ಶವ ಅದಲು ಬದಲು: ಸೋಂಕಿಲ್ಲದ ವ್ಯಕ್ತಿಯ ಕುಟುಂಬಕ್ಕೆ ಸೋಂಕಿತನ ಶವ ನೀಡಿ ಯಡವಟ್ಟು!

ಕರ್ನೂಲ್: ಕೋವಿಡ್ ಸೋಂಕೇ ತಗಲದ ಮೃತವ್ಯಕ್ತಿಯ ಕುಟುಂಬಕ್ಕೆ ಈ ಸೋಂಕಿನಿಂದ ಮೃತಪಟ್ಟವನ ಶವವನ್ನು ಹಸ್ತಾಂತರಿಸಿ ಕರ್ನೂಲ್‌ ಸರ್ಕಾರಿ ಆಸ್ಪತ್ರೆ ಎಡವಟ್ಟು ಮಾಡಿಕೊಂಡಿರುವ ಘಟನೆ ವರದಿಯಾಗಿದೆ.

66 ವರ್ಷದ ರಾಮ್‌ ಬಾಬು ಹಾಗೂ ಕೋವಿಡ್ ಸೋಂಕಿತನೊಬ್ಬ ಒಂದೇ ದಿನ ಮೃತಪಟ್ಟಿದ್ದರು. ಇಬ್ಬರ ಗಂಟಲದ್ರವ ಮಾದರಿಗಳನ್ನೂ ಕೋವಿಡ್ ಟೆಸ್ಟ್‌ಗೆ ಕಳಿಸಿ, ಮೃತಶರೀರಗಳನ್ನು ಶವಾಗಾರದಲ್ಲಿ ಇಡಲಾಗಿತ್ತು.

ವರದಿ ಬಂದ ಬಳಿಕ, ರಾಮ್‌ಬಾಬು ಕುಟುಂಬಕ್ಕೆ ಕೋವಿಡ್ ಪಾಸಿಟಿವ್‌ನಿಂದ ಮೃತಪಟ್ಟ ವ್ಯಕ್ತಿಯ ಶರೀರ ಹಸ್ತಾಂತರಿಸಲಾಗಿದೆ. ಕುಟುಂಬ ಕೂಡ ಪರೀಕ್ಷಿಸದೆ, ಶವಸಂಸ್ಕಾರ ನಡೆಸಿದೆ. ಆಸ್ಪತ್ರೆಯಿಂದ ವಾಸ್ತವ ಗೊತ್ತಾದಾಗ ಎಲ್ಲರೂ ಕಳವಳಕ್ಕೆ ಒಳಗಾಗಿದ್ದಾರೆ.

ಇದೀಗ ರಾಮ್‌ಬಾಬು ಪುತ್ರ ತಮ್ಮ ತಂದೆಯ ಶವ ಮರಳಿಸುವಂತೆ ಹಠ ಹಿಡಿದಿದ್ದಾರೆ.