ಕರಿ ಮೇಕೆಗೆ ಡಿಮ್ಯಾಂಡಪ್ಪೋ ಡಿಮ್ಯಾಂಡು

ವಿಜಯಪುರ: ಇಸ್ಲಾಂ ಧರ್ಮೀಯರ ಪವಿತ್ರ ಬಕ್ರೀದ್‌ ಹಬ್ಬಕ್ಕಾಗಿ ವಿಜಯಪುರ ಜಿಲ್ಲೆ ಸಂಪೂರ್ಣ ಸಿದ್ಧವಾಗಿದ್ದು,
ಹಬ್ಬದಲ್ಲಿ ಬಲಿ ಕೊಡಲು ಕುರಿ-ಮೇಕೆಗಳನ್ನು ಕೊಂಡು ಸಾಕುತ್ತಿದ್ದಾರೆ. ಹಬ್ಬದ ಹಿನ್ನೆಲೆ ಆರೇಳು ಸಾವಿರ ರೂ.
ಗೆ ಮಾರಾಟವಾಗುವ ಕುರಿ-ಮೇಕೆಗಳು 50 ಸಾವಿರ ರೂ.ವರೆಗೆ ಮಾರಾಟವಾಗುತ್ತಿವೆ. ಹಣೆ ಮೇಲೆ ಬಿಳಿ
ಕೂದಲಿರುವ ಕರಿ ಮೇಕೆಗಳಿಗೆ ಭಾರಿ ಬೇಡಿಕೆ ಕಂಡು ಬಂದಿದೆ.

 ದೈಹಿಕವಾಗಿ ಎತ್ತರ, ಉದ್ದನೆಯ ದೇಹ ರಚನೆ, ಅಧಿಕ ಕೊಬ್ಬಿದ ಮೈಮಾಟ ಹೊಂದಿರುವ ಮೇಕೆ, ಹೋತು, ಟಗರು, ಕುರಿಗಳಿಗೆ ಅಧಿಕ ಬೇಡಿಕೆ ಇದೆ. ಇಂತ ಮೇಕೆ-ಕುರಿಗಳು 50 ಸಾವಿರ ರೂ. ವರೆಗೆ ಮಾರಾಟವಾಗಿವೆ. ಇಸ್ಲಾಂ ಧರ್ಮ ಬಕ್ರೀದ್‌ ಹಬ್ಬದಲ್ಲಿ ಅತ್ಯಗತ್ಯ. ಹೀಗಾಗಿ ಹಲವು ರೈತರು ಈ ಹಬ್ಬಕ್ಕೆಂದೇ ಹಬ್ಬೆ ಕೆಲವು ತಿಂಗಳ ಮೊದಲೇ ಮರಿಗಳನ್ನು ಕೊಂಡು, ಅವುಗಳಿಗೆ ಪೌಷ್ಟಿಕ ಆಹಾರ ನೀಡಿ ಟಗರು-ಹೋತುಗಳನ್ನು ಆರೈಕೆ ಮಾಡಿ ಸಾಕಿ, ಮಾರಾಟ ಮಾಡಿದ್ದಾರೆ. 

ವಿಜಯಪುರ ಜಿಲ್ಲೆಯಲ್ಲಿ ಪ್ರತಿ ತಾಲೂಕು ದೊಡ್ಡ ದೊಡ್ಡ ಹೋಬಳಿ ಕೇಂದ್ರಗಳ ಪಟ್ಟಣಗಳಲ್ಲಿ ಕಳೆದ ಎರಡು ವಾರಗಳಿಂದ ಜಾನುವಾರು ಮಾರುಕಟ್ಟೆಯಲ್ಲಿ ಟಗರು, ಕುರಿ, ಮೇಕೆ, ಹೋತುಗಳ ಮಾರಾಟ ಜೋರಾಗಿದೆ. ಬಕ್ರೀದ್‌ ಹಬ್ಬದಲ್ಲಿ ಇಸ್ಲಾಂ ಧರ್ಮೀಯರಿಗೆ ಬಕ್ರಾ (ಕುರಿ) ಬಲಿ ಕೊಟ್ಟು ಅದರ ಪ್ರಸಾದವನ್ನೇ ಅಲ್ಹಾನಿಗೆ ಅರ್ಪಿಸುವುದು ಕಡ್ಡಾಯ ಎಂಬ ಧಾರ್ಮಿಕ ಆಚರಣೆ ಇದೆ. ಹೀಗಾಗಿ ಬಕ್ರೀದ್‌ ಹಬ್ಬದಲ್ಲಿ ಮೇಕೆ-ಕುರಿಗಳನ್ನು ಕೊಳ್ಳಲು ಮುಗಿ ಬೀಳುತ್ತಾರೆ.

ಎತ್ತರ ಗಾತ್ರದ ಅಧಿಕ ತೂಕ ಇರುವ ಇಂತ ಹೋತುಗಳನ್ನು 1 ಲಕ್ಷ ರೂ.ಗೆ ಕೊಳ್ಳುವ ಜನರು ಇದ್ದಾರೆ. ಬಕ್ರೀದ್‌ ಹಬ್ಬಕ್ಕಾಗಿ ನಗರದಲ್ಲಿ ಅಬ್ದುಲ್‌ ಕರೀಂ ಹೊನ್ನುಟಟಗಿ ಎಂಬವರು ವಿಜಯಪುರ ತಾಲೂಕು ಅರಕೇರಿ ರೈತರಿಂದ 55 ಸಾವಿರ ರೂ.ಗೆ ಮೈಗೂದಲು ಬಿಳಿ ಇರುವ ಮೇಕೆ ಖರೀದಿಸಿದ್ದಾರೆ. 

ಮಹ್ಮದ್‌ ಯಾಸೀನ್‌ ತಡವಲಾ ಎಂಬವರು ಬೆಳಗಾವಿ ಜಿಲ್ಲೆಯ ರಾಯಬಾಗನ ರೈತರ ಮನೆಗೆ ನೇರವಾಗಿ ಹೋಗಿ ತಲಾ 30 ಸಾವಿರ ರೂ.ಗೆ ಒಂದರಂತೆ ಎರಡು ಹೋತು ಕೊಂಡು ತಂದಿದ್ದಾರೆ. ಕಳೆದ ಹಲವು ದಿನಗಳ ಹಿಂದೆಯೇ ಈ ಹೋತುಗಳನ್ನು ತಂದಿದ್ದು, ಮನೆಯಲ್ಲಿ ಅವುಗಳಿಗೆ ಹಸಿರು ಹುಲ್ಲು, ಆಹಾರ ಧಾನ್ಯಗಳ ಕೈ ಹಿಂಡಿ ನೀಡು ಮತ್ತಷ್ಟು ಬಲಿಷ್ಠವಾಗಿ ಸಾಕಿದ್ದಾರೆ.

 ಎತ್ತರ ದೇಹ, ಕೊಬ್ಬಿದ ದೈಹಿಕ ಸ್ಥಿತಿ ಇರುವ ಮೇಕೆಗಳನ್ನು ಕೊಳ್ಳುತ್ತೇವೆ. ಆರೋಗ್ಯವಂತ ಮೇಕೆಗಳ ಮಾಂಸ ಸೇವನೆಯಿಂದ ಮನುಷ್ಯರಿಗೂ ಯಾವುದೇ ಬಾಧೆ ಇರುವುದಿಲ್ಲ ಎಂಬ ಸದಾಶಯವೂ ಇದರ ಹಿಂದೆ. ಹೀಗಾಗಿ ಅಧಿಕ ಕೊಬ್ಬಿದ ಆರೋಗ್ಯವಂತ ಮೇಕೆ-ಕುರಿಗೆ ಸಾಮಾನ್ಯವಾಗಿ ಅಧಿಕ ಬೆಲೆ ಇರುತ್ತದೆ. ಸಾಮಾನ್ಯ ದಿನಗಳಿಗಿಂತ ಹಬ್ಬದ ಸಂದರ್ಭದಲ್ಲಿ ಇಂತ ಕುರಿ-ಮೇಕೆಗಳಿಗೆ ಹೆಚ್ಚಿನ ಬೇಡಿಕೆ ಇರುವ ಕಾರಣ, ಬೆಲೆಯೂ ಸಾಮಾನ್ಯವಾಗಿ ದ್ವಿಗುಣ ಇರುತ್ತದೆ ಎನ್ನುತ್ತಾರೆ ಸ್ಥಳೀಯರು. 

„ಜಿ.ಎಸ್‌. ಕಮತರ