ್‌ ಸುಳಿವು!

ಒರ್ಲಾಂಡೊ : 2020ರ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸೋತು ಹೋಗಿದ್ದ ರಿಪಬ್ಲಿಕನ್‌ ಪಕ್ಷದ ನಾಯಕ ಡೊನಾಲ್ಡ್‌ ಟ್ರಂಪ್‌ ಸುಮ್ಮನೆ ಕುಳಿತಿಲ್ಲ. ತಣ್ಣಗೆ 2024ರ ಚುನಾವಣೆಗೆ ಸಿದ್ಧವಾಗುತ್ತಿದ್ದಾರೆ.

ಶನಿವಾರ ರಾತ್ರಿ ಸಿಪ್ಯಾಕ್‌ ಸಭೆಯಲ್ಲಿ ಮಾತನಾಡಿದ ಟ್ರಂಪ್‌, ನಾವು ಹಿಂದೆರಡು ಬಾರಿ ಸ್ಪರ್ಧಿಸಿದ್ದೇವೆ, ಮೂರನೇ ಬಾರಿಗೂ ಸ್ಪರ್ಧಿಸುತ್ತೇವೆ ಎಂದು ಹೇಳಿದ್ದಾರೆ. ಅದನ್ನು ಕಾರ್ಯಕರ್ತರು ಚಪ್ಪಾಳೆಯೊಂದಿಗೆ ಸ್ವಾಗತಿಸಿದ್ದಾರೆ. ಅಲ್ಲಿಗೆ ಮತ್ತೂಮ್ಮೆ ಅಧ್ಯಕ್ಷೀಯ ಚುನಾವಣೆಗೆ ಸ್ಪರ್ಧಿಸುವ ನೇರ ಸುಳಿವನ್ನು ನೀಡಿದ್ದಾರೆ.

ಇದೇ ವೇಳೆ ತನ್ನನ್ನು ಹೊಗಳಿಕೊಂಡ ಟ್ರಂಪ್‌, ತಾನೇ ಅಧ್ಯಕ್ಷನಾಗಿದ್ದರೆ ರಷ್ಯಾ, ಉಕ್ರೇನ್‌ ಮೇಲೆ ದಾಳಿ ಮಾಡುತ್ತಿರಲಿಲ್ಲ.

2020ರ ಚುನಾವಣೆಯಲ್ಲಿ ಮೋಸ ಮಾಡಿ ತನ್ನನ್ನು ಸೋಲಿಸದಿದ್ದರೆ, ಈಗ ರಷ್ಯಾ ಅಂತಹ ಧೈರ್ಯವನ್ನೇ ಮಾಡುತ್ತಿರಲಿಲ್ಲ ಎಂದೂ ಹೇಳಿದ್ದಾರೆ!

ಇದನ್ನೂ ಓದಿ:ರಷ್ಯಾದ “ಸುಯೆಜ್‌’ ರಾಕೆಟ್‌ ಉಡಾವಣೆ ಮುಂದೂಡಿಕೆ

ಬುಷ್‌ ಇದ್ದಾಗ ರಷ್ಯಾ ಜಾರ್ಜಿಯ ಮೇಲೆ, ಒಬಾಮ ಇದ್ದಾಗ ಕ್ರಿಮಿಯ ಮೇಲೆ, ಈಗ ಬೈಡೆನ್‌ ಹೊತ್ತಿನಲ್ಲಿ ಉಕ್ರೇನ್‌ ಮೇಲೆ ದಾಳಿ ಮಾಡಿದೆ. ತನ್ನ ಅವಧಿಯಲ್ಲಿ ಮಾತ್ರ ರಷ್ಯಾ ದಾಳಿಗಳ ಸಹವಾಸಕ್ಕೆ ಹೋಗಿಲ್ಲ ಎಂದಿದ್ದಾರೆ.

ಮಾತ್ರವಲ್ಲ ಪುಟಿನ್‌ ಈ ದಾಳಿಯಲ್ಲಿ ಬುದ್ಧಿವಂತಿಕೆ ತೋರಿದ್ದಾರೆ ಎಂಬ ತನ್ನ ಹೇಳಿಕೆಯನ್ನು ಸಮರ್ಥಿಸಿಕೊಂಡಿದ್ದಾರೆ.