ವಿಶೇಷ ಎಣ್ಣೆ ಸ್ನಾನದ ಹಬ್ಬ ನರಕ ಚತುರ್ದಶಿ

ಸಂಭ್ರಮದ ಮೂರು ದಿನ ಆಚರಣೆಯ ದೀಪಾವಳಿಯಲ್ಲಿ ಮೊದಲ ದಿನ ನರಕ ಚತುರ್ದಶಿಯನ್ನಾಗಿ ಆಚರಿಸಲಾಗುತ್ತದೆ. ಈ ದಿನವನ್ನು ತುಳುನಾಡಿನಲ್ಲಿ ವಿಶೇಷವಾಗಿ ಸ್ನಾನದ ಹಬ್ಬ ಎಂದರೆ ತುಳುವಿನಲ್ಲಿ (ಮೀಪಿನ ಪರ್ಬ) ಎಂದು ಆಚರಿಸಲಾಗುತ್ತದೆ.

ತ್ರಯೋದಶಿಯ ದಿನ ಬಚ್ಚಲು ಮನೆಯ ನೀರಿನ ಹಂಡೆಗೆ ಶೇಡಿಯಿಂದ ರಂಗೋಲಿ ಬಿಡಿಸಿ ಹೂವಿನ ಹಾರ ಹಾಕಿ ಜಾಗಟೆ ಬಡಿದು ಪೂಜೆ ನಡೆಸಿದ ಅನಂತರ ನೀರು ತಂದು ಬಿಸಿ ಮಾಡಲಾಗುತ್ತದೆ. ಸಂಜೆಯ ಹೊತ್ತಿಗೆ ಎಳೆಯ ಮಕ್ಕಳಿದ್ದರೆ ಅವರನ್ನು ಅಂದೆ ಸ್ನಾನ ಮಾಡಿಸುವ ಕ್ರಮ ನಡೆಯುತ್ತದೆ. ಮತ್ತೆ ನೀರನ್ನು ಭರ್ತಿಗೊಳಿಸಿ ರಾತ್ರಿ ಕಾಯಿಸಿ ಬಿಸಿಯಾದ ನೀರನ್ನು ಬೆಳಗ್ಗೆ ಮನೆಯ ಪ್ರತಿಯೊಬ್ಬರು ಮೈಗೆ ಎಣ್ಣೆ ಹಚ್ಚಿಕೊಂಡು ಸ್ನಾನ ಮಾಡಿ, ಹೊಸ ಬಟ್ಟೆ ತೊಡುವ ಸಂಪ್ರದಾಯದಿಂದ ನಡೆಯುತ್ತಿತ್ತು. ಈಗ ಅದೆಲ್ಲ ಕಡಿಮೆಯಾಗಿ ಗೀಸರ್‌ ಮೂಲಕ ನೀರು ಬಿಸಿ ಮಾಡಿ ಶಾಸ್ತ್ರಕ್ಕಾಗಿ ಎಣ್ಣೆ ಹಚ್ಚಿ ಸ್ನಾನ ಮಾಡುವ ಕ್ರಮ ನಡೆಯುತ್ತಿದೆ.

ಈ ಕ್ರಮವನ್ನು ಪುರಾಣದಲ್ಲಿ ವಿವರಿಸಿದಂತೆ ನರಕಾಸುರ ಎಂಬ ರಾಕ್ಷಸನ ವಧೆಯಾದ ದಿನವಾಗಿ ಆತನ ನೆನಪಿಗಾಗಿ ಶ್ರೀಕೃಷ್ಣ ದೇವರು ಕೊಟ್ಟ ವರದಂತೆ ಈ ಸ್ನಾನ ನಡೆಯುತ್ತದೆ ಎಂಬುದು ವಾಡಿಕೆ. ಹಿಂದಿನ ಹಿರಿಯರು ತಿಳಿಸಿದಂತೆ ದೀಪಾವಳಿ ಅನಂತರ ಬರುವುದು ಕಟುವಾದ ಚಳಿಗಾಲವನ್ನು ಎದುರಿಸಲು ದೇಹ ಮತ್ತು ಚರ್ಮವನ್ನು ಸುರಕ್ಷೆಯಾಗಿಡುವುದಕ್ಕೆ ಎಣ್ಣೆ ಸ್ನಾನ ಮಾಡುತ್ತಿದ್ದರು. ಇದರ ಜತೆಗೆ ಭತ್ತ ಕೊಯ್ಲಿನ ದಣಿವಾರಿಸಿಕೊಳ್ಳಲು ದೇಹಕ್ಕೆ ಹೊಸ ಚೈತನ್ಯ ತುಂಬಲು ಕೂಡ ಇದು ಅನುಕೂಲವಾಗುತ್ತಿತ್ತು.

– ಶ್ರೀಧರ ಆಳ್ವ ಬಪ್ಪನಾಡುಗುತ್ತು , ಮೂಲ್ಕಿ