ವಾಷಿಂಗ್ಟನ್‌: ಅಮೆರಿಕದ ಸರಕುಗಳಿಗೆ ಅತಿ ಹೆಚ್ಚು ತೆರಿಗೆ ವಿಧಿಸುವ ಭಾರತ ಮತ್ತಿತರ ರಾಷ್ಟ್ರಗಳ ವಿರುದ್ಧ ಟ್ರಂಪ್‌ ಪುನಃ ಕಿಡಿಕಾರಿದ್ದಾರೆ. ವೈಟ್‌ಹೌಸ್‌ನಲ್ಲಿ ಗುರುವಾರ, ತಮ್ಮ ರಿಪಬ್ಲಿಕನ್‌ ಪಕ್ಷದ ನಾಯಕರೊಂದಿಗೆ ಸಭೆ ನಡೆಸಿದ ಅವರು, ತಾವು ಜಾರಿಗೊಳಿಸಲು ಉದ್ದೇಶಿಸಿರುವ ರೆಸಿಪ್ರೋಕಲ್‌ ದರಗಳ ಕಾಯ್ದೆಯ ಬಗ್ಗೆ ಚರ್ಚಿಸಿ, ಭಾರತವು ಅಮೆರಿಕದ ವಿಸ್ಕಿ ಮೇಲೆ ಶೇ. 150 ತೆರಿಗೆ ವಿಧಿಸುತ್ತಿರುವುದನ್ನು ಆಕ್ಷೇಪಿಸಿದರು. ಜತೆಗೆ, 2 ನಿಮಿಷಗಳ ಮಾತುಕತೆಯ ಮೂಲಕ ಹಾರ್ಲೆ- ಡೇವಿಡ್‌ಸನ್‌ ಬೈಕ್‌ ಮೇಲೆ ಶೇ. 50ರಷ್ಟು ತೆರಿಗೆ ಇಳಿಸುವಂತೆ ಮಾಡಿದ್ದೇನೆ ಎಂದು ಹೇಳಿದರು. ಆದರೆ, ರೆಸಿಪ್ರೊಕಲ್‌ ತೆರಿಗೆ ಪದ್ಧತಿಗೆ ಟ್ರಂಪ್‌ ಅವರ ಪಕ್ಷದಲ್ಲೇ ಆಕ್ಷೇಪ ಎದ್ದಿದೆ. ಜತೆಗೆ, ಸಂಸತ್ತಿನ ಮೇಲ್ಮನೆಯಲ್ಲಿ ಡೆಮಾಕ್ರಟಿಕ್‌ ಸಂಸದರದ್ದೇ ಪ್ರಾಬಲ್ಯ ಇರುವುದರಿಂದ ಪ್ರಸ್ತಾವನೆಗೆ ಮಾನ್ಯತೆ ಸಿಗುವುದು ಅನುಮಾನ ಎನ್ನಲಾಗಿದೆ.
