ವಿಂಡೀಸ್‌ ಕ್ರಿಕೆಟ್‌ ಮಂಡಳಿ ಅಧ್ಯಕ್ಷರಾಗಿ ಮತ್ತೆ ಕ್ಯಾಮರೂನ್‌

ಸೇಂಟ್‌ ಜಾನ್ಸ್‌ (ಆಂಟಿಗುವಾ): ವಿವಾದಿತ ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಮಂಡಳಿ ಅಧ್ಯಕ್ಷ ಡೇವ್‌ ಕ್ಯಾಮರೂನ್‌ 3ನೇ ಬಾರಿಗೆ ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಮಂಡಳಿ  ಅಧ್ಯಕ್ಷ  ಸ್ಥಾನಕ್ಕೆ ಆಯ್ಕೆಯಾಗುವ ಸಾಧ್ಯತೆ ಇದೆ. 

ಈ ವಿಷಯವನ್ನು ಸ್ವತಃ ವಿಂಡೀಸ್‌ ಕ್ರಿಕೆಟ್‌ ಮಂಡಳಿ ಮೂಲಗಳು ಸ್ಪಷ್ಟಪಡಿಸಿದೆ. ವಿಂಡೀಸ್‌ ಕ್ರಿಕೆಟ್‌ ಮಂಡಳಿ ವಾರ್ಷಿಕ ಮಹಾಸಭೆ ಮಾರ್ಚ್‌ನಲ್ಲಿ ನಡೆಯಲಿದೆ. ಈ ವೇಳೆ ಕ್ಯಾಮರೂನ್‌ ಅವಿರೋಧವಾಗಿ ಅಧ್ಯಕ್ಷರಾಗಿ ಆಯ್ಕೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ. ಕ್ಯಾಮರೂನ್‌ ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಮಂಡಳಿ ಅಧ್ಯಕ್ಷರಾಗಿ ಮತ್ತೆ ಆಯ್ಕೆಯಾಗಿದ್ದೇ ಆದರೆ ಮುಂದಿನ 2 ವರ್ಷ ಅಧಿಕಾರದಲ್ಲಿ ಮುಂದುವರಿಯಲಿದ್ದಾರೆ. 

ಕ್ಯಾಮರೂನ್‌ ತಮ್ಮ ಅವಧಿಯದಲ್ಲಿ ಹಲವು ವಿವಾದ ಸೃಷ್ಟಿಸಿದ್ದರು. ಅದರಲ್ಲೂ ಕಳೆದ ನವಂಬರ್‌ನಲ್ಲಿ ಡ್ಯಾರನ್‌ ಬ್ರಾವೋರನ್ನು ಬಹಿರಂಗವಾಗಿ ಟೀಕಿಸಿ ವಿವಾದಕ್ಕೆ ಗುರಿಯಾಗಿದ್ದರು. ಇದಕ್ಕೆ ಬ್ರಾವೋ ತಿರುಗೇಟು ನೀಡಿದ್ದರು. ಕ್ಯಾಮರೂನ್‌ ಅವರನ್ನು “ಬಿಗ್‌ ಈಡಿಯೆಟ್‌’ ಎಂದು ಟ್ವೀಟರ್‌ನಲ್ಲಿ ಜರಿದು ಪ್ರಕಟಿಸಿ ದೊಡ್ಡ ವಿವಾದವಾದದ್ದನ್ನು  ಸ್ಮರಿಸಬಹುದು.