ಡಿಕೆಶಿಗೆ ಇನ್ಮುಂದೆ ಏಸುಕುಮಾರ ಅನ್ನೋದು ಸೂಕ್ತ: ರೇಣುಕಾಚಾರ್ಯ

ಹೊನ್ನಾಳಿ: ಕನಕಪುರದಲ್ಲಿ ಏಸು ಪ್ರತಿಮೆ ನಿರ್ಮಾಣ ಮಾಡಲು ಹೊರಟಿರುವ ಡಿ.ಕೆ.ಶಿವಕುಮಾರ್‌ ಅವರನ್ನು ಏಸುಕುಮಾರ್‌ ಎನ್ನುವುದು ಸೂಕ್ತ ಎಂದು ಸಿಎಂ ರಾಜಕೀಯ ಕಾರ್ಯದರ್ಶಿ, ಶಾಸಕ ಎಂ.ಪಿ.ರೇಣುಕಾಚಾರ್ಯ ವ್ಯಂಗ್ಯವಾಡಿದರು.

ಶನಿವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕಾಲಭೈರವನ ವಂಶಸ್ಥರಾದ ಡಿ.ಕೆ.ಶಿವಕುಮಾರ್‌ ಯಾರನ್ನೋ ಮೆಚ್ಚಿಸಲು ಹೊರಟು ಏಸು ಪ್ರತಿಮೆ ನಿರ್ಮಾಣ ಮಾಡಲು ಪ್ರಯತ್ನಿಸುತ್ತಿರುವುದು ದುರಂತ. ಇನ್ನು ಮುಂದೆ ಅವರಿಗೆ ಏಸುಕುಮಾರ ಎಂದು ನಾಮಕರಣ ಮಾಡಬೇಕಿದೆ ಎಂದರು.

ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣಕ್ಕೆ ಹಾಗೂ ಗುಜರಾತಿನಲ್ಲಿ ಉಕ್ಕಿನ ಮನುಷ್ಯ ಸರ್ದಾರ್‌ ವಲ್ಲಭಭಾಯಿ ಪಟೇಲ್‌ ಪ್ರತಿಮೆ ನಿರ್ಮಾಣಕ್ಕೆ ವಿರೋಧ ವ್ಯಕ್ತಪಡಿಸಿದ ಕಾಂಗ್ರೆಸ್‌, ಈಗ ಏಸು ಪ್ರತಿಮೆ ಮಾಡಲು ಹೊರಟಿರುವ ಡಿಕೆಶಿಗೆ ಏನು ಹೇಳುತ್ತದೆ ಎಂದು ಪ್ರಶ್ನಿಸಿದರು. ಸರ್ಕಾರಿ ಸ್ಥಳದಲ್ಲಿ ಏಸು ಪ್ರತಿಮೆ ನಿರ್ಮಾಣ ಮಾಡಲು ನಾವು ಬಿಡುವುದಿಲ್ಲ. ಸಿಎಂ ಬಿಎಸ್‌ವೈ ಅವರಲ್ಲಿ ಈ ಬಗ್ಗೆ ಮಾತನಾಡುತ್ತೇನೆ ಎಂದು ಹೇಳಿದರು.