Advertisement
ಇವರಿಬ್ಬರು ಚೀನಾ ವಿರುದ್ಧ ಮುಂದಿನ ತಿಂಗಳು ತಿಯಾಂಜಿನ್‌ನಲ್ಲಿ ನಡೆಯುವ ಡೇವಿಸ್‌ ಕಪ್‌ ಏಷ್ಯಾ-ಒಶಿಯಾನಿಯ ಗ್ರೂಪ್‌ ಒಂದರ ಕೂಟದಲ್ಲಿ ಜತೆಗೂಡಿ ಆಡಬೇಕಿದೆ. 5 ಸದಸ್ಯರ ಆಯ್ಕೆ ಸಮಿತಿ ಯೂಕಿ ಭಾಂಬ್ರಿ, ರಾಮ್‌ಕುಮಾರ್‌ ರಾಮನಾಥನ್‌, ಸುಮಿತ್‌ ನಗಾಲ್‌, ರೋಹನ್‌ ಬೋಪಣ್ಣ, ಲಿಯಾಂಡರ್‌ ಪೇಸ್‌ ಅವರನ್ನು ಭಾರತದ ಡೇವಿಸ್‌ ಕಪ್‌ ತಂಡಕ್ಕೆ ಸೇರಿಸಿದೆ. ದಿವಿಜ್‌ ಶರಣ್‌ ಮೀಸಲು ಆಟಗಾರರಾಗಿದ್ದಾರೆ. ಕೆನಡಾದೆದುರು ನಡೆದಿದ್ದ ವರ್ಲ್ಡ್ಕಪ್‌ ಪ್ಲೇ-ಆಫ್ನಲ್ಲಿ ಗಮನಾರ್ಹ ಪ್ರದರ್ಶನ ನೀಡದ ಪುರವ್‌ ರಾಜ ಅವರನ್ನು ಕೈಬಿಡಲಾಗಿದೆ.
ಡೇವಿಸ್‌ಕಪ್‌ ಡಬಲ್ಸ್‌ಗೆ ಪೇಸ್‌-ಬೋಪಣ್ಣ ಜೋಡಿಯನ್ನು ಆಯ್ಕೆ ಮಾಡುವ ಮೂಲಕ ಆಟಗಾರರ ಆಯ್ಕೆ ವಿಚಾರದಲ್ಲಿ ಮೂಗು ತೂರಿಸುತ್ತಿರುವ ಭೂಪತಿ ಅವರತ್ತ ಖಡಕ್‌ ಸಂದೇಶ ರವಾನಿಸಿದೆ. ಹಾಗೆಯೇ ತಿಯಾಂಜಿನ್‌ ಟೂರ್ನಿಯಲ್ಲಿ ಪೇಸ್‌ಗೆ ಜತೆಯಾಗಲು ಇಷ್ಟವಿದೆಯೇ, ಇಲ್ಲವೇ ಎಂಬುದನ್ನು ಕೂಡಲೇ ತಿಳಿಸಬೇಕೆಂದು ಬೋಪಣ್ಣ ಅವರಿಗೆ ಸೂಚಿಸಿದೆ. ವೈಯಕ್ತಿಕ ಕಾರಣದಿಂದಾಗಿ ಬಹಳ ಹಿಂದಿನಿಂದಲೂ ಭೂಪತಿ ಮತ್ತು ಬೋಪಣ್ಣ ಅವರು ಪೇಸ್‌ ಜತೆ ಉತ್ತಮ ಸಂಬಂಧ ಹೊಂದಿಲ್ಲ. ಆದರೆ ಮಹೇಶ್‌ ಭೂಪತಿ ಮತ್ತು ಪೇಸ್‌ ನಡುವೆ ಮುನಿಸು ಮೂಡುವ ಮುನ್ನ ಪೇಸ್‌-ಭೂಪತಿ ಜೋಡಿ ಭಾರತ ಪರ ಗ್ರ್ಯಾನ್‌ ಸ್ಲಾಮ್‌ ಗೆದ್ದು ವಿಶ್ವ ಖ್ಯಾತಿ ಗಳಿಸಿತ್ತು ಎನ್ನುವುದನ್ನು ಮರೆಯುವಂತಿಲ್ಲ.