ಬೆಂಗಳೂರು: ವಿವಾಹಿತ ಮಹಿಳೆಯೊಬ್ಬರಿಗೆ ಪದೇ ಪದೇ ಕರೆ ಮಾಡಿ ಲೈಂಗಿಕ ಕ್ರಿಯೆಗೆ ಆಹ್ವಾನಿಸುತ್ತಿದ್ದ ಆರೋಪಿಯನ್ನು ಪೀಣ್ಯ ಪೊಲೀಸರು ಯೋಜನೆ ರೂಪಿಸಿ ಬಂಧಿಸಿದ್ದಾರೆ. ತುಮಕೂರಿನ ಶ್ರೀಮಂತ್‌ (23) ಬಂಧಿತ ಆರೋಪಿ. ಮಹಿಳೆಯೊಬ್ಬರು ಸಂಬಂಧಿಕರಿಗೆ ದೂರವಾಣಿ ಕರೆ ಮಾಡುವ ಸಂದರ್ಭದಲ್ಲಿ ರಾಂಗ್‌ ನಂಬರ್ ಡಯಲ್‌ ಮಾಡಿದ್ದರು.
ಆಗ ಕರೆ ಸ್ವೀಕರಿಸಿದ್ದ ಆರೋಪಿ ಅದೇ ನಂಬರ್‌ಗೆ ಪದೇ ಪದೇ ಕರೆ ಮಾಡಿ ಅಶ್ಲೀಲವಾಗಿ ವರ್ತಿಸಿ ಲೈಂಗಿಕ ಕ್ರಿಯೆಗೆ ಆಹ್ವಾನಿಸುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ದಾಸರಹಳ್ಳಿ ವಾಸಿ ಮಹಿಳೆಯೊಬ್ಬರು ಫೆ.25ರಂದು ತನ್ನ ಸಂಬಂಧಿಗೆ ಕರೆ ಮಾಡಲು ಹೋಗಿ ರಾಂಗ್‌ ನಂಬರ್ ಡಯಲ್‌ ಮಾಡಿದ್ದರು. ಆ ಕರೆ ಆಕಸ್ಮಿಕವಾಗಿ ತುಮಕೂರಿನ ಆಟೋಚಾಲಕ ಶ್ರೀಮಂತ್‌ಗೆ ಸಂಪರ್ಕವಾಗಿತ್ತು.
ಇದು ಗೊತ್ತಾದ ಕೂಡಲೇ ತಪ್ಪಾಗಿದೆ ಎಂದು ಹೇಳಿ ಮಹಿಳೆ ಕರೆ ಸ್ಥಗಿತಗೊಳಿಸಿದ್ದರು. ಆದರೆ ಶ್ರೀಮಂತ್‌, ಮಹಿಳೆಯ ಮೊಬೈಲ್‌ ನಂಬರ್ ಸೇವ್‌ ಮಾಡಿಕೊಂಡು ನಿತ್ಯ ಕರೆ ಮಾಡಿ ಅಶ್ಲೀಲವಾಗಿ ಮಾತನಾಡುತ್ತಿದ್ದ. ಜತೆಗೆ ಅಶ್ಲೀಲ ಸಂದೇಶಗಳನ್ನು ಕಳುಹಿಸುತ್ತಿದ್ದ. ಈ ಕೃತ್ಯದಿಂದ ಆಘಾತಗೊಂಡ ಮಹಿಳೆ ತನ್ನ ಪತಿಗೆ ವಿಷಯ ತಿಳಿಸಿದ್ದು ಫೆ. 28ರಂದು ಪೀಣ್ಯ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
ಟ್ರ್ಯಾಪ್‌ಗೆ ಸಿಲುಕಿದ ಆರೋಪಿ
ಆರೋಪಿಯ ಬಂಧನಕ್ಕೆ ಬಲೆ ಬೀಸಿದ ಪೊಲೀಸರು, ದೂರುದಾರ ಮಹಿಳೆಗೆ ಮೊದಲಿನಂತೆ ಆರೋಪಿ ಶ್ರೀಮಂತ್‌ ಜತೆ ಮಾತನಾಡುವಂತೆ ಹೇಳಿ ಬೆಂಗಳೂರಿಗೆ ಬರುವಂತೆ ಸೂಚಿಸಿದ್ದಾರೆ. ಪೊಲೀಸರ ಕಾರ್ಯ ತಂತ್ರತೆಗೆ ಅನುಗುಣವಾಗಿ ಮಹಿಳೆ ಶ್ರೀಮಂತ್‌ ಜೊತೆ ಮಾತನಾಡಿ ನಗರದ 8ನೇ ಮೈಲಿಯ ಜಂಕ್ಷನ್‌ಗೆ ಬರುವಂತೆ ಹೇಳಿದ್ದಾರೆ.
ಇದನ್ನು ನಂಬಿದ್ದ ಶ್ರೀಮಂತ್‌ ಮಾರ್ಚ್‌ 1ರಂದು ಮಹಿಳೆ ಹೇಳಿದ ಸ್ಥಳಕ್ಕೆ ಬಂದು ನಿಂತಿದ್ದ. ಈ ವೇಳೆ ಮಹಿಳೆ, ಆಕೆಯ ಪತಿ ಸಂಬಂಧಿಕರು ಆರೋಪಿಯನ್ನು ಹಿಡಿದು ಹಿಗ್ಗಾಮುಗ್ಗಾ ಥಳಿಸಿದ್ದಾರೆ. ಕೂಡಲೇ ಸ್ಥಳಕ್ಕೆ ಧಾವಿಸಿದ ಪೊಲೀಸರು ಆರೋಪಿಯನ್ನು ಬಂಧಿಸಿದರು.
