ಸ್ಟಾರ್‌ ಗಳ ಸುತ್ತ ಆಗಾಗ ಹೊಸ ಸಿನಿಮಾಗಳ ಕುರಿತಾದ ಅಂತೆ-ಕಂತೆಗಳು ಓಡಾಡುತ್ತಲೇ ಇರುತ್ತವೆ. ಅದರಲ್ಲೂ ಪರಭಾಷೆಯಲ್ಲೂ ಮಿಂಚಿ ಬಂದಿರುವ ಸ್ಟಾರ್‌ಗಳಾದರೆ, ಅವರ ಕುರಿತಾಗಿ ಸ್ವಲ್ಪ ಹೆಚ್ಚೇ ಸುದ್ದಿಗಳು ಓಡಾಡುತ್ತವೆ. ಈಗ ಯಾಕೆ ಈ ವಿಚಾರ ಎಂದು ನೀವು ಕೇಳಬಹುದು. ಅದಕ್ಕೆ ಉತ್ತರ ನಟ ಕಿಚ್ಚ ಸುದೀಪ್‌ ಸುತ್ತ ಸುತ್ತುತ್ತಿರುವ ಎರಡು ಸಿನಿಮಾ ಗಳ ಸುದ್ದಿಗಳು.
ಹೌದು, ಕಿಚ್ಚ ಸುದೀಪ್‌ ಬಹು ಭಾಷಾ ನಟ. ಅದರಲ್ಲೂ ತೆಲುಗಿನಲ್ಲಿ ಸುದೀಪ್‌ ಅವರಿಗೆ ದೊಡ್ಡ ಅಭಿಮಾನಿ ವರ್ಗವಿದೆ. ಇದೇ ಕಾರಣದಿಂದ ತೆಲುಗಿನ ಇಬ್ಬರು ಸ್ಟಾರ್‌ ನಟರ ಚಿತ್ರಗಳಲ್ಲಿ ಸುದೀಪ್‌ ಹೆಸರು ಕೇಳಿ ಬರುತ್ತಿದೆ.
ಅಲ್ಲು ಅರ್ಜುನ್ ನಾಯಕರಾಗಿರುವ ಹೊಸ ಸಿನಿಮಾದಲ್ಲಿ ಸುದೀಪ ಪ್ರಮುಖ ಪಾತ್ರ ಮಾಡಲಿದ್ದಾರೆಂಬುದು ಒಂದು ಸುದ್ದಿಯಾದರೆ, ಶಂಕರ್‌ ನಿರ್ದೇಶನದಲ್ಲಿ ರಾಮ್‌ ಚರಣ್‌ ನಟಿಸಲಿರುವ ಹೊಸ ಸಿನಿಮಾದಲ್ಲೂ ನಟಿಸಲಿದ್ದು, ಈಗಾಗಲೇ ಮಾತುಕತೆ ಕೂಡಾ ನಡೆಸಲಾಗಿದೆ ಎಂಬುದು ಮತ್ತೂಂದು. ಇದರ ನಡುವೆಯೇ ಪ್ರಭಾಸ್‌ ನಟನೆಯ “ಆದಿ ಪುರುಷ’ ಚಿತ್ರದಲ್ಲೂ ಸುದೀಪ್‌ ನಟಿಸಲಿದ್ದಾರೆ ಎಂಬ ಸುದ್ದಿಕೇಳಿ ಬರುತ್ತಿದೆ.
ಆದರೆ, ಈ ಮೂರು ಸುದ್ದಿ ಗಳು ಅಧಿಕೃತವಾಗಿಲ್ಲ. ಏಕೆಂದರೆ ಈ ಬಗ್ಗೆ ಸುದೀಪ್‌ ಆಗಲೀ, ಆಯಾ ಸಿನಿಮಾ ತಂಡದವರಗಲೀ ಯಾವುದೇ ಮಾಹಿತಿ ನೀಡಿಲ್ಲ. ಇದಲ್ಲದೇ, ಕನ್ನಡದಲ್ಲಿ ಅವರ ಮುಂದಿನ ಚಿತ್ರ ಯಾವಾಗ ಆರಂಭವಾಗುತ್ತದೆ, ಯಾರ ಜೊತೆಗೆ ಎಂಬ ಕುತೂಹಲವೂ ಅವರ ಅಭಿಮಾನಿಗಳಲ್ಲಿದೆ.
ಸದ್ಯ ಸುದೀಪ್‌ ಅವರ ನಟನೆಯ ಎರಡು ಚಿತ್ರ ಗಳು ಬಿಡುಗಡೆಯ ಹಂತಕ್ಕೆ ಬಂದಿವೆ. “ಕೋಟಿಗೊಬ್ಬ-3′ ಹಾಗೂ “ವಿಕ್ರಾಂತ್‌ ರೋಣ’ ಚಿತ್ರ ಗಳು ಬಿಡುಗಡೆಯಾಗಲಿವೆ. ಈ ಎರಡೂ ಚಿತ್ರ ಗಳ ಮೇಲೂ ಸುದೀಪ್‌ ಅವರ ಅಭಿಮಾನಿಗಳಿಗೆ ನಿರೀಕ್ಷೆ ಇದೆ.
