ಹಾಲ್‌ ಟಿಕೆಟ್‌ ತಡೆ ಬೇಡ: ಸಿಬಿಎಸ್‌ಸಿ

ಹೊಸದಿಲ್ಲಿ: ಸಿಬಿಎಸ್‌ಸಿ ಪಠ್ಯಕ್ರಮ ಅಳವಡಿಸಿಕೊಂಡಿರುವ ಯಾವುದೇ ಶಾಲೆಗಳ ಆಡಳಿತ ಮಂಡಳಿಗಳು, ತಮ್ಮಲ್ಲಿ 10ನೇ ಹಾಗೂ 12ನೇ ತರಗತಿಯ ಅಂತಿಮ ಪರೀಕ್ಷೆ ತೆಗೆದುಕೊಳ್ಳಲಿರುವ ವಿದ್ಯಾರ್ಥಿಗಳ ಪರೀಕ್ಷಾ ಪ್ರವೇಶ ಪತ್ರವನ್ನು (ಹಾಲ್‌ ಟಿಕೆಟ್‌) ಯಾವುದೇ ಕಾರಣಕ್ಕೂ ತಡೆಹಿಡಿಯುವ ಹಾಗಿಲ್ಲ ಎಂದು ಸಿಬಿಎಸ್‌ಸಿ ಎಚ್ಚರಿಸಿದೆ.

ಮಾರ್ಚ್‌ 5ರಿಂದ ಸಿಬಿಎಸ್‌ಸಿ 10 ಮತ್ತು 12ನೇ ತರಗತಿ ಪರೀಕ್ಷೆಗಳು ಆರಂಭವಾಗಲಿವೆ. ಈ ವೇಳೆ, ಕೆಲ ಶಾಲೆಗಳ ಆಡಳಿತ ಮಂಡಳಿಗಳು, ಇತ್ತೀಚೆಗೆ ತಾವೇ ನಡೆಸಿರುವ ಪೂರ್ವಸಿದ್ಧತಾ (ಪ್ರೀ-ಫೈನಲ್‌) ಪರೀಕ್ಷೆಗಳಲ್ಲಿ ಕಡಿಮೆ ಅಂಕ ಪಡೆದ ವಿದ್ಯಾರ್ಥಿಗಳ ಹಾಲ್‌ ಟಿಕೆಟ್‌ಗಳನ್ನು ತಡೆಹಿಡಿದಿವೆ. ಇವುಗಳನ್ನು ವಿತರಿಸಲು ವಿದ್ಯಾರ್ಥಿ ಗಳಿಂದ ಶುಲ್ಕವನ್ನೂ ಪೀಕುತ್ತಿವೆ ಎಂಬ ದೂರುಗಳು ಕೇಳಿಬಂದಿದ್ದರಿಂದ ಸಿಬಿಎಸ್‌ಸಿ ಪರೀಕ್ಷಾ ಕಂಟ್ರೋಲರ್‌ ಕೆ.ಕೆ. ಚೌಧರಿ ಈ ಆದೇಶ ಹೊರ ಡಿಸಿದ್ದಾರೆ. ಅಲ್ಲದೆ, ಹಾಲ್‌ ಟಿಕೆಟ್‌ ಹಿಡಿದಿಟ್ಟುಕೊಳ್ಳುವುದು ಸಿಬಿಎಸ್‌ಸಿ ಪರೀಕ್ಷಾ ನಿಯಮಾವಳಿಗಳ 15ನೇ ನಿಯಮದ ಉಲ್ಲಂಘನೆ ಎಂದಿದ್ದಾರೆ.