ಮೂಲ ಕಾಂಗ್ರೆಸಿಗರಿಂದಲೇ ಸಿದ್ದು ಸೋಲು

ಭೇರ್ಯ: ಕಾಂಗ್ರೆಸ್‌ ಅಧಿಕಾರಕ್ಕೆ ಬಂದರೆ ಸಿದ್ದರಾಮಯ್ಯನವರೇ ಮತ್ತೆ ಸಿಎಂ ಎಂದು ಎಐಸಿಸಿ ಅಧ್ಯಕ್ಷ ರಾಹುಲ್‌ಗಾಂಧಿ ಪರೋಕ್ಷ ಹೇಳಿಕೆ ನೀಡಿರುವ ಕಾರಣ, ಮೂಲ ಕಾಂಗ್ರೆಸಿಗರೇ ಸಿದ್ದು ಅವರನ್ನು ಸೋಲಿಸುತ್ತಾರೆ ಎಂದು ಮಾಜಿ ಸಂಸದ ಮತ್ತು ಜೆಡಿಎಸ್‌ ರಾಜ್ಯ ಪ್ರಚಾರ ಸಮಿತಿ ಅಧ್ಯಕ್ಷ ಎಚ್‌.ವಿಶ್ವನಾಥ್‌ ಭವಿಷ್ಯ ನುಡಿದರು. 

ಸಮೀಪದ ಮಾರಗೌಡನಹಳ್ಳಿ ಗ್ರಾಮದ ಬಸವೇಶ್ವರ ದೇಗುಲದಲ್ಲಿ ಪೂಜೆ ಸಲ್ಲಿಸಿ ಕೆ.ಆರ್‌.ನಗರ ಕ್ಷೇತ್ರದ ಜೆಡಿಎಸ್‌ ಅಭ್ಯರ್ಥಿ ಸಾ.ರಾ.ಮಹೇಶ್‌ ಚುನಾವಣಾ ಪ್ರಚಾರಕ್ಕೆ ಚಾಲನೆ ನೀಡಿ ಸುದ್ದಿಗಾರರೊಂದಿಗೆ ಮಾತನಾಡಿದರು. ರಾಜ್ಯ ಕಾಂಗ್ರೆಸ್‌ ಅವನತಿಯ ಹಾದಿ ಹಿಡಿದಿದೆ. ಆ ಪಕ್ಷದ ನಾಯಕತ್ವ ಬಲಹೀನಗೊಂಡಿದೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ನಡತೆಯಿಂದ ಮೂಲ ಕಾಂಗ್ರೆಸಿಗರು ದೂರ ಸರಿಯುತ್ತಿದ್ದಾರೆ.

ಯಾವುದೇ ಕಾರಣಕ್ಕೂ ಕಾಂಗ್ರೆಸ್‌ ಮತ್ತೆ ಅಧಿಕಾರಕ್ಕೆ ಬರಲು ಸಾಧ್ಯವಿಲ್ಲ. ಕೇಂದ್ರ ಸರ್ಕಾರ ಮಹದಾಯಿ ಯೋಜನೆ ಸೇರಿದಂತೆ ರಾಜ್ಯದ ಸಮಸ್ಯೆಗಳನ್ನು ಪರಿಹರಿಸಲು ಯಾವುದೇ ಪ್ರಯತ್ನ ಮಾಡಿಲ್ಲ. ಆದರೂ ಬಿಜೆಪಿಯವರು ಕೇವಲ ಅಧಿಕಾರದ ಆಸೆಗಾಗಿ ಇನ್ನಿಲ್ಲದ ಪ್ರಯತ್ನ ಮಾಡುತ್ತಿದ್ದಾರೆ. ಆದರಿಂದ ರಾಜ್ಯದ ಜನತೆ ಎರಡೂ ರಾಷ್ಟ್ರೀಯ ಪಕ್ಷಗಳನ್ನು ತಿರಸ್ಕರಿಸಲು ತೀರ್ಮಾನಿಸಿದ್ದಾರೆ. ನಾಡಿನ ಹಿತಕ್ಕಾಗಿ ಜೆಡಿಎಸ್‌ ಬೆಂಬಲಿಸಲಿದ್ದಾರೆ ಎಂದು ಹೇಳಿದರು.

ಮೈಸೂರು ಜಿಲ್ಲೆಯ 11ರಲ್ಲಿ ಕನಿಷ್ಠ 8 ಕ್ಷೇತ್ರಗಳಲ್ಲಿ ಜೆಡಿಎಸ್‌ ಅಭ್ಯರ್ಥಿಗಳು ಜಯಗಳಿಸಲಿದ್ದು, 40 ವರ್ಷ ತನಗೆ ಬೆಂಬಲ ನೀಡಿದ ಮತದಾರರು, ಈ ಬಾರಿ ಸಾ.ರಾ.ಮಹೇಶ್‌ ಅವರನ್ನು ಬೆಂಬಲಿಸಬೇಕು. ರಾಜ್ಯದ ಉದ್ದಗಲಕ್ಕೂ ಎಚ್‌.ಡಿ.ಕುಮಾರಸ್ವಾಮಿ ಪರ ಅಲೆ ಇದೆ. ಕನಿಷ್ಠ 113 ಸ್ಥಾನ ಗಳಿಸಿ ಪಕ್ಷ ಮೇ18 ರಂದು ಸರ್ಕಾರ ರಚನೆ ಮಾಡುವುದು ಖಚಿತ ಎಂದರು.

ಬಿರುಸಿನ ಪ್ರಚಾರ: ಅಡಗೂರು, ಮಾರಗೌಡನಹಳ್ಳಿ, ಗಳಿಗೆಕೆರೆ, ದೊಡ್ಡಕೊಪ್ಪಲು ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಶಾಸಕ ಸಾ.ರಾ.ಮಹೇಶ್‌ ಪ್ರಚಾರ ನಡೆಸಿದರು. ಇದೇವೇಳೆ ಇತರೆ ಪಕ್ಷಗಳ ಮುಖಂಡರು ಜೆಡಿಎಸ್‌ ಸೇರಿದರು. 

ಜಿಪಂ ಮಾಜಿ ಉಪಾಧ್ಯಕ್ಷ ಎ.ಎಸ್‌.ಚನ್ನಬಸಪ್ಪ, ಮೈಮುಲ್‌ ನಿರ್ದೇಶಕ ಎ.ಟಿ.ಸೋಮಶೇಖರ್‌, ಜೆಡಿಎಸ್‌ ವಕ್ತಾರ ಕೆ.ಎಲ್‌.ರಮೇಶ್‌, ತಾಲೂಕು ಜೆಡಿಎಸ್‌ ಅಧ್ಯಕ್ಷ ಚಂದ್ರಶೇಖರ್‌, ಯುವ ಘಟಕದ ಅಧ್ಯಕ್ಷ ಎಚ್‌.ಆರ್‌.ಮಧುಚಂದ್ರ,  ಮಿರ್ಲೆ ಧನಂಜಯ, ತಾಪಂ ಸದಸ್ಯರಾದ ಶ್ರೀನಿವಾಸಪ್ರಸಾದ್‌, ಶೋಭಾಕೋಟೆಗೌಡ, ಮಾಜಿ ಸದಸ್ಯ ನಾಗಣ್ಣ, ಸಾದೀಕ್‌ಖಾನ್‌, ಪುರಸಭೆ ಸದಸ್ಯರಾದ ಎನ್‌.ಶಿವಕುಮಾರ್‌, ಎಚ್‌.ಸಿ.ರಾಜು, ಉಮೇಶ್‌,

ಕೆ.ಎಲ್‌.ಕುಮಾರ್‌, ಮಾಜಿ ಉಪಾಧ್ಯಕ್ಷ ಶಿವಶಂಕರ್‌, ಮುಖಂಡರಾದ ಮೆಡಿಕಲ್‌ ರಾಜಣ್ಣ, ಪಿಕಾರ್ಡ್‌ ಬ್ಯಾಂಕ್‌ ಮಾಜಿ ಅಧ್ಯಕ್ಷ ಅರ್ಜುನಹಳ್ಳಿ ಗಣೇಶ್‌, ಎಪಿಎಂಸಿ ಮಾಜಿ ನಿರ್ದೇಶಕರಾದ ರಾಜಶೇಖರ್‌, ನಂಜುಂಡಸ್ವಾಮಿ, ಜೆಡಿಎಸ್‌ ಮುಖಂಡರಾದ ಎಚ್‌.ಕೆ.ಸುಜಯ್‌, ಕೆ.ಎಸ್‌.ರೇವಣ್ಣ, ಕೆ.ಬಿ.ಪ್ರಕಾಶ್‌, ಮಹದೇವ್‌, ಕೆ.ಟಿ.ತ್ಯಾಗರಾಜು, ರಾಮಚಂದ್ರು, ಎಂ.ಎಚ್‌.ಸ್ವಾಮಿ, ನಾಗರಾಜು, ರಾಂಪುರ ಕಾಳಪ್ಪ, ಮಂಜುನಾಥ್‌, ಡಿ.ಕೆ.ರಾಜೇಗೌಡ, ಕೆ.ಎನ್‌.ರವಿ ಇತರರಿದ್ದರು.

ಸಿದ್ದರಾಮಯ್ಯ ದುರಾಡಳಿತದಿಂದ ರಾಜ್ಯದಲ್ಲಿ ಸುಮಾರು 4 ಸಾವಿರ ರೈತರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಅವರಿಗೆ ಆತ್ಮಸೈರ್ಯ ತುಂಬಲು ಸಾಲಮನ್ನಾ ಸೇರಿ ಜೆಡಿಎಸ್‌ ವಿವಿಧ ಯೋಜನೆಗಳನ್ನು ರೂಪಿಸಿದೆ. ಎಚ್‌.ಡಿ.ಕುಮಾರಸ್ವಾಮಿ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಮಾಡಿದ ತಕ್ಷಣದಿಂದಲೇ ರೈತರು, ಮೀನುಗಾರರು ಮತ್ತು ಮಹಿಳಾ ಸ್ವ-ಸಹಾಯ ಸಂಘಗಳು ಮಾಡಿರುವ 58 ಸಾವಿರ ಕೋಟಿ ರೂ. ಸಾಲಮನ್ನಾ ಮಾಡಲಾಗುತ್ತದೆ. 
-ಎಚ್‌.ವಿಶ್ವನಾಥ್‌, ಮಾಜಿ ಸಂಸದ.