ವಶೀಕೃತ ದಾಖಲೆಗಳ ಪ್ರತಿ ವಾದ್ರಾಗೆ ನೀಡಲು ಕೋರ್ಟ್‌ ನಿರ್ದೇಶ

ಹೊಸದಿಲ್ಲಿ : ಹಣ ಅಕ್ರಮ ಕೇಸುಗಳಿಗೆ ಸಂಬಂಧಿಸಿ ಕಳೆದ ವರ್ಷ ರಾಬರ್ಟ್‌ ವಾದ್ರಾ ಕಚೇರಿ ಮೇಲೆ ದಾಳಿ ನಡೆಸಲಾದ ಸಂದರ್ಭದಲ್ಲಿ ವಶಪಡಿಸಿಕೊಳ್ಳಲಾಗಿದ್ದ ದಾಖಲೆ ಪತ್ರಗಳ ಸಾಫ್ಟ್ ಮತ್ತು ಹಾರ್ಡ್‌ ಪ್ರತಿಗಳನ್ನು  ವಾದ್ರಾಗೆ ಒದಗಿಸುವಂತೆ ದಿಲ್ಲಿ ಕೋರ್ಟ್‌ ಇಂದು ಸೋಮವಾರ ಜಾರಿ ನಿರ್ದೇಶನಾಲಯಕ್ಕೆ (ಇಡಿ) ನಿರ್ದೇಶ ನೀಡಿದೆ.

ವಶಪಡಿಸಿಕೊಳ್ಳಲಾದ ದಾಖಲೆ ಪತ್ರಗಳ ಪ್ರತಿಗಳನ್ನು ತನಗೆ ನೀಡುವ ತನಕ ತನ್ನನ್ನು ಜಾರಿ ನಿರ್ದೇಶನಾಲಯ ಪ್ರಶ್ನಿಸುವ ಪ್ರಕ್ರಿಯೆಗೆ ತಡೆ ನೀಡುವಂತೆ ಕೋರಿರುವ ವಾದ್ರಾ ಅವರ ಪ್ರತ್ಯೇಕ ಮನವಿಯನ್ನು ತಾನು ಇಂದು ಮಧ್ಯಾಹ್ನ 2 ಗಂಟೆಗೆ ವಿಚಾರಣೆಗೆ ಎತ್ತಿಕೊಳ್ಳುವುದಾಗಿ ವಿಶೇಷ ಸಿಬಿಐ ನ್ಯಾಯಾಧೀಶ ಅರವಿ ಕುಮಾರ್‌ ಹೇಳಿದರು. 

ಜಾರಿ ನಿರ್ದೇಶಲಾಯ ತಾನು ವಶಪಡಿಸಿಕೊಂಡಿರುವ ದಾಖಲೆ ಪತ್ರಗಳ ಆಧಾರದಲ್ಲಿ ತನ್ನನ್ನು ಪ್ರಶ್ನಿಸುತ್ತಿರುವುದರಿಂದ ಆ ದಾಖಲೆ ಪತ್ರಗಳ ಪ್ರತಿಗಳನ್ನು ತನಗೆ ಒದಗಿಸಬೇಕೆಂದು ಕೋರಿ ವಾದ್ರಾ ಕಳೆದ ಶನಿವಾರ ಕೋರ್ಟಿಗೆ ಮನವಿ ಮಾಡಿಕೊಂಡಿದ್ದರು.